Ukulingana Na Baibolo

Bushe Umutumikishi Nani?

PA BUSHIKU bwa mfwa ya bulilambo iya kwa Yesu, bacibusa bakwe abapalamisha batendeke ukukansana kukalamba. Luka 22:24 atila, “kwaimine ne fikansa muli bene ifya kuti nani pali bene uwalingwo kubo mukalamba.” Uyu te muku wa kubalilapo abasambi ba kwa Yesu bakansene muli iyi nshila. Ici na kabili calicitikepo imiku ibili ku nshita ya ku numa, kabili Yesu alibalungike.

Fintu cali ica bulanda kuli Yesu ukutendeka ukucinkulako abasambi na kabili pali bulya bushiku bwakakala, ifyo umutumikishi wa Bwina Kristu alingile ukwesha ukuba. Atile: “Lelo umukalamba pali imwe abe ngo mwaice, no uli kateka abe kwati untu amupyungila.”—Luka 22:26.

Tatulingile ukupapushiwa pa mitontonkanishishe yalubana iya batumwa pa lwa bucindami bwa cifulo no kulumbuka. Ilyo Yesu ashilabasambilisha pa lwa ico, abatumwa balemona ifyalecita aba Farise na ba kalemba pa lwa butungulushi bwa mu fya mapepo. Mu cifulo ca kutungilila abantu lwa ku mupashi, aba abatumikishi ba bufi basuminishe ifishilano na mafunde ‘ifisalilo bufumu bwa mu muulu ku cinso ca bantu.’ Bacindikishe ififulo fyabo, kabili balefwaya ukulumbuka, bali bantu abaitemwa abalebomba imilimo “ku kumonwa ku bantu.”—Mateo 23:4, 5, 13.

Umusango Upya uwa Mutumikishi

Nangu cibe fyo, Yesu asambilishe abasambi bakwe umusango upya uwa butumikishi ubwalemenene ku fya ku mupashi. Abasambilishe ukuti: “Lelo imwe mwiitwa Rabi; pantu Kasambilisha wenu umo, na imwe muli ba bwananyina. Kabili mwiita uwa pano isonde, Tata; pantu Shinwe umo, uwa mu muulu; . . . Lelo uuli umukalamba muli imwe akaba kapyunga wenu.” (Mateo 23:8-11) Abasambi ba kwa Yesu tabali na kukonkelesha intungulushi sha mapepo isha muli shilya nshiku. Nga baali no kuba abatumikishi bene bene, balekabila ukupashanya Yesu. Ca kumwenako nshi abashilile?

Baibolo ilingi line ibomfya ishiwi lya ci Greek di a’ko nos ilipilibula “umutumikishi.” Icitabo ca The Encyclopedia of Religion cilondolola ukuti ili ishiwi lilanda pa “kwampana kubapo pa mutumikishi no yo alebombela, talilanda pa kulumbuka iyo: Ukukonka ica kumwenako ca kwa Kristu . . . e kwakatamisha mu kumfwikisha kwa Bwina Kristu ukwa butumikishi.”

Ukulingana no bupilibulo bwa cine ubwe shiwi “umutumikishi,” Yesu aliipeleshe umwine ku kwafwa bambi. Alondolwelele mu kutekanya ukuti, “Umwana wa muntu taishile ku kupyungilwa, lelo ku kupyungila, no kupeelo mweo wakwe icilubula ca pa bengi.” (Mateo 20:28) Yesu abomfeshe inshita yakwe, amaka no kulamuka kwakwe ku kwafwilisha bambi lwa ku mubili na lwa ku mupashi. Mulandu nshi? Umulandu wa kuti alikatilwe inkumbu abantu abalufiwe lwa ku mupashi abaleya ku kumumona. Alefwaya ukubafwa. Ukutemwa kwa cine cine e kwa mulengele ukuba umutumikishi, kabili alefwaya abasambi bakwe ukulangisha imibele imo ine iya bukapekape.—Mateo 9:36.

Mu bumi bwakwe bonse, Yesu aimikile icakumwenako abatumikishi ba ku ntanshi. Atile, “Ukulobolola kwena kukalamba, lelo ababomfi nabacepa. E ico lombeni Umwine wa kulobolola, ku kuleka atume ababomfi mu kulobolola kwakwe.” (Mateo 9:37, 38) Cine cine, abatumikishi ba kwa Yesu bali no kubomba umulimo uyo abantu mwi sonde tabatala abamonapo—ukusansamusha abantunse bonse lwa ku mupashi pa kubashimikila no kubasambilisha pa lwa mbila nsuma ya Bufumu bwa kwa Lesa. —Mateo 28:19, 20.

Ukupoosa amano ku kupeela no kupayanya ifyo bambi balekabila e kwalengele ubutumikishi bwa kwa Kristu ukupusanako nga nshi. Asambilishe abatumwa bakwe ukuba bakabomba, abalondo be sabi lya ku mupashi kabili bakacema ukucila ukuba abatiinya kabili abasoma, abafwala ifya kufwala fyaibela ne fishibilo fyayemba.—Mateo 4:19; 23:5; Yohane 21:15-17.

Ukulingana na Baibolo

Ku ca bulanda, pa myaka iingi aya mano yasuma aya batumikishi aya kuba bakashimikila kabili bakafundisha baipeelesha yalyonawilwe. Icatendeke ngo butumikishi bwa Bwina Kristu, casangwike kamfulumende uutungululwa ne bumba lya ba shimapepo ba bulashi. Ififulo fyalitantikwe kabili balilumbwike no kupeelwa amaka kabili ilingi line balekwata icuma nga nshi. Ici calengele amalekano. Ibumba lya bashimapepo lyalipangilwe ilyaibikilishe maka maka ku kulolekesha pa fya mapepo no kufunda abaluba. Ubwina Kristu bwa mu mwanda wa mwaka uwa kubalilapo bwalyalwike mu myanda ya myaka yapitapo, tabwali mipepele umo umuntu engaba umutumikishi, no kuba imipepele ya bantu fye abanono abasoma, kabili abasuminishiwa ukushimikila no kusambilisha.

Nangu cibe ifyo, Baibolo ishibisha umutumikishi wa Bwina Kristu, ku mibombele yakwe iyabula bukaitemwe, te ku fya kufwala, ifishilano fyapekanishiwa bwino, amalipilo, nelyo icifulo cakwe muli kamfulumende. Umutumwa Paulo alangilile imibele iyo umutumikishi wa Bwina Kristu alingile ukukwata. Abakoseleshe ukukanacita ‘icintu ku matutumuko, lelo mu kupetama.’—Abena Filipi 2:3.

Cine cine Paulo alebombela pa fyo alesambilisha. Alekonke cipasho ca kwa Kristu, talefwaya ‘kumwenamo icisuma umwine, lelo icisuma ca ba cinabwingi, ukuti bapusuke.’ Alyumfwikishe kabili alefwaisha ukubilisha “imbila nsuma ya bupe,” atile, “te kufika ukwapeleela amaka ayo napeelwa mu mbila nsuma.” ‘Talefwaya umucinshi ku bantu.’—1 Abena Korinti 9:16-18; 10:33; Abena Tesalonika 2:6.

We cipasho caibela ica mutumikishi wa Bwina Kristu wa cine cine! Abakonka ica kumwenako cakwe icisuma no kwendela mu nkasa sha kwa Yesu Kristu, ukuipeelesha abene ku kupayanya ukwafwa kwa ku mupashi ne cisansamushi ca mbila nsuma kuli bambi, bailangisha abene ukuti batumikishi bene bene aba kwa Lesa.—1 Petro 2:21.