Lekeni Lesa Alemutungulula ku “Bumi Bwine Bwine”

ABANTU bonse abo baletungulula balingile ukucetekela sana uulebatungulula. Bonse abaishiba Yehova, umwine wa Baibolo, balisumina ukutila e muntu bengacetekela sana. ‘Tabepa’ iyo. (Tito 1:2; 2 Timote 3:16) Yoshua uwaletiina Lesa, uwatungulwile abena Israele ukuya mu Calo Calailwe, na o alisumine ukuti Yehova wa cishinka. Aebele abantu ukutila: “Mwaishiba mu mitima yenu yonse na mu myeo yenu yonse ukuti takwashala nangu cimo ca mu fintu fyonse fisuma ifyo Yehova Lesa wenu asosele ulwa imwe; fyonse fyalimoneke kuli imwe, takwashala cintu nangu cimo.”—Yoshua 23:14.

Ukufuma ilya nshita ya kwa Yoshua, amasesemo ayengi aya mu Baibolo yalifikilishiwa. Kanshi ifi aya masesemo yafikilishiwa tulingile ukucetekela sana ukuti amasesemo ayashalako nayo yene yakafikilishiwa. Aya masesemo ayengi yalanda pa co Lesa afwaya ukucita pa calo ne fyo akacitila abantu ba cumfwila.

Bushe Mukanonkelamo mu fyo Lesa Atungulula?

Yehova, uwaba no kutemwa ukukalamba, afwaya ifwe ukuba ne nsansa pali nomba na ku ciyayaya. (Yohane 17:3; 1 Yohane 4:8) Lesa afwaya ukuti twakwata “ubumi bwine bwine,” ubumi bwa muyayaya. (1 Timote 6:12, 19) E calenga ukuti Inte sha kwa Yehova ukucila pali 6 milioni baleumfwila ifunde Lesa abapeela ilya kuti baleebako bambi ‘imbila nsuma iya Bufumu’ kabili babomba uyu mulimo ne nsansa. (Mateo 24:14) Pali ino nshita, balebomba uyu mulimo mu fyalo 235, kuti twatila fye pano calo ponse!

Ubufumu bwa kwa Lesa buteko bwa ku muulu, e lyo Yesu Kristu e mfumu ya buko. (Daniele 7:13, 14; Ukusokolola 11:15) Ilyo Yesu akalateka, ababifi bonse abashifwaya ukumfwila amafunde ya kwa Yehova, akabonaula. (Amalumbo 37:10; 92:7) Pa numa, icalo conse “cikesulamo ukwishiba Yehova, ifyo amenshi yafimba pali bemba.”—Esaya 11:9.

Tontonkanyeni pa mutende no kumfwana ukukaba mu calo ilyo abantu bonse bakalapepa Lesa “mu mupashi na mu cine” e lyo no kulakonka ukutungulula kwakwe na mafunde yakwe ayasuma! (Yohane 4:24) Pali iyo nshita abantu bakaba no “bumi ubwine bwine” ubo Lesa alaya ukubapeela!

Lelo Baibolo yalisobela ukuti banono fye e bakasumina ukuti Lesa alebatungulula pa kuti bakabe no bumi. (Mateo 7:13, 14) Bushe mulafwaya ukuba pali abo bantu? Nga ca kuti mulafwaya, Inte sha kwa Yehova balemukoselesha ukuti mutendeke ukusambilila Baibolo no kulakonka ifyo Lesa atweba ukucita. Nga mwacita ifyo, ‘mukasonda’ mwe bene ukuti cine cine Yehova musuma. (Amalumbo 34:8) Nga filya fine amano yaba mu fyuni yafitungulula ukuya uko filekuukiila, Yehova na o akatungulula abantu bakwe aba cishinka ku bumi mu Paradaise.—Luka 23:43.

[Icikope pe bula 17, 18]

“Ba nsansa abafuuka imitima, pantu bakapyana isonde.”—MATEO 5:5

“Abalanda bakapyaninine calo, no kuilemeno bwingi bwa mutende.”—AMALUMBO 37:11

“Ihema lya kwa Lesa lili pamo na bantunse . . . Kabili akafuuta ifilamba fyonse ku menso yabo, ne mfwa tayakabeko kabili iyo.”—UKUSOKOLOLA 21:3, 4

“Abatambalala bakekala mu calo, na ba mpomfu bakashalamo; Lelo ababifi bakaputulwa mu calo, na bafutika bakafumpulwamo.”—AMAPINDA 2:21, 22