Ukulingana Na Baibolo
Bushe Cine Cine Yesu Aali Mwana wa kwa Lesa?
UMUTUMWA Petro aebele Yesu ukwabula no kutwishika ukuti: “Ni mwe Kristu, Umwana wa kwa Lesa wa mweo.” (Mateo 16:16) Mu Baibolo mwaba amalembo ayengi ayalanda ukuti Yesu Mwana wa kwa Lesa. Kabili aya mashiwi yalilenga abantu abatemwa ifya mapepo ukulandapo ifyapusanapusana.
Abengi abasumina ukuti Yesu Kristu ni Lesa cilabakosela ukulondolola umulandu etilwa ukuti Mwana wa kwa Lesa. Ifishinka filanga ukutila te kuti abe Lesa kabili pa nshita imo ine abe Umwana wa kwa Lesa. Bambi batontonkanya ukuti Yesu muntu uwacindama sana mu lyashi lya bantunse, ukuti aali wa mano, kabili ukuti afwile ukuba ni kasesema wa kwa Lesa uwa cine, nomba tali Mwana wa kwa Lesa iyo. Bushe cinshi Baibolo isambilisha pali Yesu? Bushe ifyo mwasumina pali ili lyashi fyalicindama?
Ibeli lya kwa Lesa
Baibolo itila kwali inshita imo ilyo Lesa ali fye eka. Pa mulandu wa kutemwa kwakwe, aishileba umufyashi, ilyo apeeleko ubumi ku fibumbwa fimbi, lelo ubufyashi bwakwe tabwali nga filya caba ku bantu. Lelo ena abomfeshe amaka yakwe aya cipesha mano ukupanga icibumbwa ca mweo, ica mano kabili ica mupashi, “ukutendeka kwa bubumbo bwa kwa Lesa,” uo ifwe twaishiba nomba ukutila Yesu Kristu. (Ukusokolola 3:14; Amapinda 8:22) Pa mulandu wa kuti Yesu abumbilwe mu kulungatika ilyo Lesa ali fye eka, alilinga ukwitwa ukuti “umwana wafyalwa eka” kabili ‘ibeli ku cibumbwa conse.’—Yohane 1:14; Abena Kolose 1:15.
Kanshi, apo Yesu e wa ntanshi ukubumbwa pali fyonse, te kuti abe e Kabumba iyo, te kuti abe “Lesa eka fye.” (1 Timote 1:17) Lelo, Lesa apeele Umwana wakwe imilimo iingi. Ku ca kumwenako, ukubomfya Yesu, Lesa abumbile “fyonse fimbi” ukubikapo fye na bamalaika. Aba bamalaika betwa “abana baume ba kwa Lesa,” kabili na bo bene ni Yehova e wabapeele ubumi.—Abena Kolose 1:16; Yobo 1:6; 38:7.
Pa numa ya kubumba isonde ukuti abantu bekalemo, Lesa afwile aleeba Umwana wakwe umwaume uwali ibeli, ukuti: “Natucite umuntu mu cata cesu.” (Ukutendeka 1:26; Amapinda 8:22-31) Mu kuya kwa nshita, Yehova abumbile umuntu wa kubalilapo, umwana mwaume wa kwa Lesa Adamu, kabili pa kubumba Adamu, Lesa abomfeshe icibumbwa ca ku mupashi uwaishileba Yesu.—Luka 3:38.
Yesu Aaba Umwana wa kwa Lesa Umuntunse
Umutumwa Yohane asosele ukuti pa nshita yalingwa, Umwana wa kwa Lesa uwa bumupashi “aishileba umuntunse no kwikala na ifwe.” (Yohane 1:14) Pa kuti Yesu afume muli bumupashi no kwisaba umuntunse, Lesa mu cipesha amano akuushishe ubumi bwakwe ukubufumya mu muulu ukububika mwi fumo lya mukashana nacisungu umuYuda Maria. Pali uyu mulandu, Yesu atwalilile ukuba Umwana wa kwa Lesa, nangu ca kuti ali muntunse. Kabinge, Yesu afyelwe uwapwililika kabili uwabulo lubembu pantu Lesa umwine e wamupeele ubumi, te muntunse nangu umo. Malaika Gabriele aebele Maria ukuti: ‘Icikafyalwa ciketwa ica mushilo, Umwana wa kwa Lesa.’—Luka 1:35; AbaHebere 7:26.
Wishi umwine e wapeele ubunte bwa kuti Yesu Mwana wakwe ilyo Yesu aali umuntunse pano isonde. Ilyo Yesu alebatishiwa, Yohane Kabatisha alimwene imyulu yacenama kabili aumfwile ne shiwi ukufuma mu muulu aliti: “Uyu e Mwana wandi, uwatemwikwa, uo mbekelwamo.” (Mateo 3:16, 17) Kanshi teti tupape ukuti Yohane aebele abasambi bakwe ati: “Naumona, nacita no bunte ukuti uyu e Mwana wa kwa Lesa.”—Yohane 1:34.
Ilyo Yesu alebomba ubutumikishi bwakwe pe sonde, talesabankanya fye apali ponse ukuti e Mesia, Umwana wa kwa Lesa. (Marko 8:29, 30) Ilingi alefwaya ukuti abantu abene beluke ukuti Mwana wa kwa Lesa nga baumfwa ifyo alesambilisha, ukumona imikalile yakwe, no kumona ifipesha amano ifingi ifyo alecita. Kabili ifipesha amano ifingi aleficitila pa bantu abengi. Ku ca kumwenako, aposeshe “bonse abalelwala, abalecushiwa ku malwele yalekanalekana no kulungulushiwa.” (Mateo 4:24, 25; 7:28, 29; 12:15) Impofu, bankomamatwi, abalemana na balwala bonse baleisa kuli Yesu kabili alebaposha. Abuushishe fye na bafwa! (Mateo 11:4-6) Yesu mu cipesha mano aendele pa menshi, ninshi na basambi bakwe balemonako, kabili atalalike amabimbi pali bemba ilyo kwali icikuuku icikalamba. Ifi Yesu alangile aya maka fyalengele abasambi bakwe ukusosa ukuti: “Cine cine, ni mwe Mwana wa kwa Lesa.”—Mateo 14:24-33.
Ifyo Umwana wa kwa Lesa Engamwafwa
Mulandu nshi Lesa akuushishe Umwana wakwe uwatemwikwa ukumufumya mu muulu ukumuleta pano isonde no kuleka aisafwa imfwa ya bunkalwe? “Ukuti onse uumutetekela eonaika lelo abe no bumi bwa muyayaya.” (Yohane 3:16) Yesu alingile fye ukufwa pa kuti ‘apeele umweo wakwe icilubula ku kukabulamo abengi.’ (Mateo 20:28) Cine cine, takwaba nangu umo uwaba no kutemwa kukalamba ku bantunse ukwacila pa kutemwa kwa kwa Yehova no Mwana wakwe ibeli.—Abena Roma 8:32.
Pa numa ya mfwa yakwe, Yesu “abililwe ukuti Mwana wa kwa Lesa” mu nshila yaibela nga nshi kabili iya maka, “ukupitila mu kubuushiwa ku bafwa,” ukuba na kabili Umwana wa ku mupashi uwa kwa Lesa. (Abena Roma 1:4; 1 Petro 3:18) Lyena, pa numa ya kulolela mu kutekanya ku kulyo kwa kwa Wishi mupepi ne myaka 1,900, Yesu apeelwe amaka ya kuba Imfumu ya Bufumu bwa kwa Lesa—ubufumu bwa ku muulu ubuli no kuteka isonde lyonse nomba line fye.—Amalumbo 2:7, 8; Daniele 7:13, 14.
Bushe mulafwaya ukuti uyu Mwana wa kwa Lesa uwa maka akamutemwe? Nga mulafwaya, tulemukoselesha ukusambilila amasambilisho yakwe no kucita ifyo fine mwasambilila. Yesu umwine atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) Ca cine, ifyo umo asumina pa Mwana wa kwa Lesa fyalicindama nga nshi!—Yohane 3:18; 14:6; 1 Timote 6:19.
BUSHE MWALITONTONKANYAPO UKUTI:
◼ Bushe Yesu aba shani e Mwana wafyalwa eka uwa kwa Lesa?—Yohane 1:3, 14; Ukusokolola 3:14.
◼ Cinshi mwingasuminina ukuti Yesu Mwana wa kwa Lesa?—Mateo 3:16, 17.
◼ Kuti mwamwenamo shani mu kwishibo kuti Yesu Mwana wa kwa Lesa?—Yohane 3:16; Yohane 14:6; 17:3.
[Ifikope pe bula 26, 27]
Amasambilisho ya kwa Yesu ne fipesha mano ifikalamba acitile fyashininkishe ukuti aali uwaibela