Umukululo wa Mepusho

◼ Bushe isambililo lya Baibolo lifwile ukulepa shani?

Tabatupimina inshita tufwile ukupoosa pe sambililo lya Baibolo. Lelo icikapima ubutali tukapoosa no bwingi bwa fyebo tukasambilila, kwishiba umo umusambi acita bwino na umo ashicita bwino e lyo ne fyo tufwaisha ukuti alunduluke lwa ku mupashi. Tulafwaya aishiba no kumfwikisha e lyo no kumwafwa ukulabomfya ifyo alesambilila. Mu 2005 twalipokelele icitabo ca kuti Bushe Cinshi Baibolo Isambilisha? Kuti twapwisha ukusambilila muli ici citabo mu nshita fye iinono, kabili ‘ababa no mutima uusuma’ balasambilila ifingi ica kutila kuti baipeela no kubatishiwa.—Imil. 13:48.

Na lyo line, abasambi tabalunduluka pa nshita imo ine. Bamo tababikako sana amano ku fya kwa Lesa nelyo ukumfwikisha bwangu ifyo balesambilila. Bambi nabo balikwata ifya kucita ifingi. Inshita shimo kuti cawama ukulasambilila amaparagrafu ayanono mu nshita ya kusambilila icipandwa conse. Apa epo tukabila ukwishiba ifya kucita.

Cilawama bakasabankanya nga baletungulula amasambililo ya Baibolo ayengi cila mweshi. Lelo pa mulandu wa kukwata ifingi ifya kucita, kuti kwalenga twalapoosa inshita iinono pe sambililo pantu kuti tulefwaya ukuya ku masambililo ya Baibolo na yambi. Bushe ifi kuti fyalenga abasambi ba Baibolo ukulunduluka? Taleni tontonkanyeni pa mulilo. Pa kuti umulilo wake kano mwabombesha. Na lyo line, nga tapali amalasha ayengi no tumulilo utulipo nga tamuletuputilila, umulilo te kuti wake uwa kuti mwaipikilanapo. E fyo caba na ku basambi ba Baibolo, nangu ca kuti ukusambilila nabo pa nshita iinono kuti kwatuwamina, bushe tulakwata inshita iisuma iya kuba-afwa ukumfwikisha ifyo tulebasambilisha no kwikatanya ifishinka e lyo no kwishiba ifya kubomfye ifyebo balesambilila?—be ibu. 60 amapara. 1-3.

Ukulingana ne fyo ifintu fili ne fyo umusambi alamuka, kuti twasambilila icipande conse mu bushiku fye bumo ukwabula ukukwankwanya. Umusambi kuti alunduluka nga ca kuti bonse kasambilisha no musambi nga balesambilila pali bulya bwino ubushiku baimika cila mulungu kabili balesambilila inshita iyalinga pa kuti balepelulushanya pa fyo balesambilila.

Bushe kuti twayafwa abo tusambilila nabo Baibolo ukwishiba ifingi pa fya kwa Lesa? Nga tulebomfya bwino impapulo shesu ne nshita, tukalaba ne nsansa ukwafwa abasambi abengi ukubatishiwa “inshiku shonse mpaka na ku mpela ya calo.”—Mat. 28:20.