Aba Bwananyina Balalanga Ukutemwa mu Nshita ya Mafya

ILINGI LINE, mu Indonesia mulaba ifinkukuma, ifikuuku fya mwela e lyo ne mpili ishipuulika. Amasanso ya musango uyu nga yacitika, abantu ba kwa Yehova tabakokola ukwafwilisha abali mu busanso, maka maka aba bwananyina. Ku ca kumwenako, mu 2005 mu musumba wa Gunungsitoli, umusumba uwa kulisha mu cishi ca Nias mu North Sumatra, mwalipitile icinkukuma icikalamba nga nshi. Aba mu filonganino ifyali pa cishi ca Sumatra icaba mupepi e lyo na ba kwi ofeshi lya musambo balitumine ifintu ifya kwafwilisha aba bwananyina abasanshilwe. Kabili kangalila wa muputule no mwiminishi wa musambo balile ne ndeke kuli ici cishi mu kukoselesha aba bwananyina e lyo no kubasansamusha. Ba Yuniman Harefa, baeluda pa cishi ca Nias batile, “Abantu bonse fye bali no mwenso sana. Lelo filya aba bwananyina baishile bwangu mu kutwafwilisha, fyalilengele twashininkisha ukuti balitutemwa icine cine.”