Imifwalile Yesu Isuma Ikalenga Abantu Ukucindika Lesa
1. Mulandu nshi tufwile ukubika amano ku mimonekele yesu?
1 Abantu balabika sana amano ku kumona ifyo tulecita cila bushiku. (1 Kor. 4:9) Nga tulefwala bwino no kumoneka bwino, ninshi tulelanga ukuti tulatiina Yehova no kuti tulatasha pa fyo atusambilisha.—Amalu. 116:12, 17.
2. Bushe imifwalile ya Bena Kristu yapusanako shani ne ya bantu ba ku calo?
2 Aba Busaka Kabili Abaipempenkanya: Imimonekele yesu ifwile ukulanga ifyo Lesa tupepa aba. Yehova wa busaka kabili te wa cimfulunganya. (1 Kor. 14:33; 2 Kor. 7:1) Tufwile ukulamoneka bwino kabili umushishi wesu na maala fifwile ukulamoneka bwino. Muno nshiku, abantu balitemwa sana ukufwala ifya busanku. Lelo fwe Bena Kristu tatufwile ukulafwala ifya busanku pantu fye e filefwala bakemba nelyo abangala ifyangalo. Nga tulekonkelela amafashoni ya ku calo, tapakabe ubupusano pali ifwe fwe babombela Lesa wa cine na bashimubombela.—Mal. 3:18.
3. Malembo nshi yengatwafwa ukulasala bwino ifya kufwala?
3 Imifwalile Iyalinga Ababombela Lesa: Ilyo umutumwa Paulo alembele kangalila wa Bwina Kristu Timote atile, “abanakashi balefwala bwino, balefwala ifyalinga kabili ifya mucinshi,. . . balefwala mu nshila iyalinga abanakashi abatila balatiina Lesa, e kutila ukupitila mu milimo isuma.” (1 Tim. 2:9, 10) Na baume bene bafwile ukukonka uku kufunda. Pa kuti tulefwala ifilemoneka bwino, tufwile ukubikako sana amano. Ifya kufwala fifwile ukuba ifya busaka kabili ifyalinga, tafifwile ukuba ifya mataki nelyo ifibimbula bambi.—1 Pet. 3:3.
4, 5. Finshi tufwile ukulaibukisha ilyo tulesala ifya kufwala?
4 Nga tulefwaya ukulafwala ifyalinga kabili ifya mucinshi, tufwile ukulasala bwino ifya kufwala ilyo tuleshita. Calicindama sana ukusala ifya kufwala ifishilepapatila sana. Kuti twapashanya ifyo tufwala ku cilimba. Nga twafwala ifyapapatila sana ciba kwati twaiswisha icilimba. Filya fine abantu bamo bomfwa ububi nga twaisula sana icilimba, e fyo bomfwa no bubi nga twafwala ifyapapatila sana. Bushe ukufwala ifya musango uyu te kuti kulangilile fye apabuuta ukuti tulekonkelela umupashi wa ici calo?
5 Fwe bengi tushita ifya kufwala ifyafwalwapo kale. Lelo tatufwile ukushita fye icili conse pantu fye nacinaka umutengo. Nalimo kuti cayafya ukusanga ifya kufwala ifingatulinga bwino, ifishingalanga ukuti tulakonkelela umupashi wa calo, e lyo kabili ifishalembwapo amashiwi ayashalinga. Lelo nga tulebikako amano ku kufwaya ifya kufwala ifya mucinshi, bamunyinefwe bakatasha kabili tukalenga Yehova ukutemwa.—1 Kor. 10:31.
6. Busuma nshi bwaba mu kufwala ifyalinga no kumoneka bwino?
6 Filya ifine ukumwentula kulenga icinso cesu ukumoneka bwino, ifya kufwala fyalinga filalenga abantu bacindika ukuteyanya kwesu ne mbila nsuma tushimikila. Abatumona ilyo tuli pa mayanda yesu, ilyo tuleshimikila na ilyo tuleya ku kulongana, kuti basuka baipusha umulandu twabela abapusanako ku bantu bambi kabili umuye inshiku nalimo kuti batila: “Tuleya na imwe, pantu natumfwa ukuti Lesa ali na imwe.” (Seka. 8:23) Natulefwala ifyalinga no kulamoneka bwino, e lyo tukalanga ukuti tulatiina Yehova.