Ipekanyeni Bwino Ilyo Icibukisho Tacilafika

Ala mwandini Abena Kristu balaba ne nsansa kabili balapaalwa nga nshi nga baipekanya bwino ukwibukisha imfwa ya kwa Yesu Kristu! (Luka 22:19) Finshi tufwile ukucita pa kuti tuipekanye bwino ilyo Icibukisho tacilafika?

◼ Inshita no ko Cikabela: Bonse bafwile ukwishiba bwino inshita Icibukisho cikatendeka no ko cikabela. Nga ca kuti ifilonganino fibili fikalonganina mu Ng’anda ya Bufumu imo, nacicindama sana ukuti bakatendeke pa nshita balingile ukutendekelapo no kufuma bwino kabili ukwabula ukupoosa inshita, pantu inshita iba pa kati pa kuti bambi bengilemo ilacepa sana. Cimbi icacindama, kushininkisha ukuti abantu tabalesunkana pa kwingila nangu pa kufuma, nangu ukwiminina mu nshila nelyo apa kwimika imyotoka.

◼ Ukwita Abantu: Bushe bakasabankanya bonse nabakwata utupepala twa kwitilapo abantu kabili bushe nabeshiba ifilipo? Bushe mwalipitamo mu fyo mukalalanda pa kushila abantu utu tupepala? Ni bani mukapeela? Mufwile ukubombesha ukupwisha ukupeela abantu utupepala tonse.

◼ Imyendele: Bamo abalefwaya ukusangwa ku Cibukisho, ukubikako fye na bamunyinefwe na bankashi abengi kuti bafwaya ubwafwilisho mu myendele nangu mu fintu fye fimbi pa kuti basangweko. Bushe finshi mwapekanya pa kuti mukabafwilishe?

◼ Ifimpashanya: Mukashininkishe ukuti ifimpashanya fikapitemo ninshi akasuba nakawa. Mufwile ukupekanya ukupeela abasubwa bonse abalwele nelyo abafilwa ukusangwako. Mufwile ukukwata umukate walinga no mwangashi walinga no kubikila calimo pa mbale na mu matambula ilyo ukulongana takulatendeka.—Moneni Ulupungu lwa kwa Kalinda ulwa February 15, 2003, ibula 14, paragrafu 14.

◼ Ing’anda ya Bufumu: Mufwile ukuwamisha calimo Ing’anda ya Bufumu. Imbale, amatambula ya kubikamo umwangashi, ne tebulo ilisuma ne nsalu ya kufimba pe tebulo fifwile ukuletwa ku Ng’anda ya Bufumu ilyo kucili inshita no kubikwa bwino. Nga mukalonganina ku cifulo cimbi, mufwile ukukwata ifisoselo ifyakumanina pa kuti bonse bakaleumfwa bwino ifyo kalanda alelanda. Bakapyunga na ba kupishamo ifimpashanya bafwile ukusalilwa calimo no kubeba bwangu imilimo yabo, ifyo bakacita, e lyo no kuti bafwile ukufwala bwino.

Pali ubu bushiku bwacindamisha, ubwa kwibukisha imfwa ya kwa Yesu Kristu, tulefwaya bonse, umo umo e lyo ne cilonganino conse, tukaipekanye bwino. Ukwabula no kutwishika, Yehova akapaala nga nshi bonse abakatasha ukufuma pa nshi ya mutima pali fyonse ifyo Yehova apeela abantunse ukupitila mwi lambo lya Mwana wakwe, uwatemwikwa, Yesu Kristu.