Ukulingana na Baibolo
Bushe Tulingile Ukusangwa ku Kulongana kwa Bwina Kristu?
“NALEYA ku calici kale, nomba nalileka.” “Lesa kuti wa mupepela konse fye, te ku calici fye.” “Nalisumina muli Lesa na muli Baibolo, lelo nshifwaya ukuya ku calici.” Bushe mwalyumfwako imilandile ya musango yo? Caliseeka ku baitunga ukuba Abena Kristu lelo ukulanda muli uyo musango, na kucilisha mu fyalo fya basungu. Abantu abaleya ku calici kale pali nomba tabatontonkanya ukuti cilakabilwa. Bushe Baibolo ilanda cinshi pa lwa kuya ku calici?
Aya mashiwi ya kuti “icalici” na “amacalici” yasangwa ukucila pa miku 110 mu King James Version. Amabupilibulo yambi nayo yalabomfya aya mashiwi. Ishiwi lya ciGriki ilyapilibulwa ukuti “icalici” lipilibula ukuti “ukwitwa,” nangu, mu mashiwi yambi, ukulonganika abantu. Ku ca kumwenako, Imilimo 7:38, muli King James Version, ilanda pali Mose ukuti ali “mu calici mu matololo,” e kuti, mu luko lwa kwa Israele ulwalongene. Ica kumwenako na cimbi ica mu Malembo cilanda ukuti “ukupakaswa ukwakaluka kwatendeke pe calici,” ici calelosha ku Bena Kristu abali mu Yerusalemu. (Imilimo 8:1, The Jerusalem Bible) Muli kalata umo uo Paulo alembele, aposeshe “icalici ilyali mu ng’anda ya kwa [Filemone],” icilonganino ca cikaya icalekumanina pali ici cifulo.—Filemone 2, Revised Standard Version.
Ukwabulo kutwishika, ili shiwi lya kuti “icalici” nga fintu lyabomfiwa muli Baibolo limininako, ibumba lya bakapepa, te cifulo ca kupepelamo iyo. Pa kusuminisha ici, Clement wa ku Alekesandria, kasambilisha uwa mipepele uwa mu mwanda wa myaka walenga bubili, alembele ukuti: “Te cifulo ico ndeita ukuti e Calici, lelo cilonganino ca basalwa.” Nalyo line, bushe Abena Kristu balingile ukusangwa pa cifulo cimo nangu icikuulwa pa kuti ukupepa kwabo kupokelelwe na Lesa?
Ukupepa mu Luko lwa kwa Israele
Ifunde lya kwa Mose lyafwaile ukuti abaume bonse aba ciYuda basangwe pa cifulo cimo ku mitebeto itatu iya mu mwaka. Abanakashi abengi kumo na bana balesangwako. (Amalango 16:16; Luka 2:41-44) Pa nshita shimo bashimapepo na bena Lebi basambilishe inkuta, ilyo balebelenga ukufuma mu Malango ya kwa Lesa. ‘Balelondolola, no kushilimuna, no kuleka beluke icabelengwa.’ (Nehemia 8:8) Mu myaka ye Sabata, ubutungulushi bwa kwa Lesa bwatile: “Kuutanyeni abo bantu, abaume na banakashi na baice, na balebeshi benu abali mu mpongolo shenu, ku kuleka bomfwe kabili ku kuleka basambilile, no kutiina Yehova Lesa wenu no kwangwo kucite fyebo fyonse fya malango aya.”—Amalango 31:12.
Ni pe tempele fye lya mu Yerusalemu e po umo aletuula amalambo kuli Lesa no kusambilishiwa kuli bashimapepo. (Amalango 12:5-7; 2 Imilandu 7:12) Mu kuya kwa nshita, amayanda ya kupepelamo yambi yalimikwe mu Israele—ayali masunagoge. Aya masunagoge yali fifulo umo balebelenga Amalembo no kupepelamo. Nangu cibe fyo, itempele lya mu Yerusalemu lyali e cifulo cikalamba ica kupepelamo. Ici calilandwapo na Luka kalemba wa Baibolo. Alumbwile umwanakashi wa cikoloci uwe shina lya Ana, “[uushalepuswa, NW] pe tempele ubushiku na kasuba alepyungila Lesa, ukuleko kulya kabili ukupepa.” (Luka 2:36, 37) Ukupepa mu cine pamo pene na bambi abaipeele cali e cacindamishe mu mikalile ya kwa Ana. AbaYuda na bambi abatiina Lesa bakonkele imikalile imo ine.
Ukupepa kwa Cine pa Numa ya Mfwa ya kwa Kristu
Pa numa ya mfwa ya kwa Yesu abasambi bakwe balilubwilwe ku Malango ya kwa Mose, kabili tabalefwaikwa ukulapepela pe tempele. (Abena Galatia 3:23-25) Nalyo line, balitwalilile ukulongana pamo mu kupepa na mu kusambilila Icebo ca kwa Lesa. Tabakwete ifikuulwa fya lulumbi, lelo balelonganina mu mayanda yabo na mu fifulo fya cintubwingi. (Imilimo 2:1, 2; 12:12; 19:9; Abena Roma16:4, 5) Kulya kulongana kwa Bwina Kristu ukwa mu mwanda wa myaka uwa kubalilapo, kwali ukwayanguka, takwali kukumana kwalebamo kusefya.
Pali uku kulongana ifishinte fya Baibolo ifyo basambilishe fyalipusene ne mibele yabipa iya Buteko bwa ciRoma. Abasumina bamo abasangilweko pa muku wa kubalilapo balebilisha abati: “Lesa aba muli imwe cine cine.” (1 Abena Korinti 14:24, 25) Icine cine, Lesa ali muli bene. ‘E ico inkuta [“amacalici,” RS, JB] shalekoshiwa mu citetekelo, shalesanduluka impendwa ubushiku no bushiku.’—Imilimo 16:5.
Bushe Umwina Kristu pali ilya nshita kuti asenaminwa na Lesa ukupitila mu kupepa mu matempele ya cisenshi nangu ukupepa eka? Baibolo ilalondolola bwino uyu mulandu: Bakapepa abasuminishiwe bali mu calici lya cine, atemwa icilonganino, bali “umubili umo” uwa bakapepa ba cine. Aba bali basambi ba kwa Yesu, abaishibikwe ukuti Abena Kristu.—Abena Efese 4:4, 5; Imilimo 11:26.
Ni Shani Pali Lelo?
Ukucila ukutukoselesha ukupepela mu cikuulwa, Baibolo itukoselesha ukupepela pamo na ba mu calici, “ulukuta lwa kwa Lesa wa mweo,” abantu ‘abamupepela mu mupashi na mu cine.’ (1 Timote 3:15; Yohane 4:24) Ukulongana pamo mu kupepa ukwasuminishiwa na Lesa kufwile ukusambilisha abantu “imibele ya mushilo kabili iya bukapepa.” (2 Petro 3:11) Ukulongana kufwile ukwafwa abasangwako ukuba Abena Kristu bakosoka, ‘abengapaatululo busuma ukubulekanya no bubi.’—AbaHebere 5:14.
Inte sha kwa Yehova balatukuta ukukonka ica kumwenako ca Bena Kristu ba mu mwanda wa myaka uwa kubalilapo. Ukucila pa filonganino 91,400 mwi sonde lyonse balalongana lyonse mu kusambilila Baibolo no kukoseleshanya, ukucitile fyo mu Mayanda ya Bufumu, mu mayanda yabo, ne fifulo fimbi. Ici cumfwana na mashiwi ya mutumwa Paulo aya kuti: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana.”—AbaHebere 10:24, 25.