Balanonsha Abekala Calo

ULEMBA LOLENI! MU SPAIN

PA MYAKA iingi nga nshi abalashi ba mu misumba ya mu Spain balisungako impanga ya kukuulapo ifikuulwa fya mapepo. Amabuteko ya mu misumba yasumine ukuti amapepo kuti yanonsha abekala calo. Apo buKatolika bwali e calici lya Buteko, ukutendeka kale na kale ishi mpanga shalepeelwa fye kwi Calici lya Katolika. Lelo ifintu fyalyaluka.

Mu 1980 ifunde lya mu Spain ilyaleteleko ubuntungwa bwa maipepele lyalondolwele ati “takuli icalici limo ilili no kuba e calici lya Buteko.” Ici calenga abalashi bamo aba mu misumba ukutasha umulimo ubombwa ne Nte sha kwa Yehova. Pa kulangilila uku kutasha, balibapeela impanga ya kukuulapo Amayanda ya Bufumu.

Abalashi mu misumba yapusanapusana basoso kuti uku kupeela impanga ku Nte kwalilinga pantu “umulimo wa [Nte] wa kusambilisha,” kabili “ulanonsha abekala calo.” Abalashi mu misumba imbi balilanda pa “bucindami bwa kuba ne Nte sha kwa Yehova mu musumba” e lyo no “mulimo wabo uushili wa kupangilamo indalama.”

Amayanda ya Bufumu ayengi yalikuulwa mu nshiku fye shibili ukubomfya imikuulile yaibela iya mabumba ya bakabomba ba kuitemenwa Inte. Mwine mushi wa musumba wa La Línea, uwabela pa kati ka kapinda ka ku kulyo na masamba ya Spain, atile: “Nintemwa sana pa kuipeelesha kwa bakabomba ba kuitemenwa, kabili ndemona kwati tulingile ukubatungilila. E mibele ifwaikwa sana muli cino calo umwaba amalekano.” Aitile Ing’anda ya Bufumu iipya ati “icishibilo ca kubombela pamo.”

Abena mupalamano na bo balimona ubu bwananyina. Ilyo kwali ukukuula Amayanda ya Bufumu yabili aya munkulinkuli mu Vitoria, ku kapinda ka ku kuso aka Spain, mu Marian, uwikala lwa mupepi, atile: “Nga ca kuti bonse bakwete ukutemwa kwa musango yu, teti kube amafya aya tuculako.” Pa numa ya kumona ubukuule, kashila-ng’anda wa kuli yo ncende atile: “Ndefwaya ukuba Inte ya kwa Yehova pa kuti na ine nkasekeleleko nga fintu muselekelela!”

Mu musumba wa Zaragoza, pa kati ka kabanga na kapinda ka ku kuso aka Spain, abalashi bapeele Inte incende yakula amasikweya mita 600, ukwabula ukubalipilisha. Inyunshipepala ya muli uyu musumba yatile uku balekuula “Inte sha kwa Yehova babomba ngo tunyelele utubombela capamo.” Abena mupalamano balisengele bakabomba. Umo pali aba atile: “Bashimapepo balampwisha icitetekelo, lelo imwe mwambwesesha icitetekelo candi.”

Inte balatasha pa kwafwa kwa bena mupalamano na balashi pa kubatungilila mu kukuula ififulo fya kupepelamo. Bapampamina pa kubomfya Amayanda yabo aya Bufumu ku mulimo wawamisha uwa kusambilisha abekala mushi—e kuti umulimo wa kushimikila no kusambilisha Icebo ca kwa Lesa.

[Icikope pe bula 31]

La Línea, Cádiz, Spain