Icisansamushi ku Baleloosha

UKUSANSA kwa tupondo ukwacitike pa September 11, 2001, mu New York City na mu Washington, D. C., ku United States of America, kwatiinishe abantu mwi sonde lyonse. Mu bushiku fye bumo, amakana ya bantu balifwile, ukusanshako abashimyo mulilo, bakapokola, na bafwilishako ukuundapa.

Ukutula apo cilya cacitikila, Inte sha kwa Yehova shalibombela capamo ku kusansamusha abafwilwa abatemwikwa babo muli bulya busanso. Ico bacitile fi ni ku “kukakililako abafunaike misana” no “kusansamusha bonse abaloosha.”—Esaya 61:1, 2.

Mu kupita kwa myaka, Inte sha kwa Yehova basanga ukuti abafwilwa abatemwikwa babo ilingi line balatontonkanya pa mepusho yakonkapo. Baibolo yalikwata ifyasuko. Mulandu nshi mushingabelengela Amalembo yali pe samba muli Baibolo wenu?

Bushe calilembwa apo umuntu akafwila?

Pali Lukala Milandu 9:11, Baibolo itila “inshita ne ca mankumanya” fiponena abantunse bonse. Nga ca kuti calimulembelwe apo umuntu akafwila, mulandu nshi Baibolo itwebela ukusakamana pa kucincintila amasanso?—Ku ca kumwenako, moneni Amalango 22:8.

Mulandu nshi tufwila?

Abantunse ba kubalilapo babili, Adamu na Efa, babikilwe muli paradise wa pe sonde. Abatwalilila ukuba ne cumfwila, nga tabafwile. Imfwa yali no kwisa fye nga abantunse bakaana ukumfwila Lesa. (Ukutendeka 1:28; 2:15-17) Ku ca bulanda, Adamu na Efa balipondokele Kabumba wabo. Ico calengele balipile icilambu ca lubembu—imfwa. Apo abantunse bonse bafuma kuli Adamu na Efa, bonse balipyana ulubembu ne mfwa. Baibolo ilondolola ati: “Ulubembu lwaingilile mu muntu umo [Adamu] pano isonde, ne mfwa yaingilile mu lubembu; e fyo ne mfwa yayambukile ku bantu bonse.”—Abena Roma 5:12.

Bushe abafwa baba mu mibele nshi?

Ilyo Adamu apondweke, Lesa atile: “[Ukabwelela] ku mushili umo wabuulilwe; pantu uli lukungu, kabili ku lukungu e ko ukabwelela.” (Ukutendeka 3:19) E ico, imfwa kukanaishiba akantu nangu kamo—ukukanabako. Baibolo itila: “Aba mweo bantu abaishibo kuti bakafwa, lelo abafwa bantu abashaishiba kantu nangu kamo.” (Lukala Milandu 9:5) Baibolo isosa no kuti ilyo umuntu afwa, “abwelela ku mushili wakwe, ubushiku bulya bwine yaloba amatontonkanyo yakwe.”—Amalumbo 146:3, 4.

Bushe lisubilo nshi ilya bafwa?

Baibolo isokolola ukuti caba kufwaya kwa kwa Lesa ukubwesha abafwa ku bumi ukupitila mu kubabuusha muli paradise wa pe sonde, umo ukulwala ne mfwa tafyakabeko kabili iyo. Yesu atile: “Inshita ileisa, iyo bonse aba mu nshishi bakomfwamo ishiwi lyakwe, no kufumamo.”—Yohane 5:28, 29; Ukusokolola 21:1-4.

Ilyo Yesu alelanda pali cibusa wakwe Lasaro, uyo papitile fye nshiku shinono apo afwilile, alingenye imfwa ku tulo. (Yohane 11:11-13) Kabinge, pa numa Yesu amubuushishe, Lasaro tashimikepo ukuti ali ku cifulo cimo alecululuka nelyo ukuti aali ku cifulo cimo icisuma sana pali ilya nshita inono ali uwafwa. (Yohane 11:37-44) Cine cine teti ashimikepo, pantu abafwa tabaishiba nangu kamo. Tabacululuka lelo bapembela “inshita” ilyo bali no kubuushiwa. Icacindamisha ca kuti, apo Yesu abuushishe Lasaro cilangililo ca kuti abafwa kuti baba no mweo na kabili. Cine cine, kuli ici cipesha amano Yesu alangile fye panono ifikacitika mwi sonde lyonse ilyo Ubufumu bwa kwa Lesa bukateka. (Imilimo 24:15) Fintu ico cisansamusha abalufya abatemwikwa babo mu mfwa muli shino nshita shayafya!