Icine pa lwa Bamalaika

NGA fintu tumfwile, ifilandwa no kushimikwa pa lwa bamalaika ifili mpanga yonse tafyumfwana lyonse na fintu Baibolo isambilisha. Bushe paliba no mulandu wa kupooselako amano apantu fye tafyumfwana? Bushe mwaliba ububi mu kusumina ifyo abantu basumina pa lwa bamalaika? Cine cine e mo bwaba.

Ku ca kumwenako, natulande pa mibele intu “bumupashi bwishileko” bukoselesha. Ifitabo fya nomba ifilanda pali bamalaika fikoselesha abantu ukuba fye kwati twaice, ukwabula ukuitontonkanishisha. Te lingi bakabelenga bakoseleshiwa ukuipikulwila amafya nelyo ukufwaya ukumfwikisha Baibolo no kwishiba Lesa. Ifitabo filanda pali bamalaika fitukoselesha ukuti twikala na malaika uwaba mupepi na ifwe uwanakilila kabili uwatutemwa kabili tapali ico tufwile ukutiina, pantu twikala mu calo ica nsansa umo fyonse fyaba fye bwino. Nga twaponenwa no bwafya, tukabila fye ukulolela malaika ukwisatwaafwa. Lelo ifyo nge fyo caba, mulandu nshi Baibolo itwebela ‘ukulwila icitetekelo’?—Yuda 3.

Ifitabo filanda pali bamalaika ifingi fitemuna fye icilumba na mataki ya bantu. Filanda fye pali bukaitemwe. Ukulingana ne fi fitabo, balamaika ba shino nshiku bafwaya twishibe fintu twayemba ne fyo tumoneka bwino. Nangu cingati caliwama ukwishiba ukuti twalicindama, icikalamba icaba muli “bumupashi bwishileko” cili kuitemwa we mwine epela. Kalemba umo atila ifunde ilya ntanshi kabili ilikulu lyaba “kuitemwa we Mwine ukuti ni we Shikulu.” Ala ifyo tafyumfwana na mashiwi ya kwa Yesu! Atile: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse.” (Mateo 22:36-39) Tukaba ne nsansa sana nga twatangisha ifyo Lesa afwaya ukucila ifyesu.

Ukucindikisha bamalaika takwaba mu buKristu bwa cine. Umutumwa Paulo atile calilubana ukupepa bamalaika. (Abena Kolose 2:18) Ukupepa kupilibula “ukucindika nelyo ukushinshimuna pamo nga lesa nelyo amaka yacila aya bantunse.” Lelo, ifitabo ifyaseeka ifingi ifilanda pali bamailaka fyena fikoselesha bakabelenga ukucindika no kushinshimuna bamalaika. Nangu cibe fyo, ibukisheni icacitike lintu Satana aebele Yesu ukumupepa. Yesu ayaswike ati: “Ulepepa Sokulu Lesa obe, kabili wene eka e o ulepyungila.” (Luka 4:8) Lintu papitile nshita, ilyo umutumwa Yohane awile ku makasa ya kwa malaika, ulya malaika amwebele ati: “Awe, ico te co! Ndi musha mubiyo, kabili umunabo wa bamunonko abakwato bunte bwa kwa Yesu. Pepa Lesa.”—Ukusokolola 19:10.

Fintu Bamalaika Bengamwaafwa

Untu tufwile ukweba ukuti atutungulule no kutwaafwa ni Lesa, te bamalaika. Atemwa bonse abakonka ifyalungama fintu afwaya. Umutumwa Yohane alembeele Abena Kristu banankwe ati: “Uku e kupama tuli na ko kuli wene, ukwa kuti nga twalomba akantu akalingene no kufwaya kwakwe atuumfwa; kabili nga twaishiba ukuti atuumfwa ico conse tulomba, twaishibo kuti tuli ne fintu ifyo twalomba kuli wene.”—1 Yohane 5:14, 15.

Fingi ifintu ifyo tushaishiba pali bamalaika ba kwa Lesa aba busumino. Lelo twalishiba ukuti babombela Lesa, kabili babomba mu kumfwana ne mifwaile no butungulushi bwakwe. Balicincila mu kubilisha icine pa lwa kwa Lesa. (Ukusokolola 14:6, 7) Tabafwaya ukuti tubapepe. Apo tatubamona te kuti twishibe bwino bwino fintu Lesa ababomfya ku kwaafwalisha abantu bakwe cila bushiku. Lelo twalishiba ukuti Yehova Lesa alacingilila no kutungulula abantu bakwe nge bumba.

Mwandi ca kumwenako cisuma cintu bamalaika ba busumino batwimikila! Balacindika no kulumbanya Lesa. (Amalumbo 148: 2) Nangu cingati balikwatisha amaka lwa mu muntontonkanya na lwa ku mupashi, balicindikisha bumulopwe bwa kwa Yehova. (Yuda 9) Balafwaisha ukumona uko Lesa alefikilisha imifwaile yakwe. (1 Petro1:11, 12) Tusambilila fyonse fi mu Cebo ca kwa Lesa, Baibolo. Ibuuku ilitweba icine pa lwa ba malaika ni Baibolo.

[Amashiwi pe bula 30]

Bamalaika balicincila mu kushimikila icine pa lwa kwa Lesa

[Icikope pe bula 28, 29]

Ilyo umutumwa Yohane afwaile ukupepa malaika, ulya malaika amwebele ati: “Awe, ico te co!”