Ukulingana na Baibolo
Bushe Lesa Alapaala Abantu Ukuba Ne Fyuma?
“Ipaalo lya kwa Yehova lyene lilacindamika, kabili talundako ukulungulula.”—AMAPINDA 10:22.
BUSHE ilembo lya mu Baibolo ilyambwilwe pa muulu lipilibula ukuti Lesa alapaala ababomfi bakwe ukuba ne fyuma? Abantu bamo e fyo basumina. Langulukeni ukutunga kwa kwa kalemba umo kabili shimapepo we calici lya Pentecostal ilya ku Australia, uwatile: “Mu citabo [candi] nalamweba umulandu uo mukabila ukukwatila indalama ishingi na kabili nalamweba ifyo mwingashisanga . . . Nga kuti mwaalula ifyo mutontonkanya no kuba ne mibele yalinga ukulola ku ndalama, Lesa akamupaala ukuba ne fyuma ica kuti tamwakabepo no bwafya mu fya ndalama na kabili.”
Ukutunga kwa musango uyu kupilibulo kuti abapiina tabasenaminwa na Lesa. Bushe ukuba ne cuma kulangililo kuti umuntu cine cine alipaalwa na Lesa?
Umulandu Lesa Apaalile Bamo Ukuba ne Fyuma
Mu Baibolo mwaliba ifya kumwenako fya babomfi ba busumino aba kwa Lesa abo apaalile ukuba ne fyuma. Ku ca kumwenako, lintu Yakobo afumine ku mwabo ali fye ne nkonto yakwe lelo pa numa ya myaka 20 abwelele ne mpaanga ishingi, ne ng’ombe ne mpunda ukupanga amabumba yabili. Ukulingana na Baibolo, ifyuma Yakobo akwete fyali bupe ukufuma kuli Lesa. (Ukutendeka 32:10) Ica kumwenako na cimbi ca kwa Yobo. Alilufishe ifikwatwa fyakwe fyonse, lelo pa numa Yehova alimupaalile ica kuti akwete “impaanga ne mbushi amakana ikumi na yane [14,000], ne ngamali amakana mutanda [6,000], ne ng’ombe shilume isha makoli ikana limo [1,000] shibili shibili, ne mpunda nkota ikana limo.” (Yobo 42:12) Yehova apeele Imfumu Solomone ifyuma ifingi sana ifyaba no lulumbi ukufika na lelo.—1 Ishamfumu 3:13.
Mu Baibolo na kabili mwaliba amalyashi ayengi aya bakapepa ba kwa Lesa aba busumino kabili abacumfwila abaali abapiina. Kwena, Lesa talekanda ababomfi bakwe bamo ukuba abapiina na bamo ukubapaala ne fyuma. Mulandu nshi lyene, uo Lesa alepeelela bamo ifyuma?
Ifyasuko fyalilekanalekana. Kuli Yakobo ukuba ne fyuma kwaimike umufula wa kupangilapo uluko, ukupekanishisha ukwisa kwa Lubuto lwalaiwe. (Ukutendeka 22:17, 18) Ifyuma fya kwa Yobo fyalangile apabuuta uwalengele Yobo ukucula, na muli fyo ukushisha ishina lya kwa Yehova. (Yakobo 5:11) Solomone wena abomfeshe ifyuma ifingi ifyo Lesa amupeele ukukuulila itempele lyapuulama nga nshi. (1 Ishamfumu 7:47-51) Ku ca buseko, Yehova na kabili abomfeshe Solomone ukulemba ifyo ubucindami bwa ifyuma bwapeleela.—Lukala Milandu 2:3-11; 5:10; 7:12.
Ifyo Lesa Atupaala
Yesu afundile abakonshi bakwe ukukwata imibele yalinga ukulola ku ndalama ilyo abebele ati ‘mwilasakamikwa’ pa lwa fikwatwa. Apelulushenye nabo ukuti na Solomone mu bukata bwakwe bonse tafwelepo nga limo ilya maluba ya mu mpanga. Na lyo line, Yesu atile: “Nomba nga e fyo Lesa afwika ifimenwa fya mu mpanga, . . . bushe takacilepo ukufwika imwe, mwe ba citetekelo cinono?” Yesu aebekeshe Abena Kristu ati nga ca kuti abakonshi bakwe bafwaya intanshi Ubufumu no bulungami bwa kwa Lesa, lyene ifya kulya, ifya kufwala, no mwa kwikala fikalundwako kuli bene. (Mateo 6:25, 28-33) Bushe ubu bulayo bufishiwapo shani?
Lintu ukufunda kwa mu Baibolo kwakonkwa, ififumamo mapaalo ya ku mupashi. (Amapinda 10:22) Lelo, mwaliba ubunonshi na bumbi. Ku ca kumwenako, Icebo ca kwa Lesa cikambisha Abena Kristu ukuti: “Uwibile eiba kabili, lelo abombeshe.” (Abena Efese 4:28) Na kabili cisoso kuti “iminwe ya wa bulamu ilengo kubulwa, lelo iminwe ya wacincila ilacindamika.” (Amapinda 10:4) Abena Kristu ba bufumacumi, ababombesha no kukonka uku kupanda amano balatemwikwa pa ncito. Ili kuti lyaba lipaalo.
Baibolo na kabili ifunda Abena Kristu ukutaluka ku kuteye fyangalo fya cela mushuke ukwaba bufunushi, ukutaluka ku kuikowesha kwaba mu kupeepa fwaka, no kukolwa pantu kulatembula. (1 Abena Korinti 6:9, 10; 2 Abena Korinti 7:1; Abena Efese 5:5) Abakonka uku kupanda amano balacefyako ifipooswa kabili ubutuntulu bwa bumi bulawaminako.
Ifyaumo Mutengo Ukucila Silfere Nelyo Golde
Na lyo line, ifyuma fya ku mubili te kuti fibe e bushininkisho fye ubwa kuti Lesa alabekelwa mu muntu nelyo ukumupaala. Ku ca kumwenako, Yesu asansalike ubupiina bwa ku mupashi ubwa Bena Kristu ba mu Laodikea ilyo abebele ati: “Utila ‘Ndi mukankaala kabili nalinonka ifyuma kabili nshikabila kantu nangu kamo,’ lelo tawaishiba ukuti uli wa nkumbabulili kabili umulanda kabili umupiina kabili impofu kabili uwa bwamba.” (Ukusokolola 3:17) Lelo, ku Bena Kristu ba mu Smurna abapiina lwa ku mubili lelo abatuntulu lwa ku mupashi, Yesu atile: “Nalishiba ubucushi bobe no bupiina bobe—lelo uli mukankaala.” (Ukusokolola 2:9) Aba Bena Kristu bafwile balipakeswe no kucula ku bupiina pa mulandu wa busumino bwabo, lelo balikwete ifyuma ifyaumo mutengo ukucila silfere nelyo golde.—Amapinda 22:1; AbaHebere 10:34.
Yehova Lesa alapaala ukubombesha kwa batukuto kucita ukufwaya kwakwe. (Amalumbo 1:2, 3) Alabapeela amaka ne fya kubafwa ukupwisha amafya, ukupayanisha indupwa shabo, no kufwaya intanshi Ubufumu bwakwe. (Amalumbo 37:25; Mateo 6:31-33; Abena Filipi 4:12, 13) E co, ukucila ukumona ifyuma fya ku mubili nge nshila ikalamba Lesa apaalilamo abantu, Abena Kristu ba cine batukuto “kuba abakankaala mu milimo isuma.” Lintu Abena Kristu balundulula bucibusa bwapalamisha na Kabumba, “baibakila abene umufula usuma uwa ku ntanshi.”—1 Timote 6:17-19; Marko 12:42-44.