Bamama na Bashikulu Abaibela

PA KAPAMPA kaba pa mwinshi wa ng’anda ya kwa Gene na Jane palembwapo ati: “Mwaiseni ku Ng’anda ya kwa Mama na Shikulu—Leteni Abana Ilyo Tabalaonaika.”

LELO nga mwaingilamo tamwasangemo inkonkotela shibili nashikala pa fipuna fya bakote. Mwalasangamo umulume no mukashi abacaice kabili aba mapiki aba myaka ya muli ba 40. Gene na Jane balipokelelo mulimo wa nkonkotela uwa kukwata abeshikulu. Gene atila: “Ca cine, ukukwata abeshikulu cishibilo cinono icilangililo kuti uleya ulekota. Lelo e cilambu cimo icifuma mu kukusha abana abengesakufyalila abeshikulu.”

Ipinda lya pa kale litila: “Abeshikulu e cilongwe ca bakote abaume.” (Amapinda 17:6) Ilingi line abeshikulu balatemwana sana no kumfwana sana na banakulwibo na bashikulwibo. Kabili magazini wa Generations atila “abena Amerika abalekwata abeshikulu nabafula sana ukucila kale.” Cinshi cilelenga? Uyu magazini alondolola ati: “Abantu tabalefwa bwangu kabili imikalile ya ndupwa yalyaluka sana. Icipimo ca balefwa no kufyalwa cikalenga amapesenti 75 aya bantu ukukwata abeshikulu . . . , Abengi aba myaka ya pa kati bakwata abeshikulu pa mushinku wa myaka 45.”

Mu fyalo fimo mulesangwa banakulubantu na bashikulubantu abaibela. Abengi aba bene balibimbwamo sana mu mulimo wa kusunga abeshikulu babo. Ku ca kumwenako, umwana mwaume wa kwa Gene na Jane alilekana no mukashi wakwe kabili bonse balikwata insambu sha kusungo mwana wabo. Jane alondolola ati: “Umwana wesu nga aya ku ncito tulashala tulesunga umwishikulu wesu.” Ukufwailisha kumo kwasangile ukuti mu United States, abasunga abeshikulu babo balapoosa mupepi na maawala 14 cila mulungu mu kucite fyo. Cila mwaka ishipooswa kuli uyu mulimo shilafika ku madola amabilioni 29!

Buseko nshi banakulu na bashikulu bakwata ilelo? Mafya nshi bapitamo? Ifipande fikonkelepo fyalalandapo pali aya mepusho.