Ifyo Baibolo Isambilisha

Bushe Lesa Alafwilisha Abalwa Inkondo Muno Nshiku?

ILYO Imfumu Davidi iya bena Israele yalelanda pa fyo yalecimfya ifyalo fimbi yatile: “[Lesa] asambilisha iminwe yandi ukulwa, na maboko yandi yalishiba ukubomfya ubuta bwa mukuba.”—Amalumbo 18:34.

E lyo umutumwa Paulo alembele pa Bena Kristu ukuti: “Nangu twaba nge fyaba fye abantu bonse, tatulwishisha mu buntunse. Pantu ifyanso fya bulwi bwesu te fya buntunse.”—2 Abena Korinti 10:3, 4.

Bushe aya malembo yalaipilika? Nelyo bushe kwaliba umulandu Lesa asuminishishe abena Israele ukulalwa inkondo no mulandu alesesha Abena Kristu ukulalwa inkondo? Bushe ifyo Lesa alemona inkondo kale fyalipusana ne fyo amona pali ino nshita? Kuti twaishiba ifyasuko kuli ifi fipusho nga twatontonkanya pa bupusano butatu ubwaba pa bena Israele na pa cilonganino ca Bena Kristu.

Ubupusano Butatu

1. Abena Israele baleikala mu calo ico Lesa abapeele, kabili mu fyalo fyali mu bwino mupalamano ilingi line mwaleikala abantu abankalwe. E ico, Lesa aebele abantu bakwe ukulacingilila icalo cabo, kabili alebafwa no kucimfya abalwani babo. (Abapingushi 11:32, 33) Lelo, ababa mu cilonganino ca Bena Kristu bena tabekala mu calo cimo, baba mu fyalo fye fyonse. E co abasambi ba kwa Kristu nga balelwako inkondo, kuti balelwisha Abena Kristu banabo, bamunyinabo ne nkashi, abo balingile ukutemwa nga nshi no kubafwila.—Mateo 5:44; Yohane 15:12, 13.

2. Abena Israele baletekwa na bantunse, ishamfumu ishaleikala mu Yerusalemu. Lelo, Abena Kristu ba cine batekwa na Yesu Kristu, Imfumu ishimoneka iya maka iikala ku muulu. (Daniele 7:13, 14) Yesu umwine atile: “Ubufumu bwandi te bwa pano calo. Ubufumu bwandi abuba bwa pano calo, ababomfi bandi nga balwa ukuti nipeelwa ku baYuda. Lelo ubufumu bwandi te bwa pano calo iyo.” (Yohane 18:36) Kanshi takwaba ubufumu nelyo ubuteko pano calo ubwingatila butungululwa na Kristu. Bushe ici cakuma shani “ababomfi” ba kwa Yesu, nelyo abasambi bakwe? Icasuko cili mu cishinka calenga butatu.

3. Nge fyo ifyalo fyonse ficita, abena Israele nabo ilingi line baletuma inkombe ku fyalo fimbi, nelyo abo pali ino nshita twita ukuti abeminishi ba calo cimbi. (2 Ishamfumu 18:13-15; Luka 19:12-14) Ifi fine e fyo na Kristu acita, lelo palibako ubupusano mu nshila shibili. Iya kubalilapo ya kuti abasambi bakwe bonse beminishi. E mulandu wine umutumwa Paulo alembele pa Bena Kristu ukuti: “E ico ifwe tuli nkombe ishibomba umulimo wa kwa Kristu.” (2 Abena Korinti 5:20) Apo bali beminishi ba kwa Kristu aba mutende, tabalesambilila ifya kulwa. Inshila ya bubili ya kuti abasambi ba kwa Yesu balanda na bantu bonse abengakutika ku mbila babila. Yesu atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse.” (Mateo 24:14) Asosele no kuti: “E ico kabiyeni, kalengeni aba nko shonse ukuba abasambi, . . . mulebasambilisha ukulakonka fyonse ifyo namwebele.”—Mateo 28:19, 20.

Icabipako fye ca kuti limo ababomfi ba kwa Kristu tababapokelela ku bantu. E calengele ukuti Paulo alembele kabila wa mbila nsuma Timote ukuti: “Apo uli mushilika umusuma uwa kwa Kristu Yesu, ucule ku bubi.” (2 Timote 2:3) Ifyanso ifyo Timote alebomfya te fyanso fya buntunse, kabili pali ifi fyanso pali ne Cebo ca kwa Lesa, icitwa no kuti “ulupanga lwa mupashi.”—Abena Efese 6:11-17.

Mulandu Nshi Lesa Alekele Ukubomfya Abena Israele no Kutampa Ukubomfya Icilonganino ca Bena Kristu?

Pa myaka nalimo 1,500, abena Israele bali bantu ba kwa Lesa abaibela, kabili bucibusa bwabo na Lesa bwashintilile pa cipangano bapangene na Lesa. (Ukufuma 19:5) Muli cilya cipangano, ico Mose ali kawikishanya, mwali na Amafunde Ikumi e lyo na mafunde na yambi, kabili aya mafunde yonse yalelenga abena Israele ukulapepa Lesa wa cine no kuba ne mibele iisuma. (Ukufuma 19:3, 7, 9; 20:1-17) Lelo, ku ca bulanda, abena Israele bonse tabaali ne cishinka kuli Lesa, kabili bafikile fye na kukwipaya bakasesema bakwe.—2 Imilandu 36:15, 16; Luka 11:47, 48.

Mu kulekelesha, Yehova atumine Umwana wakwe, Yesu Kristu, uwaishilefyalilwa mu mukowa wa baYuda. Mu nshita ya kuti bamupokelele ukuti ni Mesia, uluko lwa baYuda lonse lwalimukeene. Ici calengele ukuti Lesa afumyepo icipangano ico apangene na bena Israele pa nshita ntali, kabili icibumba ca mampalanya icalekenye abaYuda na bashili baYuda calibongolweke.a (Abena Efese 2:13-18; Abena Kolose 2:14) Pali ilya ine nshita, Lesa alipangile icilonganino ca Bena Kristu, kabili asalile Yesu ukuba Umuntwe. Na kabili, ilyo abatumwa bonse bashilafwa, mu filonganino ifingi mwatampile ukuba Abena Kristu abalefuma mu mitundu yonse. Umutumwa Petro uwali umuYuda atile: “Umuntu uwa mu luko lonse uutiina Lesa no kucita icalungama alapokelelwa kuli ena.”—Imilimo 10:35.

Inte sha kwa Yehova bakonka ica kumwenako ca Bena Kristu ba kubalilapo. E mulandu wine ba Nte bashi-ipoosela mu fikansa fya mitekele ya calo kabili e co bashilwilako inkondo. (Mateo 26:52; Imilimo 5:42) Inte sha kwa Yehova tabaleka icili conse ukubapumfyanya ukubomba umulimo wa kubilisha imbila nsuma ya Bufumu bwa kwa Lesa, ubuteko ubukesafumyapo ububifi no kuleta umutende pa calo. Apo umutumwa Paulo alikwete isubilo lyacindama nga nshi, alembele ukuti: “Apo tuli beminishi ba kwa Kristu tupapaata, atuti: ‘Bweleleni kuli Lesa.’” (2 Abena Korinti 5:20) Nga ni muno nshiku, aya mashiwi yalicilapo ukucindama pantu tuli ku mpela ya “nshiku sha kulekelesha” isha cino calo cabipa.—2 Timote 3:1-5.

[Futunoti]

BUSHE MWALIPUSHAPO UKUTI . . .

● Mibele nshi iyo Abena Kristu balingile ukulalanga ku Bena Kristu banabo?—Yohane 13:34, 35.

● ‘Canso’ nshi ico Abena Kristu babomfya sana?—Abena Efese 6:17.

● Ni mbila nshi iyacindama iyo abeminishi ba kwa Kristu babila?—Mateo 24:14; 2 Abena Korinti 5:20.

[Icikope pe bula 15]

Inte sha kwa Yehova ba bwananyina ababa mu fyalo fyonse kabili tabalwako inkondo