Insansa Ishaba Mu Kutambe Fyuni

IFYO isonde lingabe lyapusanako nga tamwali ifyuni! Ukulila kwa fyuni, ukwimba kwa fyuni, imimonekele no kupupuka kwa fiko—fyonse filange misango yapusanapusana iya kuyemba kwa bumi. Lelo bushe miku inga tukutika ku fyuni no kufitamba? Nga mwikala mu musumba umwabe congo lyonse ne congo ca bamotoka, limbi te kuti mumone ne fyuni ifyabela mu ncende mwikala. Nangu nga mwikala ku cifulo cimbi, calyanguka ukukanapoosa amano ku fyuni. Lelo bushe kuti mwatemwa ukumwensekesha ifyuni ifyabela mu ncende mwikala?

Kuti mwacite fyo nga mwapanga apakulile fyuni mupepi ne windo ilya lukungu lwa ng’anda yenu. Lyena, ico mwingakabila ni binocular (Ica kumwenamo icipalamika ifili apatali) fye na kamela umusuma uukusha ifili apatali—no kutekanyako panono! Mulingile ukuteyanya amafilimu ne citabo icilanga bwino bwino umusango wa cuni. Lyena kuti mwamwensekesha, ukukutika, no kuipakisha!