Lesa Alingafwile Ukucimfya Amafya

Abashimika ili lyashi ni ba Vazir Asanov

Naishilebuuka lubilo lubilo ukufuma pa busanshi, nakakila Baibolo mu musana e lyo nafwala bwangu bwangu. Ilyo nshilafumina pa windo, nabulile ifya kufwala nafipomba, nafibika bwino pa busanshi, kabili nabulile ubulangeti no kufimbapo pa kuti cimoneke kwati ncili mu busanshi ninsendama. Lyena nabutukiile ku Ng’anda ya Bufumu, napepele kuli Lesa ukuti angafwe. Ici cacitike mu 1991 ilyo nali ne myaka 14.

ABAFYASHI bandi bena Kurdi, kabili nafyalilwe mu musumba uwali ku kapinda ka ku kulyo aka calo beta nomba ukuti Kazakhstan, icali pa fyalo 15 ifyapangile Soviet Union pali ilya nshita. Abafyashi bandi na balupwa lwandi balenjeba ukutila nga nakula kuti naisaba intungulushi no kwisalubula abantu bandi. Natendeke ukupata sana abalwani ba bena Kurdi ica kuti nali uwaipekanya ukulabepaya pa kutila ndubule abantu bandi ukufuma ku balebacusha.

Ku kupwa kwa ba 1980, bamayo, umwaice wandi, na ine wine twatendeke ukusambilila Baibolo ne Nte sha kwa Yehova. Lelo batata tabalefwaya ukutumona tulelanshanya na Bena Kristu. Nangu batuleseshe, ine nalitwalilile ukusambilila Baibolo. Mu lupwa lwa bena Kurdi, onse alingile ukumfwila umutwe wa lupwa. Nalitemenwe batata, lelo nalitemenwe na masambilisho ya mu Baibolo ayo nalesambilila.

Amafya Nalepitamo pa Ng’anda na ku Sukulu

Bushiku bumo, kafundisha amwene Ulupungu lwa kwa Kalinda mu cola candi ica mabuuku kabili ailensoselela ku bafyashi bandi. Batata balifulilwe, balingumine ica kuti umulopa watampile no kufuma mu mona. Banjipwishe ukuti: “Bushe na nomba ucili muli lilya icalici?”

Ukufuma ilyo line, batata baebele ulupwa ukuti nabankana ukuti nshili mwana wabo. Ala calinkalipe ukumfwa batata balanda filya! E lyo kabili, abana besukulu banandi balilekele ukwangala na ine, kabili bambi balentukila fye na pa bantu. Bakafundisha bandi balempeela na matoni ayanono kabili nga tuli mu sukulu ilingi line balempumya pa mulandu wa ko nalepepa, pa kuti na ine imbe mukaanalesa nge fyo bena baali.

Nangu cingati balencusha umusango yu, nalitwalilile fye ukulasangwa ku kulongana kwa Bwina Kristu no kulashimikilako bambi ifipya ifyo nasuminemo. Ilyo papitileko inshita, batata baishileishiba ukuti ncili ndasambilila Baibolo na baNte. Bushiku bumo pa Mulungu, natampile ukutontonkanya ifyo nali no kweba batata pa kuti bansuminishe ukufuma pa ng’anda injesangwa ku kulongana. Ilyo line fye, batata banjebele ukuti mbwelele mu busanshi. Balinkalipile no kunjeba ukuti, “Ukufuma lelo, lyonse pa Mulungu pali ino nshita uleba fye mu busanshi.” Balentiinya ukuti nga nkaya ku kulongana baali no kunkanda icabipisha, kabili nalishibe ukuti ifyo balenjeba e fyo baali no kuncita.

Nalipepele kuli Yehova, Lesa wa cine ninshi uku ndelila, namulombele ukuti atontolole umutima wa batata, lelo bali fye cimo cine tabayalwike. Naibukishe ifyo abena Israele balecula mu Egupti. Ifyo batata balecita fyalengele ukuti njibukishe Farao, uwakeenye abena Israele ukuti baye mu kupepa Yehova.—Ukufuma 5:1, 2.

Ifyo Nacitile

Ubushiku bumo pa Mulungu napingwilepo ukuya mu kulongana. Nalisakamikwe sana ninshi nindala mu busanshi ndepepa mu mutalalila kuli Yehova. Ilyo abafyashi bandi baingile ku muputule wandi, nali kwati ndi mu tuulo. Batata balandile ninshi nabatemwa ukuti, “Ala nalikwata umwana uwa cumfwila.” Balintomwene, kabili bafumine fye umutalalila. Nakonkenyepo fye ukupepa.

Papitile fye inshita iinono apo abafyashi bandi bafumine mu muputule wandi, nga filya nandile pa kwamba, nalibuukile, nabulile insapato shandi ishali mwi fuungu, nafumina na pe windo. Ukulongana kwa ma-awala yabili kwapwile fye bwangu bwangu, kabili natampile ukulatontonkanya pa fyali no kuncitikila nga nabwelela ku ng’anda. Nalitemenwe ukwishiba ukuti bamayo ilyo basangile fye ifya kufwala fyandi ukuti e fyali pa busanshi, tabaile-eba batata. Nangu bacitile fyo, balinsokele ukuti nga nkabwekeshapo bali no kweba batata.

Mu 1992, naebele abafyashi bandi ukuti umunandi nakwata umutebeto uwacindama uo mfwile ukusangwako kabili nanjita. Na kuba, umutebeto uwacindama uko nalefwaya ukuyasangwa, kulongana kukalamba ukwa Nte sha kwa Yehova ukwabelele mu musumba wa Taraz. Ukufuma mu Karatau umo naleikala ukufika ku Taraz ukwabelele ukulongana pali amakilomita 100. Pali uku kwine kulongana e po nali no kubatishiwa pa kulanga ukuti nali-ipeele kuli Yehova. Nalombele bamayo ukuti mbuleko itepe limo ilya sunflower uko twatutiile. Nasalwile iyi sunflower no kuya mu kushitisha pa maliketi, umo mwine e mo nasangile indalama sha kwendela ukuya ku kulongana.

Ilyo nabwelele ku ng’anda, batata balinjipwishe nga ca kuti naileangala fye bwino no munandi. Nabebele ukutila nalyangele bwino. Ala nalyumfwile ukuti Yehova e wangafwile, pantu batata tabanjipwishe ifipusho na fimbi. Nalitemenwe sana amashiwi yaba pa Amapinda 3:5, 6, ayatila: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.”

Nanenuka mu Kupepa Yehova

Na pa numa ya kubatishiwa batata batwalilile fye ukulankanya ukulongana na baNte. Lyonse ilyo naleba na baNte, batata balempuma icabipisha, nangu pali abantu ne lintu tuli fye fweka. Mupepi na cila bushiku nalesalulwa no kulampatikisha ukuleka ukuba pamo ne Nte sha kwa Yehova, kabili ilingi line nalelila fye. Pali ilya nshita icalo ca Kazakhstan ninshi e lyo calepoka fye ubuntungwa bwa kulaiteka ukufuma kuli Soviet Union, kabili abafyashi bandi na balupwa balenkoselesha ukuti nyingile mu fya mapolitiki. Baletontonkanya ukuti ndepanya ishuko.

Umukalamba wandi ali ni kateya wa mupila, kabili batata ilingi line balemulumbilisha sana no kulanjeba ukuti ningile ukumupashanya. Ku kupwa kwa 1994, na ine natampile ukuteya umupila. Apo mu cifyalilwa fye nali uwakosa, tapakokwele natendeke ukulawina ifikombe na bantu batampile ukumpeela umucinshi pa fyo nali uwacenjela mu kuteya umupila na mu bwangalo bwa kutoloka. Natampile no kusambilila ifya kuba loya pa kuti nkalelubulwilako abena Kurdi. Nalingile na mu mapolitiki kabili nalefwaya no kutendeka akabungwe ka fikansa fya calo aka misepela abena Kurdi. Ilyo natampile ukucita ifi fyonse batata balintemenwe.

“Mwalicimfya, Tata”

Nalibwelele pa nshi mu kupepa Yehova kabili nalilekele ukubelenga Baibolo no kulaya ku kulongana kwa Nte sha kwa Yehova. Naleikoselesha ne mwine ukutontonkanya ukuti nkabombela Yehova na kabili nga nakula. Bushiku bumo batata balinjipwishe nga ca kuti naletwalilila ukulongana ne Nte sha kwa Yehova. Nabaswike ukuti, “Iyo. Mwalicimfya, Tata. Mufwile nomba mwalitemwa te ifyo fine Tata?” Ilyo baumfwile ifyo nalandile, batata balitemenwe nga nshi. Batile, “Nomba e lyo waba umwana wandi!”

Nalilekele ukulongana pa myaka ibili, nangu cingati limo limo nalefwaya ukulaya ku kulongana. Lelo icalelenga ukufilwa ukuya ku kulongana ni co naleumfwa insoni. Naletontonkanya ukuti aba mu cilonganino tabakomfwikishe umulandu nalekele ukulongana.

Pa nshita imo ine nalishibe ukuti icacindeme sana mu bumi bwandi kubombela Yehova. Ilingi line naleyeba ne mwine ukuti, ‘Na kuba, nalitemwa Yehova.’ Kabili batata batendeke ukunkoselesha ukuti nkaye ku yuniversiti. Nalisukile nasumina kabili nabebele ukuti ilyo nkalapwisha nkapaasa bwino sana. Nangu cingati nalisumine, mu mutima mwena naleti nga naya ku yuniversiti ku Almaty, umusumba uukalamba uwabela ku kapinda ka ku kulyo aka Kazakhstan, nkayafwaya baNte.

Ifyo Ifintu Fyaishilewama

Tapakokwele apo natampile ukusambilila pa yuniversiti, nakumenye baNte babili baleshimikila mu musebo mu Almaty. Baishile kuli ine no kunjipusha icipusho ca kuti, “Nani waishiba ukuti e uteka icalo?”

Nayaswike ukutila, “Satana Kaseebanya, umulwani wa kwa Yehova na bantu bonse.” (2 Abena Korinti 4:3, 4) Nalibebele ukuti ndi Nte wabatishiwa lelo nalileka ukulongana no kushimikila.

Mu kupwa kwa mwaka wa 1996, natampile ukusambilila Baibolo na kabili na baNte. Pa numa ya kusambilila imiku fye iingi, natendeke ukufwaya ukulabombela Yehova na kabili, natampile ukulabombako imilimo yonse iya Nte sha kwa Yehova mu Almaty. Mu September 1997, natendeke ukulabomba bupainiya, nelyo umulimo wa kulashimikila inshita iikalamba.

Ilyo papitile umwaka umo, batata balishile ntandalila. Nalibabutukile, no kuyabakumbatila. Balilombele ubwelelo pa myaka yonse iyo balencusha. Balandile ukutila tabaishibe ukuti ifyo nalecita ne fyo nasuminemo fyali fye bwino. Nabebele ukuti, “Tata, nalimutemwa sana.”

Ala nalitemenwe nga nshi ilyo batata basumine ukupoka impapulo shilanda pali Baibolo na pa kulomba ukuti mbapeele Baibolo, pa kuti baibelenge yonse! Pa numa ya mwaka umo, balintandalile na kabili, ili lyena baishile na bamayo. Ilyo twaile ku Ng’anda ya Bufumu, abantu bonse abo twalelongana na bo abafumine ku fyalo fyalekanalekana balishile ku kubaposha no kuilondolola abene. Ici calipapwishe batata, kabili batendeke ukulabelenga sana impapulo sha baNte.

Ifyo Napaalilwe Sana

Mu September 2001, e lyo naupile umukashana uwayemba umwina Russia uwe shina lya Yelena. Ni Nte iyabatishiwa. Abatishiwe mu 1997 kabili atendeke ukubomba umulimo wa kulashimikila inshita iikalamba mu May 2003. Twalitemenwe nga nshi ilyo twaumfwile ukutila abafyashi bandi balitendeka ukusambilila Baibolo na baNte no kulunduluka balelunduluka. Kwena nshacetekele sana ili lyashi, mpaka fye lintu naishile umfwa batata abene banjeba. Ilyo bantumiine foni, balandile ukuti Yehova e Lesa wa cine eka!

Nalitemwa sana pa kuti kuno ku Almaty ndasambilila Baibolo na bantu abafuma ku fyalo ifingi, pamo nga ku China, Iran, Pakistan, Syria, na ku Turkey. Tapalakokola sana apo shimapepo umwina Iran anjebele ukuti alefwaya tulesambilila nankwe Baibolo mu lulimi lwakwe, ulwa cina Persia. Umwaume umo uwali umukalamba wa bashilika uwafumine ku Afghanistan alitemenwe sana ifyo asambilile pali Yehova. Na kabili nalitemenwe ukusambilila Baibolo no mwina Syria mu cina Kurdi ululimi lwesu na pa kulasambila Baibolo na bantu mu ndimi shimbi isho nasambilile ku bwaice isha ciKazakh e lyo ne cina Russia.

Pali ino nshita, ine na Yelena, twaba mu cilonganino cimo ica Nte sha kwa Yehova icaba mu Almaty umwaba ifilonganino ukucila pali 35. Icilonganino twabamo cibomfya ululimi beta ukuti iciKazakh. Umwaka wapwile, ine na Yelena twalitilwe ukuyabombela pa maofeshi ya Nte sha kwa Yehova pa nshita inono ayabela mupepi na ku Almaty.

Pa nshita imo balensambilisha ukupata abalwani bandi, nomba Yehova alinsambilisha ukutemwa abantu. Ninshininkisha ukuti tatufwile ukusumina ilyo batupatikisha ukuleka ukubombela Yehova Lesa, nangu ca kutila abaletupatikisha bantu twacindika mu lupwa nelyo ifibusa. (Abena Galatia 6:9) Pali ino nshita ine no mwina mwandi twaliba ne nsansa sana pantu twaliba “abacincila pe mu mulimo wa kwa Shikulu.”—1 Abena Korinti 15:58.

[Amashiwi pe bula 28]

Bamayo balinsokele ukuti nga nkabwekeshapo bali no kweba batata

[Icikope pe bula 30]

Ing’anda ya Bufumu mu Karatau, uko nalelongana ilyo nali umwaice

[Icikope pe bula 30]

Abafyashi bandi, abo pali nomba abatemwa umulimo tubomba

[Icikope pe bula 30]

Ine na Yelena ilyo twalepisha ubwinga

[Icikope pe bula 30]

Ine na Yelena, pa maofeshi ayapya aya Nte sha kwa Yehova ayabela mupepi na ku Almaty