INDONESIA
Apo Twalyumfwile Ifyo Batwebele—Twalipuswike!
Ba Blasius da Gomes
BAFYELWE MU 1963
BABATISHIWE MU 1995
Baali ni baeluda abatemenwe impaanga shabo kabili balishisakamene ilyo aba mu mipepele balekansana mu musumba wa Ambon pa cishi ca Maluku.
PA 19 January, 1999, ulupato lwali pa baShilamu na Bena Kristu lwalikulileko ica kuti kwalibukile ne fimfulunganya ifyafikile mupepi sana na apo naleikala, nalimo pali fye amakilomita yatatu. Ala ifintu fyalibipile nga nshi.a
Ilyo nashininkishe ukuti ulupwa lwandi talwali mu busanso, nalitumiine bakasabankanya amafoni pa kuti njishibe ifyo bali. Nalibakoseleshe ukuti batwalilile ukuba abashipa kabili nabebele no kuti belaya ku ncende ukwali ifimfulunganya. Lyena baeluda balile ku kwafwilisha aba bwananyina mu fya kwa Lesa no kubakoselesha ukuti batwalilile ukulalongana mu mabumba ayanono.
Aba kwi ofeshi lya musambo balitwebele ukuti tufwile ukukuusha aba bwananyina bonse abaleikala mu ncende umwali ifimfulunganya kabili aya yene e mashiwi twatumine ku ndupwa shonse. Munyinefwe umo uwakeene ukukuuka balimwipeye ku bali mwi bumba lya balecita ifimfulunganya. Lelo bonse abaumfwile ifyo aba kwi ofeshi lya musambo batwebele balipuswike.
a Ifimfulunganya fyalitwalilile mu citungu ca Maluku ukucila pa myaka ibili kabili abantu abengi balifulumwike no kusha amayanda yabo.