Mulepeelako aba Bwananyina ‘ica Bupe Cenu Icafuma Kuli Lesa’

Tulakoseleshiwa sana nga tuli pamo na bamunyinefwe na bankashi. Nomba pa kuti tulekoseleshanya sana ilyo tuli pamo na ba bwananyina, tulingile ukulacitako na fimbi. Baibo itila nga tulekoseleshanya ilyo tuli pamo na ba bwananyina, ninshi tulepeelana “ica bupe icafuma kuli Lesa.” (Rom. 1:​11, 12) Kuti twacita shani pa kuti tulepeelana ica bupe icafuma kuli Lesa?

Mulelanda amashiwi ayasuma ayengakoselesha aba bwananyina. Ku ca kumwenako ilyo muleasuka pa kulongana, mulelanda sana pali Yehova, pa Cebo cakwe na pa babomfi bakwe. Tamufwile ukulalanda sana pali mwe bene. Ilyo mulelanshanya na ba bwananyina, kuti cawama mulelanda pa fintu ifingabakoselesha.

Mulekoselesha aba bwananyina mu fyo musalapo ukucita na mu fyo mucita. Ku ca kumwenako bamo balisalapo ukutwalilila ukubomba umulimo wa nshita yonse nangu ca kuti balakwata amafya. Bambi nabo balaibikilishako pa kuti balelongana ukulongana kwa mikalile nangu ca kuti balakwata ifya kucita ifingi ku ncito nelyo balalwalilila.

Bushe ifyo mulanda ne fyo mucita filakoselesha aba bwananyina? Bushe mulabika amano ku fyo aba bwananyina balanda ne fyo bacita pa kumukoselesha?