Ukulingana na Baibolo
Bushe Ababifi Bakayapya mu Mulilo wa Pe?
BA GERTRUDE, abapepa ku Pente balisumine sana ukuti kwaliba umulilo wa pe umo abantu baya mu kupya. Umuntu nga alanda ukuti takwaba umulimo wa pe, baletila kanshi ninshi Lesa te wa mulinganya. Balemona kwati abantu nga tabapya mu mulilo wa pe, ninshi abacita ulukaakala lwalekanalekana tabakakandwe. Ba Getrude balicetekele no mutima onse ukuti umulilo wa pe e ko waba. Basosele ukuti: “Nga takwaba umulilo wa pe uko ababifi baya mu kupya, te kuti ntemwe ukupepa Lesa.”
Bushe ababifi bakayapya mu mulilo wa pe nga fintu imipepele iingi isambilisha? Nga tabakapye, bushe bakakandwa shani?
Umuku wa Kubalilapo Ilyo Lesa Akandile Ababifi
Ukulingana na Baibolo, Adamu na Efa bali abapwililika ilyo Lesa ababumbile. (Ukutendeka 1:27; Amalango 32:4) Ababikile mwi bala lya Edeni no kubapeela ishuko lya kwikala umuyayaya. Lelo aba bantu abo Lesa abalilepo ukupanga balipeelwe ifunde limo. Lesa asokele ukuti: “Ku muti onse uwa mwi bala ukulya ulelyako no kwikuta. Lelo ku muti wa kulenga ukwishiba ubusuma no bubi kwena wilalyako, pantu mu bushiku ukalyako ukufwa ukafwa.”—Ukutendeka 2:16, 17.
Ku ca bulanda, abafyashi besu aba kubalilapo balifililwe ukukonka ili ifunde pa kuti balange bucishinka bwabo ne cumfwila. Kabumba apingwile ukuti balingile ukufwa. Atile: “Wakulapiba pa kusanga ifya kulya mpaka ukabwelele ku mushili, pantu e ko wafumine. Pantu uli lukungu, kabili ku lukungu e ko ukabwelela.”—Ukutendeka 3:19.
Nga ca kuti Adamu na Efa bali no kupya mu mulilo wa pe, bushe Lesa nga tabasokele ukuti e fyo bakakandwa? Lesa tabebelepo ukuti bakaya mu kucula nga bafwa. Bushe nga bailecula shani mu mulilo wa pe abashakwete umweo uushifwa? Baibolo yalilanda bwino sana ukuti: “Umuntu uubembuka e ukafwa.”—Esekiele 18:4.a
Kabumba wesu uwatupeela ubumi alishiba fyonse pa bumi na pa mfwa. Atweba mu Cebo cakwe ukutila: “Abafwa, tabaishiba akantu nangu kamo.” (Lukala Milandu 9:5) E mulandu wine Adamu na Efa bashailile mu kupya mu mulilo wa pe pa numa ya mfwa. Babwelele fye kwi loba, baleka no kubako. ‘Tabaishibe akantu nangu kamo.’
Bushe nga Twafwa Kuti Twacula?
Pa Abena Roma 5:12, Baibolo itila: “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” Nomba bushe kuti caba fye bwino ukusumina ukuti abantu balaya mu kucula mu mulilo wa pe pa membu shabo, ilyo Adamu uwaletela abantu bonse imfwa asangwike fye ulukungu ilyo afwile?—1 Abena Korinti 15:22.
Bonse twalipyana ulubembu ne mfwa ukufuma kuli Adamu. “Icilambu ca lubembu ni mfwa.” E lyo kabili umuntu nga afwa, ninshi “umulandu wakwe uwa lubembu wapwa.” (Abena Roma 6:7, 23) Nga ca kutila ababi na basuma bene balafwa, e lyo kabili tapaba uucula pa numa ya mfwa, bushe Lesa akakanda shani ababifi abalinga ukukandwa?
Umulinganya wa kwa Lesa
Ifyo Lesa alefwaya abantunse baleikala, tafyayaluka ukutula apo abumbile abantu ba kubalilapo babili no kubeba ukukwata abana no kulasakamana isonde. (Ukutendeka 1:28) Ifyo alandile pa numa filanga ukuti e fyo acili afwaya. Atile: “Abalungama e bakekala mu calo, kabili bakekalamo umuyayaya.”—Amalumbo 37:29.
Ilembo lyatila abalungama bakekala pano calo. Bakakwata ubumi bwapwililika kabili bakaba ne nsansa. Filya fine Lesa alefwaya isonde ukwisulamo abantu balungama e ‘fikafikilishiwa.’ Ifi fyonse fikacitika ilyo akafumyapo cino calo cabipa no kupyanikapo icalo cipya icalungama.—Esaya 55:11; Daniele 2:44; Ukusokolola 21:4.
Iminshipendwa ya bantu abafwile ilyo bashilaishiba ifyo Lesa afwaya, bakabuuka kabili bakasambilishiwa ifikalenga bakekale umuyayaya mu calo cipya ica kwa Lesa. (Esaya 11:9; Yohane 5:28, 29) Lelo abakaana ukukonka amafunde ya kwa Lesa bakafwa “imfwa ya cibili.” Abakafwa iyi mfwa ya cibili tabakabuushiwe.—Ukusokolola 21:8; Yeremia 51:57.
Nga fintu twamona, Yehova Lesa uwaba no kutemwa takoce abantu mu mulilo wa pe. (1 Yohane 4:8) Kabili takaleke ububifi ukutwalilila ukubako. E mulandu wine Amalumbo 145:20 yatukoselesesha ukuti: “Yehova alinda bonse abamutemwa, lelo ababifi bonse akabalofya.” Bushe ici tacilelanga ukuti Lesa alikwata ukutemwa no mulinganya?
[Futunoti]
a Baibolo nga yatila umweo ninshi ilelanda pa muntu, te cintu cimbi icifuma mu mubili wa muntu. Pa Ukutendeka 2:7 patila: “Yehova Lesa abumbile umuntu ku lukungu lwa mu mushili kabili apuutile mu myona yakwe umupu wa bumi, no yo muntu aishileba uwa mweo.” Adamu tabamupeele umweo lelo Adamu umwine aishileba icibumbwa ca mweo.
BUSHE MWALITONTONKANYAPO PALI IFI?
◼ Bushe twakwata umweo uushifwa?—Esekiele 18:4.
◼ Bushe abafwa baba shani?—Lukala Milandu 9:5.
◼ Bushe Lesa akakanda shani ababifi?—Amalumbo 145:20.
[Amashiwi pe bula 27]
“Abafwa, tabaishiba akantu nangu kamo.”—Lukala Milandu 9:5.
[Abatusuminishe Ukubomfya Icikope pe bula 26]
Photo: www.comstock.com