“Lesa Kuti Acita Ifintu Fyonse”

MU KUPWA kwa ba 1980, kangalila wa Ulupungu lwa kwa Kalinda e walekwata fye magazini nga tulelongana, kabili nayo yaleba fye ya kulemba ku minwe. Naipwishe ba Genadi Gudadze baeluda nga kuti tuleipulintila fye magazini.

Pali iyi inshita yonse, bamunyina balebomfya kamashini akanono ako baipangile fye pa kupanga impapulo ishinono. Pa kuti balepanga magazini lyonse, balingile ukukwata mashini ya kupangilako iyalebomba bwino, uwaishibisha ukutaipa, mashini ya kutaipilako e lyo no kwakufumya amapepala ya kubomfya. Na lyo line, fyonse ifya kubomfya pa kupanga kumo fye na mapepala fyalilembeshiwe ku buteko kabili e bwaleyangalila ifyo baleshitisha ifi fintu.

Umunandi nabombelepo nankwe uwakwete insambu sha kupoosa fimo ifyo ubuteko bushibomfya alimpeeleko mashini ya kutaipilako. Nkashi inandi alebomba umulimo wa kutaipa kabili e wali no kulatwafwako ukutaipa. Bamunyina balipangile mashini iipya iya kupangilako impapulo kabili balisangile uko bali no kulashita ifya kubomfya. Twalikwete fyonse ifya kubomfya kabili tapapitile ne nshita iikalamba twalipangile Ulupungu lwa kwa Kalinda ulwa mu ciGeorgian.

Lelo twalikwete ubwafya na bumbi. Bushiku bumo ba Genadi banjebele ukuti: “Tulingile ukufwaya na kumbi ukwa kulashita amapepala ya kubomfya pa kupanga impapulo.” Kwali iofeshi limo ilya buteko ilyakwete aya mapepala lelo calyafishe ukuti ba Genadi bashiteko pantu bali no kubamona ku balashi ba mu buteko. Finshi twali no kucita pa kukwata aya mapepala? Lyonse nalelanda nati, “Tapali ifyo twingacita!” Nomba ba Genadi balenjeba ukuti, “Lekeni ukulanda ukuti ‘tapali ifyo twingacita,’ ‘Lesa kuti acita ifintu fyonse’!”—Mat. 19:26.

Nalitwalilile ukutontonkanya pa fyo banjebele ilyo naleya kwi ofeshi lya buteko ubushiku bwakonkelepo ninshi ndi no mwenso. Yehova antungulwile ku muntu uwakwete umutima uusuma uwalebomba umulimo wa kutaipa uwanandileko ku mukalamba we ofeshi lya buteko uwali umulume wakwe. Ukutula pali ubu bwine bushiku, natendeke ukulashita amapepala ya kubomfya muli ili iofeshi kabili tatwatalile atukwatapo ubu bwafya na kabili.