IFYACITIKE UMWAKA WAPWILE
‘Natumona Ifipesha Amano’
Munyinefwe uushimona abatishiwa
INSHITA imo ilyo Yesu aundepe umwaume uwalwele ubulebe, “bonse balipapile nga nshi, balalumbanya Lesa, kabili balyumfwile umwenso nga nshi no kutila: ‘Twamona ifipesha amano buno bushiku!’” (Luka 5:25, 26) Ifyo Yehova Lesa alecita muno nshiku mwi sonde lyonse ukubomfya Umwana wakwe uwatemwikwa, umusha wa cishinka kabili uwashilimuka, na babomfi bakwe aba cishinka e filenga na ifwe ukufwaisha ukulanda ukuti: ‘Natumona ifipesha amano.’