Ukutemwa kwa kwa Kristu Kulalenga na Ifwe Twatemwa Bambi
1. Bushe ukutemwa kwa kwa Yesu kutulenga ukucita cinshi?
1 Yesu alitubikile ica kumwenako icisuma sana ico tufwile ukupashanya. Abasambi bakwe bafwile ukulakonka ica kumwenako abashilile ica kutemwa bambi.—Rom. 8:35.
2, 3. Bushe ba Nte balabombako imilimo ya mu bwikashi?
2 Inte sha kwa Yehova shaishibikilwa ku kulanga ukutemwa nga kulya kwakweteko Kristu. Ilyo ku United States kwali icipuupu icaonawile incende iikalamba mu 2005, ba Nte ukucila pali 20,000 bali-itemenwe ukuya mu kwafwilisha bamunyinabo.
3 Ku ncende imo, amenshi ayo ici cipuupu capoosele ku mulundu yafikile apalepele amakilomita 80, kabili fyonse ifyalepele amamita ukutampila pali 10 no kubwela pa nshi fyalibundile. Ilyo amenshi yakamine, amayanda ne fikuulwa ifingi nga nshi fyalonawilwe. Ba Nte abaishibe imilimo yalekanalekana, bafumine ku fyalo ifingi no kuitemenwa ukuya mu kwafwilisha bamunyinabo. Balisendele ne fya kukuulila kabili bali-ipeeleshe ukubomba imilimo yonse iyalekabila ukubombwa. Ifyo aba ba Nte bacitile fyalangile ukuti bali no mutima uwakwete Kristu.
4, 5. Cinshi cilenga ukuti tuleafwa abantu bambi?
4 Fwe bengi uko twikala takwatala akubako akayofi akakalamba. Na lyo line, bonse tulalwala nelyo ukulwalika. Ilyo abantu baletele abalwele babo kuli Yesu, alibomfwilile uluse pantu alibatemenwe, e calengele no kuti, ‘ondape bonse abalwele.’—Mat. 8:16; 14:14.
5 Na ifwe tulomfwa uluse nga twamona abalecula. Tontonkanyeni pa fyo cali kuli ba Charlene, abali ne myaka 44. Balilwele kansa kabili babebele ukuti bali no kufwa pa numa fye ya nshiku 10. Bankashi babili, ba Sharon na ba Nicolette, bali-ipeleshe ukwafwa ba Charlene muli shilya nshiku sha kulwala kwabo. Ba Charlene baishilefwa pa numa ya milungu 6. Ba Sharon batile: “Cilafya nga nshi ukutensha umuntu nga nawishiba ukuti tapusuke. Lelo Yehova alitukoseshe kabili twalipaleme sana kuli ena e lyo calengele no kuti tutemwane sana.” Abalume ba ba Charlene batile: “Nshakatalelaba ifyo aba bankashi babili balangile icikuuku ne fyo batwafwile. Ifyo batulangile ukutemwa fyalengele ubwesho twakwete ukwanguka kabili calengele no kuti tushipe. Nshakaleke ukutasha pa fyo bacitile. Ukuipeelesha kwabo kwalikoseshe icitetekelo candi muli Yehova kabili kwalengele intemwe sana aba bwananyina bonse.”
6. Finshi ifyo tufwile ukubikako sana amano?
6 Bushe kuliko mumo umo mwingawamyako pa kuti mulange sana ukuti mwalitemwa aba bwananyina mu cilonganino cenu? Natuletemwa bamunyinefwe bonse nga filya Kristu atemenwe abasambi bakwe “ukufika na ku mpela.” Ukutemwa aba bwananyina kukalanga ukuti tuli basambi ba cine aba kwa Yesu.—Yoh. 13:1, 34, 35.