Imikalile Yabula Amacushi Bulayo Ubwa Cine Cine

“[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:4.

BUSHE ubu bulayo bwa cine cine? Tontonkanyeni pa kusoka kwa kubalilapo fye uko Lesa asokele umuntu. Lesa aebele Adamu ukuti nga tawakabe ne cumfwila, “ukufwa ukafwa.” (Ukutendeka 2:17) Nge fyo Lesa alandile, Adamu alifwile. Ifyacitikile Adamu, ubucushi, e lyo ne mfwa twapyana, filanga ukuti fyonse ifyo Lesa alanda filacitika. Bushe pali icingalenga tuletwishika ubulayo bwa kwa Lesa ubwa kuti isonde likaba filya fine lyali pa kutendeka?

Tontonkanyeni na pa mibele ya kwa Lesa iyo tulandilepo mu cipande cifumineko. Icalenga ukuti tulefwaisha ukupwisha ukucula ni co tupashanya uluse, ukutemwa, no mulinganya wa kwa Lesa? Na kabili, ifilecitika mu calo ne mibele abantu bakwata filelanga fye ukuti inshita ya kuti Lesa acitepo cimo naipalama.—Moneni akabokoshi kaleti “Ni Lilali Ifi Fintu Fikabako?”

Mulandu nshi twingalandila ukuti Yehova Lesa e walinga sana ukupwisha amacushi ya bantunse? Tontonkanyeni pa fyo aacita na pa fyo akafumyapo ifileta amacushi ukupitila mu Mwana wakwe Yesu.

Ifyo Umuntu Asalapo Ukucita. Umufyashi wesu Adamu asalilepo ukucita ifyaletelela abantu bonse pa calo. Umutumwa Paulo alembele ukuti: “Ifibumbwa fyonse fitetela capamo no kucululukila capamo.” (Abena Roma 8:22) Inshila Lesa akapwishishamo ukucula konse ya mulinganya icine cine, ya uluse nga nshi, kabili iya-anguka sana. Pa Abena Roma 6:23 patila: “Icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.”

Umuntu wapwililika Yesu tatalile abembukapo. Imfwa yakwe pa cimuti yalengele abantu bacumfwila balubulwe ku citiipu ca lubembu ne mfwa. E mulandu wine twakwatila isubilo lya kwikala umuyayaya mu calo umushakabe ulubembu ululenga twilasala bwino ifyo tucita. Abantu abalenga abantu banabo ukucula na bo bene tabakabemo, “pantu incitatubi shikaloba.”—Amalumbo 37:9.

Ificitika ukwabula ukwenekela no kukanapwililika. Imfumu iyo Lesa asala, Yesu Kristu, yalikwata amaka pali fyonse ifya pano calo. Bushiku bumo, Yesu na batumwa bakwe bali mu bwato e lyo “kwaimine icikuuku ca mwela icikalamba na mabimbi yalapama mu bwato, ica kuti ubwato bwapene bwisule.” Ilyo abasambi bapundile mutuule, Yesu “aliimine no kukalipila umwela no kweba bemba ati: ‘Talala! Ba tondolo!’ No mwela walilekele, awe kwatalele na tondolo.” Abatumwa bakwe balipapile icine cine. Batile: “No mwela na bemba filamumfwila.”—Marko 4:37-41.

Mu kuteka kwa kwa Yesu, abantu ba cumfwila ‘bakekala umutelelwe no kwikala umutende ukwabula ukutiina ububi.’ (Amapinda 1:33) Tamwakabe ukutiina ifinkunka. Na kabili, tamwakabe abakalaonaula icalo, abakalakuula ifikuulwa ifishakosa, kabili tamwakabe abashakaleumfwila ukusoka, ukubikako fye na bantu abacita ifilubo ifiletelela abanabo. Tamwakabe na macushi yatuponena pa mulandu wa fintu ificitika ukwabula ukwenekela.

Ilyo ali pa calo, Yesu alandile pa cintu na cimbi ico Ubufumu bwakwe bukacita icikafumyapo amacushi ayo tupitamo pali ino nshita nga kwaba amasanso ayo tushile-enekela. Atile: “Nine kubuuka kabili umweo.” (Yohane 11:25) E co kanshi Yesu alikwata amaka ya kubuusha abafwa kabili alafwaisha ukubuusha iminshipendwa ya bantu abafwile pa mulandu wa finkunka. Bushe ubu bulayo bwa cine? Filya Yesu abuushishe abafwa ilyo ali pano calo fyalenga twamucetekela ukuti akabuusha abafwa. Baibolo yalilanda pa fipesha mano fitatu ifyo Yesu acitile ilyo abuushishe abafwa.—Marko 5:38-43; Luka 7:11-15; Yohane 11:38-44.

“Kateka wa pano calo.” Lesa alisala Kristu Yesu ukuti ‘akonaule uwakwata amaka ya kulenga imfwa, e kutila, Satana Kaseebanya.’ (AbaHebere 2:14) Yesu alandile ati: “Cino calo cilepingulwa; nomba kateka wa pano calo bakamupoosa ku nse.” (Yohane 12:31) Yesu ‘akonaula imilimo ya kwa Satana Kaseebanya’ ilyo akafumyapo ukusonga kwakwe mu calo. (1 Yohane 3:8) Ala mwandini icalo cikawama nga nshi ilyo kushakabe ubufunushi, amafisakanwa, na bukaitemwe ifyaba muli cino calo ca kwa Satana!

[Akabokoshi pe bula 9]

“Ni Lilali Ifi Fintu Fikabako?”

Abasambi ba kwa Yesu bamwipwishe abati: “Ni lilali ifi fintu fikabako, kabili cinshi tukeshibilako ukuti e po muli no kuti icalo cili ku mpela?” (Mateo 24:3) Ifyo Yesu abaswike, na mashiwi yaba mu mabuuku ya mu Baibolo ayo balembele pa numa ya mfwa yakwe, filatweba ifili no kucitika inshita nga yapalama iya kuti Lesa apwishe ubucushi.a Moneni ifyo uku kusesema kulingene ne filecitika pali ino nshita.

● Inkondo sha calo conse—Mateo 24:7; Ukusokolola 6:4.

● Ifipowe na malwele—Luka 21:11; Ukusokolola 6:5-8.

● Ukonaula isonde—Ukusokolola 11:18.

● “Abatemwa indalama”—2 Timote 3:2.

● “Abashumfwila abafyashi”—2 Timote 3:2.

● “Abatemwa ukwangala ukucila ukutemwa Lesa”—2 Timote 3:4.

Inte sha kwa Yehova kuti batemwa ukumulanga ubushininkisho ubulanga ukuti ubucushi buli no kupwa nomba line. Landeni na ba Nte abekala mupepi na imwe. Kuti batemwa sana ukulasambilila Baibolo na imwe pa ng’anda pa mwenu nangu ukuli konse uko mwe bene mwingatemwa.

[Futunoti]