IFYO BAIBOLO ISAMBILISHA

Ifyo Lesa Aba

Bushe Lesa Akwata Umubili wa Musango Mshi?

“Lesa Mupashi.”—Yohane 4:24.

IFYO BAIBOLO ISAMBILISHA Baibolo ilondolola ukuti Lesa mupashi. (2 Abena Korinti 3:17) Apo mupashi, alitucila sana kabili te kuti tumfwikishe ne fyo aba. Ilembo lya 1 Timote 1:17 litila ni “Mfumu ya muyayaya, iishifwa, iishimoneka.” Baibolo ilanda no kuti: “Takwaba nangu umo uwamonapo Lesa.”—1 Yohane 4:12.

Kabumba wesu alikulisha sana ica kuti te kuti twelenganye ne fyo amoneka. Pali Esaya 40:18 patila, “Ni kuli nani mwingapashanya Lesa, kabili kuti mwatila apalana na cinshi?” Nangu fye muulu uutupapusha icine cine ku bukulu, ushalila fye ukutali nga ku-ulinganya kuli Lesa wa Maka Yonse.—Esaya 40:22, 26.

Lelo kwena, ku muulu kwaliba bamalaika abamona Lesa no kulanda nankwe. Balamona Lesa no kulanda nankwe pantu nabo bene mipashi kabili baba ku muulu. (1 Ishamfumu 22:21; AbaHebere 1:7) Yesu Kristu alelanda pali aba bamalaika abacila abantunse ilyo atile: “[Bamalaika] balamona lyonse icinso ca kwa Tata uwaba mu muulu.”—Mateo 18:10.

Bushe Lesa aba fye apali ponse?

“E ico imwe mufwile ukupepa ifi, amuti: ‘Shifwe wa mu muulu.’”—Mateo 6:9.

IFYO BAIBOLO ISAMBILISHA Baibolo taisambilisha ukuti Lesa aba fye apali ponse, nelyo ukuti maka fye yamo ifi. Nomba amashiwi Yesu alandile pali Mateo 6:9 na 18:10 yatulanga ukuti Lesa muntu pantu amwitile ukuti ni “Shifwe,” kabili ekala mu muulu mu ‘bwikalo bwakwe ububelelela.’—1 Ishamfumu 8:43.

Ilyo Yesu ali mupepi no kufwa, atile: “Ndefuma pano calo, no kuya kuli Tata.” (Yohane 16:28) Ilyo Yesu afwile ali no mubili wa buntunse lelo abuukile no mubili wa mupashi, kabili “aingile mu muulu mulya mwine fye, pa kuti amonekele ku cinso ca kwa Lesa.”—AbaHebere 9:24.

Ukwishiba ifi ifishinka pali Lesa kwalicindama. Mulandu nshi? Pantu ifi Lesa na o muntu, ninshi kuti twasambilila pali ena no kupalama kuli ena. (Yakobo 4:8) E lyo cimbi ca kuti nga twaishiba icine pali Lesa te kuti tubepwe no kupepa kwa bufi, umwaba abantu abapepa ifilubi ifishaba na mweo. Pali 1 Yohane 5:21 patila: “Mwe twana, muletaluka ku tulubi.”

Bushe amashiwi ya kuti Lesa apangile abantu mu cipasho cakwe yalola mwi?

“Lesa abumbile umuntu mu cipasho cakwe, mu cipasho cakwe e mo amubumbiile; umwaume no mwanakashi e fyo ababumbile.”—Ukutendeka 1:27.

IFYO BAIBOLO ISAMBILISHA Fwe bantunse, kuti twapashanya imibele ya kwa Lesa pamo nga ukutemwa, ubulungi, na mano. Na kuba, Baibolo itila: “Mulepashanya Lesa, apo muli bana bakwe abo atemwa kabili muletemwana.”—Abena Efese 5:1, 2.

Lesa alitupeela no buntungwa bwa kuisalila ico tulefwaya ukucita, kabili ici cilenga tulesalapo ukucita icisuma no kukanacita icabipa, e lyo tulacita ne fintu ifyalekanalekana ifilanga ukuti twalitemwa bambi. (1 Abena Korinti 13:4-7) Twalikwata na mano ya kupanga ifintu, ukuipakisha ifisuma ifyo Lesa apanga, e lyo no kutasha Lesa pa fipapwa ifyo apanga mu calo. Ne cacindamisha ca kuti Lesa atupanga mu nshila ya kuti tulefwaya ukusambilila pali ena no kwishiba ubufwayo bwakwe.—Mateo 5:3.

Ifyo icine caba mu Baibolo cingamwafwa. Nga tulesambilila sana pali Lesa no kulamupashanya, e lyo twakulakonka sana amafunde yakwe mu mikalile yesu. Nga tulecite ifi, e lyo tukaba sana ne nsansa no mutende wine wine. (Esaya 48:17, 18) Ca cine, Lesa alishiba ukuti imibele yakwe iisuma ilafika abantu pa mitima, kabili ilenga ababa ne mitima isuma ukufwaya ukupalama kuli ena no kwisaba no mweo wa muyayaya.—Yohane 6:44; 17:3.