Icitetekelo ca Mwaice
DUSTIN atendeke ukulasangwapo limo limo pe sambililo lya Baibolo ilyo banyina balesambilila ne Nte ya kwa Yehova. Nangu ca kuti ali fye ne myaka 11, aletontonkanya sana kabili aleipusha ifipusho fya mano. Ukwabula no kupoosa inshita alandile ukuti na o alefwaya ukulasambillila Baibolo no wali kale mishonari uwalesambilisha banyina. Atendeke no kwebako abana be sukulu banankwe ifyo alesambilila.
Dustin tapoosele na nshita, alitendeke ukulaya mu kulongana ku Ng’anda ya Bufumu, alitampile no kulalandapo pa kulongana nga kuli ukulanshanya kwe bumba. Ilyo ena pamo na baice bakwe batatu baile mu kumona bawishi aba bafyalilila, bawishi balikoselepo ukuti baye na bo ku calici ku mwabo. Ilyo Dustin alondolwele umulandu asalilepo ukuya ku Ng’anda ya Bufumu ukucila ukuya ku calici. Bawishi balisumine kabili balandile ukuti bamusuminisha ukuya.
Bushiku bumo ilyo bapwishishe ukulongana icungulo, banyina Dustin tabamumwene. Ukwabula no kweba banyina, aile fye kuli kangalila we Sukulu lya Butumikishi ku kulembesha mu sukulu. Banyina balisumine. Alitemenwe icine cine kabili alelolela fye ukumona ilyo bakamupeela ilyashi lya kubalilapo. Kwena nangu cali fyo, pa nshita imo ine atampile ukulaumfwa sana ubutanshi mu lutungu, kabili balimutwele kuli badokota abalekanalekana pa kuti basange icalemucusha. Awe mukwai, no bushiku bwa kulanda ilyashi lya kubalilapo mu Ng’anda ya Bufumu ubo Dustin alefwaisha bwasuka bwafika. Pali iyi nshita, aleendela fye ku nkonto sha mu maapa. Nangu ca kuti alekalipwa nga nshi, aile fye ku cisebele ukwabula ne nkonto.
Tapapitile na nshita, Dustin balimwikete na kansa ya mu mafupa. Uyu musango wa ubu bulwele tabwaseeka sana. Mupepi no mwaka onse fye ali fye mu cipatala ca baice ica mu San Diego, ku California. Balyeseshe imiti iyalekanalekana, kumo ne myengelele ya lubuto lwa bamashini, awe nakalya mpaka fye bamuputwila ukulu konse ukwa ku kulyo mu nyumbi. Kabili ukulu kwashele fye icishinkitwa lelo ico tacashimishe citetekelo cakwe icakosa no kutemwa Yehova. Ilyo ashakwete amaka ya kubelenga, banyina e balemubelengela pantu ilingi tabalemusha eka.
Nangu ca kuti ubulwele bwa kwa Dustin bwaleya fye pa ntanshi, tabalile ailishanya. Kabili taleikala fye, aleya fye aleisunka mu mupando wakwe uwa mipeto alekoselesha abalwele bambi kumo na bafyashi babo, ukubikako na Nte umo uwalelwala. Ababomfi ba mu cipatala balimwene ukuti Dustin na ulya Nte umulumendo, bali abaibela—balimwene ukuti icitetekelo cabo calebakosha.
Dustin alefwaya ukubatishiwa. Ilyo baeluda ba mu cilonganino balemwipusha ifipusho ifyo Inte sha kwa Yehova bepusha abalefwaya ukubatishiwa, aleele fye mu cipuna, pantu takwete amaka. Pa October 16, 2004, ilyo ali ne myaka ya kufyalwa 12 na hafu, Dustin alibatishiwe pa kulongana kwa muputule.
Ilyo ilyashi lya lubatisho lyali mupepi no kutendeka, Dustin baile balemukunkulusha mu cipuna ca mipeto pa kuti ekale pamo na banankwe abaleya mu kubatishiwa. Ilyo abaleya mu kubatishiwa babebele ukuti beminine, Dustin aiminine fye no kuulu kumo. Afwele suti iisuma nga nshi, kabili aikatilile fye ku kuboko kwa cipuna pa kuti ashangile. Pa kwasuka amepusho ya lubatisho alisanswile shiwi, ilyaololoka kabili ilyaumfwika. Balupwa ba kwa Dustin bonse eko baali ukubikako na bawishi abamufyele e lyo na banyina bambi abo bawishi baupile. Ababomfi ba ku cipatala na bafyashi abo abana babo balwele kansa na bo bene balishile ukufuma ku cipatala.
Papitile fye ubushiku bumo apo Dustin abatishiwilwe, na kabili alibwelele mu cipatala. Kansa yali naisalangana kale mu mafupa yonse mu mubili. Ilyo amaka yaile yalepwa kabili aishiba no kuti ali no kufwa, aipwishe banyina ukuti balandepo nga ca kuti ali no kufwa. Banyina batile, “mulandu nshi uleipushisha, bushe uletiina ukufwa?”
Na o atile: “Iyo. Kabili nkashibata fye, kabili nga naisashibatuka pa kubuuka ku bafwa, cikamoneka kwati nacishibata fye pa kashita akanono. Nshakalecula na kabili.” E lyo alondolwele ukuti, “Nsakamene fye ba lupwa wandi.”
Dustin afwile umweshi wakonkelepo. Ku lyashi lya cililo cakwe kwali badokota, banasi, balupwa wa babomfi ba mu cipatala, bakafundisha, abena mupalamano e lyo kabili na balupwa ba kwa Dustin Inte sha kwa Yehova na bashali Inte sha kwa Yehova bonse balisangilweko. Dustin alandile ukuti bonse abakasangwa ku lyashi lya cililo cakwe bakabashimikile bwino pa fyo asuminemo. Kangalila we Sukulu lya Butumikishi uwamupeleko ilyashi fye limo ilya mu sukulu, e walandile ilyashi lya cililo. Alilandile bwino nga nshi ilyashi kabili lyalikoseleshe sana abantu abaali kwati cani ca ku mutenge ku bwingi.
Amalembo yabili ayo Dustin atemenwe sana, Mateo 24:14 na 2 Timote 4:7, baliyalembele no kupela abasangilwe ku lyashi. Icitetekelo cakwe icakosa no kuba uwa mpomfu fyalikoseleshe bonse abamwishibe. Tulemulolela ukwisamusengela ilyo akabuuka ku bafwa.—Uwashimika ili lyashi ni Nte umwanakashi uwasambilishe Dustin icine.
[Amashiwi pe bula 30]
“Nindwa ubulwi busuma, nimbutuka ulubilo ukufika na ku mpela, nimbake citetekelo.”—2 Timote 4:7
[Icikope pe bula 29]
Pa muulu: Dustin, ilyo talatendeka ukulwala
[Icikope pe bula 29]
Pe samba: Dustin alebatishiwa ninshi ali ne myaka ya kufyalwa 12 na hafu