Abacaice Bepusha Ukuti
Cinshi Cingangafwa Ukulacita Ifyo Naishiba Ukuti Fisuma?
Michael amona Brad aleisa, awe aumfwa no mwenso pantu naishiba icalacitika. Ilyo Brad afika mupepi atila, “Shani Michael, ani aka!” Cilya Brad afumbatula iminwe, Michael amona ifyo acilaenekela—umushanga we bange ninshi e lyo Brad aupomba fye. Michael talefwaya ukupoka, na lyo line teti atemwe umunankwe ukumumona kwati alishishita. E ico Michael alanda mwi shiwi ilyanakilila ati, “mmm . . . nkapeepako limbi!”
Jessica amona Brad aleisa kabili aishiba ne calacitika. Brad atila, “Shani Jessica, ani aka!” Cilya Brad afumbatula iminwe, Jessica amona ifyo acilaenekela—umushanga we bange ninshi e lyo Brad aupomba fye. Jessica alanda ukwabula ukupita mu mbali ati, “Nshilefwaya.” E lyo atila, “Kwaliba ifyacindama ifyo mfwaya ukucita ku ntanshi, nomba nga ndepeepa kuti nafwa bwangu. Nawishiba Brad, . . . Ine nalemona kwati ifi wacenjela te kuti upeepe ibange!”
MULI ifi fya kumwenako fibili, mulandu nshi Jessica akaanina ukupeepa ibange ukwabula no kupita mu mbali? Ni co alishininwa ukuti tafwile ukupeepa kabili alafwaya no kukonka ifyo asuminamo. Lelo Michael, nangu ca kuti alishiba ati ukupeepa kubi, imikaanine yakwe ilelanga ukuti tashininwa. Kanshi nga washininwa ukuti ifintu fimo fibi, nangu abanobe bakutunke shani kuti wakana. Nomba, kuti wacita shani pa kuti ukwate amaka ya kukaana ifyo abanobe balekutunka? Ufwile ukuishiba bwino kabili ifili pe samba kuti fyakwafwa ukucita ifyo.
1 ISHIBA IFYO UCITA BWINO
Ico ufwile ukwishibila: Ukwishiba ifyo wacenjelamo e lyo ne mibele isuma iyo wakwata kuti calenga waicetekela.
Tontonkanya pali ici: Kwaliba ifyo umuntu onse acita bwino. Ku ca kumwenako, bamo baishiba sana ukwimba e lyo bambi baishiba sana ifya kulengalenga. Bambi bena baishiba sana ifyangalo. Raquel aishiba sana ukulungisha imyotoka.a Atile, “Ilyo nali ne myaka 15, natendeke ukufwaya ukuba makanika.”
Ica kumwenako ca mu Baibolo: Umutumwa Paulo alembele ati: “Nangu nshacenjela mu milandile, mu kwishiba mwena nalicenjela.” (2 Abena Korinti 11:6) Apo Paulo alishibe sana Amalembo talenenuka nangu bambi bamusuushe shani. Talekele ukucita ifyalungama pa mulandu wa fyabipa ifyo bambi balelanda.—2 Abena Korinti 10:10; 11:5.
Iceceete. Lemba pe samba incito waishibisha nelyo icintu cimbi ico waishiba sana.
․․․․․
Nomba lemba imibele iisuma iyo wakwata. (Ku ca kumwenako, Bushe ulasakamana bambi? Ni we kapekape? Bushe walicetekelwa? Bushe ulasunga inshita?)
․․․․․
“Ndabikako sana amano ku bantu bambi. Umuntu nga alefwaya ukulanda na ine ilyo ndecita fimo, ndaleka ifyo ndecita no kukutika.”—E fyalandile Brianne.
Nga cakwafya ukusanga imibele iisuma iyo wakwata, tontonkanyapo cimo ico uushaishibe ku bwaice ico waishiba bwino nomba, kabili cilembe pe samba.—Ku ca kumwenako, mona akabokoshi kaleti “Ifyo Abaice Banobe Balandapo.”
․․․․․
2 ISHIBA IFYO USHICITA BWINO
Ico ufwile ukwishibila: Ceni nga naikwata pamo apashikosele, uku konse nangu ikose shani kuti yaputuka. Na iwe nga waikalila fye ukutontonkanya pa fyo ushicita bwino te kuti ulunduluke.
Tontonkanya pali ici: Bonse tatwapwililika. (Abena Roma 3:23) Cila muntu alafwaya ukwalukako muli fimo ifyo aba. Seija atile: “Nshaishiba ico nkalipila na pa tuntu fye utunono. Ndakalipa sana na pa tuntu fye utushilondolweke ica kuti nafilwa no kuilama!”
Ica kumwenako ca mu Baibolo: Paulo alishibe ifyo ashalecita bwino. Alembele ati: “Mu mutima wandi mwena nalitemwisha amafunde ya kwa Lesa, lelo ine mona mu filundwa fyandi ifunde limbi lilelwa ne funde lya matontonkanyo yandi no kulantwala bunkole kwi funde lya lubembu.”—Abena Roma 7:22, 23.
Iceceete. Ni muli finshi umo nshicita bwino umo ningatemwa ukwaluka?
․․․․․
“Nasanga ukuti nga natamba amafilimu umuba icintemwa, ndomfwa bubi ukuti ine nshakwata umulumendo uwantemwa. E ico nalishiba nomba ukuti mfwile ukusala bwino ifya kutamba.”—E fyalandile Bridget.
3 ISHIBA IFYO UFWAYA UKUCITA
Ico ufwile ukwishibila: Nga kwaliba ifyo ufwaya ukucita, ukalabombesha pa kuti ukafikilishe ifyo wapanga. Kabili tawakafilwe ukucita ifyo pa mulandu wa bantu nelyo pa mulandu wa filecitika.
Tontonkanya pali ici: Bushe kuti wanina muli motoka no kweba namutekenya ati akushinguluka ici icikuulwa mpaka amafuta yapwe, nalakulipila? Awe, na kuba ukucita ifyo konaula fye indalama! Kanshi nga ulefwaya ukuti ukafikilishe ifyo wapanga, taufwile ukulacita ifingalenga waba fye pamo pene. Lelo ufwile ukabika amano ku kucita ifingakwafwa ukufikilisha ipange lyobe.
Ica kumwenako ca mu Baibolo: Paulo alembele ati: “Ine ifyo mbutuka nshibutuka ngo ulebutuka icibutukebutuke.” (1 Abena Korinti 9:26) Apo Paulo alishibe ico alefwaya ukucita, talekonkelela ifintu fimbi, lelo alecita ifyalemwafwa ukufikilisha ifyo apangile.—Abena Filipi 3:12-14.
Iceceete. Lemba pe samba ifintu fitatu ifyo wingatemwa ukufikilisha ilyo umwaka taulapwa.
1 ․․․․․
2 ․․․․․
3 ․․․․․
Nomba salapo icicindeme sana pali ifi walemba kabili lemba ne fyo wingacita ifingakwafwa ukufikilisha ifyo ulefwaya.
․․․․․
“Nga nshikwete ifya kucita, nsanga fye ukuti ndecita icili fye conse. Caliba bwino sana ukwishiba ifyo ufwaya ukucita e lyo no kulacita ifingalenga wafikilisha ifyo wapanga.”—E fyalandile José.
4 IFYO WASUMINAMO
Ico ufwile ukwishibila: Nga takwaba ifyo wasuminamo, tawakulaishiba ico ulingile ukucita. Wakula-aluka-aluka nga lufwinyemba pantu wakulafwaya ukulacitako icili conse ico abanobe balecita.
Tontonkanya pali ici: Baibolo ikoselesha Abena Kristu ‘ukuishininkisha abene ico Lesa afwaya, icisuma, icapokelelwa.’ (Abena Roma 12:2) Nga ca kuti ulecita ifintu ukulingana ne fyo wasambilila mu Baibolo, tawakulakonkelesha bambi.
Ica kumwenako ca mu Baibolo: Ilyo ali fye umusepela, kasesema Daniele “apangile mu mutima wakwe” ukuti akulakonka amafunde ya kwa Lesa, nangu ca kuti ali ukushali balupwa lwakwe nelyo abo alepepa nabo. (Daniele 1:8) Ico calengele elakonkelesha bambi. E ico Daniele alekonka ifyo asuminemo.
Iceceete. Bushe finshi wasuminamo? Ku ca kumwenako:
● Bushe walisumina ukuti Lesa e ko aba? Nga walisumina, cinshi wasuminina ukuti e ko aba? Finshi fyalenga ushininwe ukuti e ko aba?
● Bushe walicetekela ukuti amafunde ya kwa Lesa ayalanda pa kukwata mibele isuma kuti yakwafwa? Nga walicetekela, cinshi calenga? Ku ca kumwenako, cinshi washininkishisha ukuti ukumfwila amafunde ya kwa Lesa ayakaanya ubulalelale kuti kwalenga waba ne nsansa ukucila ukukonkelesha abaice banobe abashikonka aya mafunde?
Aya te mepusho ya kwasuka fye lubilo lubilo. Ulingile ukutontonkanyapo sana pa mulandu wasuminina ifyo usambilila mu Baibolo. Nga wacita ifyo, ukeshiba ifya kulondolola ifyo wasuminamo.—Amapinda 14:15; 1 Petro 3:15.
“Pa sukulu nga ulemoneka kwati tawacetekela sana ifyo wasambilila mu Baibolo, abana be sukulu balatunka sana. Nshalefwaya ukulamoneka kwati icitetekelo candi tacakosa. E ico nalibikile sana amano ku kwishiba bwino umulandu nasuminina ifyo nasambilila mu Baibolo. Ukucila ukweba abantu ati, ‘Te kuti ncite ifyo pantu uko mpepa balitukaanya,’ nalelanda ati naishiba ukuti tacawama ukucita ‘ifya musango uyo.’ Ifi e fyo nasuminamo.”—E fyalandile Danielle.
Kuti watemwa ukuba shani,—ukuba nge buula ilyapona ilisendwa fye ukuli konse no mwela nelyo kuti watemwa ukuba nge cimuti icakosa icishingawa nangu kwaba icimwela icikalamba nga nshi? Nga ulebika sana amano ku fyo ufwaya ukuba, e lyo ukaba nge cimuti icakosa. Ne ci cikakwafwa ukulacita ifyo waishiba ukuti fisuma.
Ifipande fimbi ifitila “Abacaice Bepusha Ukuti” filasangwa pa Intaneti pa www.watchtower.org/ype
[Futunoti]
a Bamo te mashina yabo.
[Akabokoshi ne Fikope pe bula 27]
IFYO ABAICE BANOBE BALANDAPO
“Apo nomba ninkulako ninsambilila ukuti ilyo nshilacita icili conse, mfwile natontonkanyapo pa kutila nicita ifingalenga Lesa ukufulwa.”
“Ilyo nali umwaice, nalemona kwati bonse abashalecita ifyo nalecitako tabali bwino. Nomba, nalishiba ukuti fwe bantu tatwaba cimo cine, kabili ndafwaya ukwishiba ifyo bambi nabo baletontonkanya.”
[Ifikope]
Jeremiah
Jennifer
[Akabokoshi pe bula 28]
IFYO WINGEPUSHA ABAFYASHI BOBE
Ni finshi mumona ukuti e fyo nacenjelamo? Mibele nshi iisuma iyo mfwile ukukwata? Finshi fyalengele mushininwe ukuti amafunde ya kwa Lesa yasuma?
[Icikope pe bula 26]
(Nga mulefwaya ukumona bwino icikope, moneni muli magazini)
IFYO NCITA BWINO
IFYO NSHICITA BWINO
IFYO MFWAYA UKUCITA
IFYO NASUMINAMO
[Icikope pe bula 28]
Nga wabika sana amano ku fyo ufwaya ukuba, e lyo ukaba nge cimuti icishingawa nangu kwaba icimwela icikalamba sana