IFYO BAIBOLO ISAMBILISHA

Satana

Bushe Satana Cine Cine Eko Aba?

‘Icisoka ca pa kutendeka, iciitwa Kaseebanya kabili Satana, cilufya aba pano isonde bonse.’ —Ukusokolola 12:9.

IFYO ABANTU BALANDA Abantu bamo bamona kwati Satana takwaba, lelo batila kwaba cimo mu mutima wa muntu icimutunka ukucita ifyabipa, ico cine e Satana.

IFYO BAIBOLO ISAMBILISHA Satana cine cine eko aba. Ni malaika uwapondokele Lesa kabili uumulwisha. Baibolo itila Satana e “kateka wa pano calo.” (Yohane 12:31) Abomfya “ifipesha amano ifya bufi,” e lyo no “kubepa” pa kuti acite ifyabipa ifyo afwaya.—2 Abena Tesalonika 2:9, 10.

Baibolo ilatweba ukuti kwalipo inshita imo ku muulu ilyo Satana alelanshanya na Lesa. Kanshi filya Lesa alelanshanya na Satana filangilila fye ukuti Satana te cintu cimo mu mutima wa muntu icimutunka ukucita ifyabipa, pantu Lesa alipwililika, e lyo akwata imibele ya mushilo, kabili te kuti akwate ububi ubuli bonse mu mutima. (Amalango 32:4; Yobo 2:1-6) Kanshi Satana te bubifi ubwaba mu mitima ya bantunse, lelo eko aba icine cine.

UMULANDU CACINDAMINA UKWISHIBA UKUTI SATANA EKO ABA. Satana afwaya abantu ukutwalilila ukusumina ukuti tabako pa kuti abantu bemwishiba nga filya fine ntalamisoka ashifwaya abantu ukumwishiba pa kuti atwalilile ukulacita ifyabipa. Kanshi pa kuti muicingilile kuli Satana, intanshi mulingile ukusumina ukuti eko aba.

Bushe Satana ekala kwi?

“Nomba cabipila imwe mwe sonde . . . pantu Satana Kaseebanya naikila pali imwe.”—Ukusokolola 12:12.

IFYO ABANTU BALANDA Abantu abengi bamona kwati Satana ekala mu mulilo wa pe, pa nshi ye sonde. Bambi nabo bamona kwati Satana aba mu mitima ya bantu ababipa.

IFYO BAIBOLO ISAMBILISHA Satana ni malaika wabipa kabili tamoneka. Inshita imo Satana ali ku muulu ukwaba Lesa na bamalika bacishinka kabili balimusuminishe ukulaendauka ukuli fye konse. (Yobo 1:6) Pali ino nshita Satana balimutamfya ku muulu ukwaba Lesa, kabili balimupoosa pano calo kumo ne fibanda fyakwe.—Ukusokolola 12:12.

Bushe ici calola mu kuti Satana aba fye ku ncende imo pano calo? Ku ca kumwenako, limbi mwalibelengapo ukuti mu musumba wa kale sana uwa Pergamo e mo ‘Satana aleikala.’ (Ukusokolola 2:13) Icalengele Yesu ukulanda aya mashiwi ni co muli ulya musumba mwali sana abalepepa Satana. Satana takwata icifulo cimo pano calo uko ekala. Lelo Baibolo itila “amabufumu yonse aya bantu ba pe sonde” yakwe.—Luka 4:5, 6.

Bushe Satana kuti acita ifibi ku bantu kabili kuti abatungulula?

“Icalo conse calaala mu maka ya mubifi.”—1 Yohane 5:19.

IFYO BAIBOLO ISAMBILISHA Satana alilufya abantu abengi nga nshi kabili alabatungulula. (2 Abena Korinti 11:14) Ici cine cishinka calilenga twaishiba umulandu abantunse bafililwa ukuwamya imikalile mu calo conse.

Na kabili, Baibolo yalilanda na pa fintu ifyacilanapo ukubipa ifyo Satana nelyo ifibanda bacita ku bantu batungulula.—Mateo 12:22; 17:15-18; Marko 5:2-5.

FINSHI MWINGACITA? Tamufwile ukutiina amaka ya kwa Satana. Pa kuti Satana elamitungulula, mulingile ukusambilila ifyo abepaika abantu, no ‘kwishiba amapange yakwe.’ (2 Abena Korinti 2:11) Nga mulebelenga Baibolo, kuti mwaishiba bwino bwino ifyo Satana acita pa kuti aletungulula abantu kabiili takalemitungulula.

Mulingile ukupoosa fyonse ifyo mwakwata ifyakuma ifibanda. (Imilimo 19:19) Ifintu pamo nga impinga, ifitabo filanda pa fibanda, amafilimu, inyimbo, e lyo na maprogramu ya pa kompyuta ayakoselesha ukumfwana ne fibanda nangu ukubuka.

Baibolo itila, “Kaaneni Satana Kaseebanya, na o akafulumuka kuli imwe.” (Yakobo 4:7) Nga muleumfwila ukufunda kwa mano ukwaba muli Baibolo, kuti mwaicingilila ku fiteyo fyabipa ifya kwa Satana. —Abena Efese 6:11-18.