Uwali Umushilika Aba Painiya wa Nshita Yonse

NALI fye ne myaka 16 ilyo bacipondoka abashilika bampatikishe ukwingila ubushilika. Balempeela imiti ikola no bwalwa, kabili ilingi line nalelwa ninshi imiti nainkola. Nalilwile inkondo ishingi, kabili nalicitile imisoka iishaibipila. Ala mwandini ndomfwa ububi pa fyo nalecita.

Bushiku bumo, Nte umo umukoloci alishile mu kushimikila umo twaleikala. Apo twali bacipondoka abantu abengi baletutiina kabili balitupatile, lelo uyu Nte ena aleisa mu kutusambilisha. Ilyo anjitile ukuya mu kulongana, nalisumine. Nshibukisha ifyo twasambilile mu kulongana, lelo ndebukisha bwino sana ifyo bampokelele ne nsansa.

Ilyo inkondo yakoseeleko, nshaishibe no kwali ba Nte. Balincenene icabipisha mu nkondo, lyena balintwele ku cifulo uko baleundapila bacipondoka. Ilyo inkondo tailapwa, nalifyukiile ku cifulo uko ubuteko bwalesambilisha abantu ifya kuleka ubushilika, ne fyo bengacita pa kuti babwelele mu bwikashi.

Nalefwaisha sana ukwishiba Lesa. Nalipepeleko ku Pentekositi, lelo ilyo bamwene baleti Satana ali mu kati kabo. E co natendeke ukufwaya Inte sha kwa Yehova. Nalibasangile, kabili natendeke ukusambilila no kulongana. Naliyebeleele pa fibi ifyo nalecita, kabili bamunyinefwe bambelengele amashiwi ya kwa Yesu aya cisansamushi ayatila: “Abatuntulu tabakabila kondapa, kano abalwele. . . . Nshaisa ku kwita abalungami, kano ababembu.”—Mat 9:12, 13.

Ala aya amashiwi yalimfikile pa mutima! Nabuulile umwele wa kulwilako, napeela na munyinefwe uwalensambilisha Baibolo, namwebele nati: “Ici icanso cali ca kuicingililako ku balwani. Nomba apo ninjishiba ukuti Yehova na Yesu balintemwa, nshilecifwaya na kabili.”

Bamunyina balinsambilishe ukubelenga no kulemba. Nasukile nabatishiwa natampa na bupainiya bwa nshita yonse. Ino nshita, nga ndeshimikila abashilika abali ifipondo kale, balanda ukuti balincindika pa kuleka ukucita ifyabipa. Ici calengele ukuti ndesambilishako Baibolo umushilika walebombela mwi ofeshi ilyalelolekesha pa kalibumba ka bashilika ako nalimo.

Ilyo nali umushilika, nalikwete abana abaume batatu. Pa numa ya kusambilila icine, nalefwaya ukubafwa ukuti nabo basambilile icine. Nalitemenwe nga nshi ilyo babili basambilile! Pali ino nshita, umwana wandi umo umwaume ni kasabankanya uushabatishiwa e lyo umukalamba pa baume bonse ni painiya wa kwafwilisha.