Ubupe Bwawamisha Ukucila Indalama

KU ULEMBA LOLENI! MU CANADA

Kalemba we lyashi umo alembele mu nyunshipepala ya The Monitor iya ku Bridgetown, ku Nova Scotia ati: “Apeele umwana wakwe ubupe bwawamisha ukucila indalama.” Bwali bupe nshi? Bwali “kumulangilila ubufumacumi bwakwe.”

Anna na mwane umukashana uwe shina lya Tanya, baiminine apo baleshitisha ifipe fyabomfiwapo kabili bashitile icikwama cabuuta ico Tanya engalasendelamo Baibolo wakwe. Ilyo bafikile ku ng’anda, Tanya aiswile icikwama kabili alipapile pa kusangamo indalama amadola 1,000. Apo pene Anna na mwane babwelele kulya bashitile icikwama no kubwekeshamo shilya ndalama ku mwanakashi wabashitishe. Cilemoneke fyo, cilya cikwama cishalebomfiwa sana cali ca kwa nyina kwa uyu mwanakashi uo pashapitile nshita apo afwilile ku bulwele bwa Alzheimer, kabili tabaiswilemo ilyo bashilashitisha. Ulya mwanakashi alitashishe nga nshi ica kuti atile: “Nakulatetekela abantu na kabili . . . Natemwa sana ukwishiba ukuti na nomba kwaliba abafumacumi pa calo.”

Ilyashi lya pa nkupo ilyalandile pa lwa ici mu nyunshipepala lyalimo amashiwi Anna alandile. Atile: “Ifwe e fyo tucita, pantu tuli Nte sha kwa Yehova. [Kampingu] wesu alisambilishiwa na Baibolo. Tufwaya ukusambilishako na Tanya icalungama.” Icikwama ca kwa Tanya icabuuta cakulamucinkulako ulwa kuba umufumacumi.