Tulafwaisha Ukuti Amacushi Yakapwe!

Khieu atampile ukucula ilyo bawishi babepeye pa mulandu wa kuti ing’ombe shabo shailelya amataba mwi bala ilya bena mupalamano. Pa numa, banyina na bankashi yakwe babili balibepeye ku ba mu buteko ubwaleteka icalo ca Cambodia. Lyena, ilyo Khieu ali mu mpaanga, balimucenene ku kapata. Papitile inshiku 16 pa kuti aba kumwafwa bamusange. Bailemuputulako ukuulu, kabili Khieu atile: “Nalefwaya fye ukufwa.”

MUFWILE na imwe mwalimona ukuti ubucushi tabusala. Ifinkunka, ukulwala, ukulemana, ukusanswa ku fipondo, ne fyabipa fimbi filacitikila fye abantu bonse mu calo kabili kuti fyacitika inshita fye iili yonse. Utubungwe utwafwilisha abantu tulabombesha ukucilikila amacushi nelyo ukwaafwa abalecula. Nomba bushe utu tubungwe, tulapwisha amacushi?

Tontonkanyeni pa bwafya bumo ubo besha na maka ukupwisha, no bu bwafya bwa nsala. Ukulingana ne nyunshipepala ya Toronto Star, ifinkunka filalenga abantu abengi ukushala ukwabula amayanda ne fya kulya. Kabili iyi nyunshipepala yatile “utubungwe utwafwilisha abalecula ku nsala tulafilwa ukubomba bwino pa mulandu wa bunkalwe.”

Bakateka, utubungwe utwafwa abantu, na babomba mu fipatala balyesha na maka ukupwisha ukucula, lelo balifilwa. Ukwesha ukuwamya ubunonshi bwa calo nako takupwisha ubupiina. Imiti ne nshila shisuma isha kundapilamo na fyo te kuti fipwishe amalwele. Bakapokola na bashilika abasungilila umutende balafilwa ukucilikila nelyo ukupwisha ubunkalwe.

Cinshi calenga ukuti pano calo pabe sana ukucula? Bushe Lesa alibikako amano ku fyo abantu bapitamo? Abantu abengi balasansamushiwa ilyo bomfwa ifyo Baibolo ya-asuka aya mepusho, nge fyo twalamona mu fipande fikonkelepo.