Ukulepula Ukwabulo Kubomfyo Mulopa—Ubusuma bwa Kuko Nabulumbuka

MU 1996 Royal College of Surgeons of England yasabankenye akatabo ketwa Code of Practice for the Surgical Management of Jehovah’s Witnesses. Muli ako katabo badokota ba kulepula balandile ukuti: “Amasanso ya kubikamo umulopa yacilenga ukube cakabilwa ukufwayako inshila shimbi nga cingabomba.”

Ulupapulo lwa AHA NEWS, ulusabankanishiwa na American Hospital Association, lwashimike umulandu ubusuma bwa kulepula ukwabulo kubomfyo mulopa bulumbukile. Ulu lupapulo ulufuma cila mulungu lwalandile ukuti: “Icatendeke nge cisumino ca mipepele cilesanguka ukube nshila ya kundapilamo kabili iyalunduluka nga nshi. Ukundapa no kulepula ukwabulo kubomfyo mulopa, lubali lumo ukwaletelwe ne fifundisho fya Nte sha kwa Yehova, takupelela fye ku fya mipepele epela lelo kwalitebelela ifipatala fya mu Amerika.”

Umulandu badokota abengi balekoselesha ukulepula ukwabulo kubomfyo mulopa lyali lyashi likalamba lyalembelwe mu lupapulo lwalundwako ulwa magazini wa Time uwa ciputulwa ca bune ica 1997. Ici cipande catile: “Ukutiina AIDS mulandu fye umo uwalenga.” Ici cipande cashimike maka maka pa mulimo uulebombwa pa New Jersey Institute for the Advancement of Bloodless Medicine and Surgery, pa cipatala ca Englewood Hospital mu Englewood, ku New Jersey.

Magazine wa Time alandile ukuti: “Ici cipatala ni kalapashi pa fipatala ukucila pali 50 ifya mu United States of America ifilepula ukwabulo kubomfyo mulopa. Ukwabulo kubomfyo mulopa uusangulwa, citambika inshila shalekanalekana isha kulepwilamo ishingakabila ukubomfyo mulopa, pamo ne nshila ishicefyako, nelyo fye ishipwisha ukusuma kwa mulopa.”

Inshila Ishibomba Bwino Kabili Ishicingilila

Ifyebo fya kwiswila mu cipande ca Time fyashimike icacitikile Henry Jackson, uwakwete umulopa uwalesuma sana mu mubili ica kuti amaperesenti 90 aya mulopa wakwe yalikamine no kufika ku cipimo ca kulenga imfwa ica magramu 1.7 pa mamililita 100. Jackson bamufumishe mu cipatala cimo ica mu New Jersey icakeene ukumundapa ukwabulo kubomfyo mulopa no kumutwala ku cipatala ca Englewood Hospital.

Ilyo Jackson ali mu cipatala ca Englewood, umo alesakamanwa na Dokota Aryeh Shander, alipeelwe “umuti wa maka uwa iron na mavitamini, ukubikako no ‘muti wa maka’ uwa kufusho mulopa, uwitwa erythropoietin, uulenga ubufyompo bwa mwi fupa ukupanga insandesande shakashika isha mulopa. Mu kulekelesha, bamubikile amabotolo ya menshi ku kwensha umulopa unono uwasheleko.”

Magazini wa Time ashimike ukuti ilyo papitile inshiku ishinono, “icipatala icakeene ukumundapa ukwabulo kubomfyo mulopa catumine foni ukwipusha nga Jackson alifwile. Ukwabulo kufisa, Shander abebele ati, ‘Mutuntulu, kabili ali fye bwino no kufuma alafuma mu cipatala, kabili nomba line alatendeka imilimo iyo abomba lyonse.’”

Mu kwipusha kwa pa televishoni ukwa pa November 28, 1997, Dokota Edwin Deitch, umukalamba wa programu wa kundapa ukwabulo mulopa pa cipatala ca University Hospital, ku Newark mu New Jersey, alondolwele ifyo ukufwailisha pa lwa kulepula ukwabulo kubomfyo mulopa kwalundulwike ukusoso kuti: “Inte sha kwa Yehova . . . baliculile nga nshi pa kwesha ukusanga abantu abengabalepula ukwabulo kubomfyo mulopa. Muli kumo ukwa kufwailisha kwacitilwe casangilwe ukuti baNte bali fye bwino ukucila fintu caleenekelwa, [ukucila] na bantu babikilwemo umulopa.”

Dokota Deitch alundilepo ati: “Umulopa kuti wacefyako amaka ya kulwisha amalwele kabili kuti walenga umuntu ukwambula ubulwele pa numa ya kulepulwa; kuti walundako ubwafya ku muntu uulwala kansa libili libili, e co kanshi, nangu cingati umulopa waliwama mu mibele imo, lubali lumbi walibipa.” Pa lwa kulepula ukwabulo kubomfyo mulopa, Dokota Deitch asondwelele ati: “Mu kumonekesha kulapuupuutulako umulwele, na mafya yalacepako, kabili indalama shipooswapo shinono. Kabili, mu cine cine kwaliwamapo mu mibele fye yonse.”

E ico, nga fintu magazini wa Time asosele ati, “abalwele abalefulilako balefwaisha inshila ishicingilila kabili ishibomba bwino ukucila ukubikwamo umulopa.” Na kabili uyu magazini ashimike ukuti: “Ukufwailisha kumo kusoso kuti, amaperesenti 25 aya bantu babikwamo umulopa mu United States of America tabalingile ukubikwamo. Na kabili calangililwe ukuti abalwele tabengaba bwino nga bakwete icipimo ca hemoglobin ica pa muulu ukulingana na fintu catontonkanishiwe kale kabili calangililwe ukuti maka maka abacaice balikwata umulopa uwingi. . . . [Shander] nashininwa ukuti ukukanabomfyo mulopa ni nshila iisuma kabili iingawamina icinabwingi ca balwele.”

Nangu cingati ubusanso bukalamba ubwa kubikwamo umulopa bwaba kwambula ubulwele, kwalibako amasanso na yambi. Dokota Shander alondolwele ukuti: “Umulopa uubikwa mu cifulo cimo, pa numa watalalikwa no kusungwa, taupisho mwela wa oxygen nga fintu umulopa wa mu mubili ucita. E lintu tutendeke ukumfwikisha ificitika lintu twabiko muntu umulopa.”

“Ni Nshila ya Kucefyako Indalama Shipooswa”

Magazini wa Time asondwelela ati: “Nomba kuliko icipimo ca ndalama ishipooswa: amadola mupepi na 500 yalapooswa ku kubikamo umuntu umo umulopa, ukusanshako ne fipooswa mu fya bwangalishi, shonse pamo shifika ku bwingi bwa madola bilioni umo ukufika ku mabilioni yabili cila mwaka, ishi ndalama kuti shabomfiwa ku kufwailisha inshila shimbi isha kundapilamo.” Nomba cilemoneka kwati ubwingi bwa ndalama shipooswa ku kubikamo umulopa waba e mulandu ukalamba ulengele ukuti ukulepula ukwabulo kubomfyo mulopa kuseeke.

Sharon Vernon, umukalamba wa Center for Bloodless Medicine and Surgery pa cipatala ca St. Vincent Charity Hospital, mu Cleveland, ku Ohio, alandile pa lwa kundapa abalwele ukwabulo kubomfyo mulopa ati: “Kulelundulukilako fye pantu badokota nabasango kuti ukundapa ukwabulo kubomfyo mulopa yaba ni nshila ya kucefyako indalama shipooswa. Twalimono kuti nangu fye twampani twa inshuwalansi utushibombela pamo na ifwe, tulatuma abantu kuli ifwe, pa mulandu wa kuti ishipooswapo shinono.”

Te ca kutwishika ukuti ukulepula ukwabulo kubomfyo mulopa kulelumbuka lubilo lubilo mu fipatala, kabili kuli imilandu iingi ilengele cibe fyo.

[Akabokoshi pe bula 29]

Ubupingushi bwa Filye Ubwa Nomba Line

Ubupingushi bubili ubwacitilwe mu citungu ca Illinois, ku United States of America, mu November na December mu 1997 bwali bupingushi bukalamba. Mu bwa kubalilapo, Mary Jones, umo uwa Nte sha kwa Yehova, bamufutile amadola 150,000 pa mulandu wa kuti mu 1993 bamubikile amabotolo yabili aya mulopa nangu cingati alikeene uyu musango wa kundapa. Ishi ni ndalama ishingi ishatala ashipokwapo na Nte pa mulandu wa kubipilwa kufuma mu kubikwamo umulopa ukwa mupatikisha.

Umulandu wa cibili wabimbilemo Nte uwali pa bukulu uwe shina lya Darlene Brown, uwapatikishiwe ukubikwamo umulopa pa mulandu wa mwana mwi fumo uwa milungu 34. Pa December 31, 1997, icilye ca Illinois Appellate Court calondolwele ubupingushi bwa ciko aciti “ukubikamo umulopa ni nshila ya kundapa iya mupatikisha iipumfyanya bumpomfu bwa muntu umukalamba.” Icilye ca Appellate Court casupawile ubupingushi bwa ciko aciti “ukulingana ne funde lya cino Citungu, . . . te kuti tukambishe umwanakashi uuli pa bukulu ukuti asumine inshila ya kundapa iya mupatikisha.”

Pa February 9, 1998, icilye cikalamba ica Tokyo High Court catelwile ubupingushi bwa cilye cinono icapingwile ukuti dokota alikwete insambu sha kubika Misae Takeda umulopa mu kulepula ukwacitilwe mu 1992. Icilye ca High Court cabilishe ukuti “insambu sha mulwele isha kusalapo ukundapa uko alefwaya shilingile ukucindikwa. Tacali ca mwi funde ukubikamo umulopa.” Misae Takeda bamufutile amadola 4,200.