Ukucula

Bushe Lesa e ulenga tulecula?

“Cine cine, Lesa tacita ifyabipa.”—Yobo 34:12.

IFYO ABANTU BALANDA.

Abantu bamo batila ifintu fyonse ificitika kufwaya kwa kwa Lesa. Basumina ukuti Lesa e ulenga tulecula. Ku ca kumwenako, nga kwaba akayofi batontonkanya ukuti Lesa e waleta akayofi pa kuti akande abantu pa membu shabo.

IFYO BAIBOLO ISAMBILISHA.

Baibolo isambilisha ukuti Lesa te ulenga abantu balecula. Ku ca kumwenako, Baibolo ilanda ukuti nga twatunkwa tatufwile ukutontonkanya ukuti ‘Ni Lesa e uletuntunka.’ Mulandu nshi? Pantu “takuli uwingatunka Lesa ukucita ifyabipa, kabili umwine tatunka umuntu iyo.” (Yakobo 1:13) Kanshi, Lesa te ulenga tulekwata amesho nelyo ukucula. Na kuba, nga ca kuti Lesa e ulenga tulecula ninshi alacita ifyabipa. Nomba Baibolo itila, “Lesa tacita ifyabipa.”—Yobo 34:12.

Nomba nga ca kuti Lesa tacita ifyabipa, ninshi nani nelyo finshi filenga tulecula? Icabipisha ca kuti, ilingi abantu balacusha abantu banabo. (Lukala Milandu 8:9) Na kabili, cimbi icilenga tulecula “fintu fyabula ukwenekela,” e kutila, ukuba pa cifulo apo ubusanso bwacitika pa nshita ilya ine bwacitika. (Lukala Milandu 9:11) Baibolo isambilisha ukuti “kateka wa pano calo,” Satana Kaseebanya e ulenga sana ukuti tulecula pantu “icalo conse calaala mu maka ya mubifi.” (Yohane 12:31; 1 Yohane 5:19) Kanshi Satana e ulenga abantu balecula te Lesa iyo.

Bushe Lesa alomfwa ububi nga amona ifyo tulecula?

“Lyonse ilyo balecula, na o alecula.”—Esaya 63:9.

IFYO ABANTU BALANDA.

Abantu bamo batontonkanya ukuti Lesa tabikako amano ku fyo abantu bacula. Ku ca kumwenako, kalemba umo alembele ukuti, Lesa “tomfwa uluse abantu nga balecula.” Atile Lesa nga e ko aba, ninshi “tabikako amano nangu panono” ku bantu.

IFYO BAIBOLO ISAMBILISHA.

Baibolo taisambilisha ukuti Lesa tabika amano ku bantu, lelo isambilisha ukuti Lesa alomfwa ububi ukumona abantu balecula no kuti nomba line ali no kufumyapo fyonse ificusha abantu. Moneni ifintu fitatu ifyo Baibolo isambilisha ifingatusansamusha.

Lesa aleshiba amafya tukwata. Ukutula fye ilyo abantunse batendeke fye ukucula, Yehovaa alamona ifilamba fyonse ifyo abantunse balila, pantu “amenso yakwe ayabeeka” yalamona ifintu fyonse. (Amalumbo 11:4; 56:8) Natulangilile, ilyo abantu bakwe aba ku kale balebacusha, Lesa atile: “Nimona ukucula kwa bantu bandi.” Bushe Lesa apelelele fye pa kumona ukuti balecula? Awe, umwine atile: “Ninjishiba ukukalipwa balekalipwa.” (Ukufuma 3:7) Ukwishiba ukuti Lesa aleshiba amafya yonse ayo tukwata, pamo na yalya aya kuti tapali umuntu uuyeshibe nelyo ukwishiba ifyo ayo mafya yaletukalifya, cilasansamusha abantu abengi.—Amalumbo 31:7; Amapinda 14:10.

Lesa alomfwa ububi nga tulecula. Yehova Lesa tapelela fye pa kwishiba ifiletucusha lelo alomfwa sana no bubi ukumona ifyo tulecula. Ku ca kumwenako, ilyo abantu bakwe aba ku kale bakwete amafya, Lesa alyumfwile ububi sana. Baibolo itila: “Lyonse ilyo balecula, na o alecula.” (Esaya 63:9) Nangu ca kuti Lesa alisumbukisha ukucila abantunse, alomfwila abantu abalecula uluse, ciba kwati na o aleumfwa ubukali ubo baleumfwa! Cine cine “Yehova wa nkumbu nga nshi kabili wa luse.” (Yakobo 5:11) Na kabili, Yehova alatwafwa ukushipikisha amafya.—Abena Filipi 4:12, 13.

Lesa akafumyapo fyonse ificusha abantu. Baibolo isambilisha ukuti Lesa akafumyapo fyonse ifilenga abantu ukucula. Yehova akabomfya Ubufumu bwakwe ubwa ku muulu ku kuwamya imikalile ya bantu pe sonde. Baibolo yalaya ukuti pali ilya nshita, Lesa “akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” (Ukusokolola 21:4) Nomba cikaba shani ku bafwa kale? Nabo Lesa akababuusha pa kuti nabo bene bakekaleko mu calo umushakabe ukucula. (Yohane 5:28, 29) Bushe abantu bakalaumfwa ububi pa mulandu wa kwibukisha ifyabipa ifyabacitikile? Awe, Yehova alaya ukuti: “Ifya kale fikalabwa, kabili tafyakese na mu mutima.”—Esaya 65:17.b