Bakapokola Bashindika ba Joseph

Nga muli Nte ya kwa Yehova, elenganyeni ukuti bakapokola balemushindika ilyo mulebila imbila nsuma ku ng’anda ne ng’anda. Ifi fine e fyacitikile ba Joseph abekala ku Micronesia mu 2017. Bena pamo na ba Nte bambi batatu baile ku cishi icabela ukutali mu kubila imbila nsuma ilyo kwali kampeni.

Ilyo akasuba kafikile pa kati ka mutwe, ba Nte bane balifikile pa cishi icinono apekala abantu nalimo 600. Ba Nte balibapokelele ku lulamba lwa bemba kuli cilolo wa pa cishi. Ba Joseph balondolwele ifya konkelepo abati: “Cilolo wa pa cishi atwebele ukuti bakapokola kuti batusenda muli motoka yabo no kututwala ku mayanda yonse. Twalipapile ifyo batwebele, na lyo line mu mucinshi twalikeene. Twalefwaya ukuya pa mayanda ya bantu nga fintu tucita lyonse nga tulebila ku ng’nda ne ng’anda.”

Bakasabankanya batendeke ulwendo lwa pa makasa ukuya ku mayanda, kabili balefwaya ukubila ku bantu abengi nga nshi. Ba Nte batile: “Abantu baletupokelela bwino kabili balekutika ku bukombe twalebela. Ici calengele tulekokola pa mayanda ukucila ifyo twaleenekela.”

Pa numa, pali bulya bwine bushiku, motoka ya bakapokola yalipitile ukwali ba Joseph imiku ibili nomba pa muku wa butatu yaliminine. Bakapokola baipwishe ba Joseph nga kuti balabenshako muli motoka pa kuya pa mayanda ayasheleko ukutandalila. Ba Joseph batile: “Nalikeene. Nomba uno muku wena balipatikishe, batile, ‘Mwashalako fye ne nshita iinono ukuti mufume pano cishi, kanshi twalamutwala ku mayanda ayashele.’ Nalifililwe ukukaana na kabili pantu kwali amayanda ayengi ayo tushatandalile. Ilyo twaleya pali cila ng’anda, bakapokola balenjeba amashina ya lupwa abekala pali iyo ng’anda kabili batile nga ca kuti twakonkonsha e lyo tapali abafumine balelisha uta pa kuti abene ba ng’anda bafume.

“Ici calengele tupwishe ukutandalila amayanda yonse pali bulya bwine bushiku. Twalipeele abantu abengi impapulo kabili twalipangene nabalefwaya ukwishibilapo na fimbi ukuti tukayabamona na kabili.”

Bakapokola baebele ba Joseph ukuti balitemwa “ukubilako imbila nsuma.” Ilyo ba Nte balebwelelemo uko bafumine ninshi akasuba kawa, bakapokola baiminine ku lulamba lwa bemba ninshi bali ne mpapulo shilanda pa fya mu Baibolo ku minwe, balemwentula no kumwentula.