Bushe Lesa E ko Aba? Ico Cacindamina Ukwishiba Icasuko

Abengi bamona kwati te kuti beshibe nga Lesa e ko aba nelyo iyo, e lyo bambi nabo bamona kwati ici cipusho tacacindama. Ba Hervé, abakuliile ku France, batile: “Nangu ca kuti nshaba pa batila takwaba Lesa nelyo abatila te kuti beshibe nga ca kuti Lesa e ko aba nelyo iyo, ukuba kwena nshacetekela muli Lesa. Ine mona fye ukuti umuntu alingile ukulabomfya fye amano ya cifyalilwa. Umuntu takabila ukusumina muli Lesa pa kuti alebomfya amano ya cifyalilwa.”

E lyo bambi nabo kuti balanda nge fyalandile ba John, aba ku United States, abatile: “Abafyashi bandi tabasumine muli Lesa. Ilyo nali umulumendo nshaishibe nga ca kuti Lesa e ko aba nelyo iyo. Lelo inshita shimo naleyipusha nga ca kuti e ko aba.”

Inga imwe, bushe mwalibala amuyipushapo nga ca kuti Lesa e ko aba, nelyo umulandu kwabela ubumi? Nalimo mwalishibako ifintu fimo ifyo tushingalondolola bwino umulandu fyabela ifyo ukwabula ukusumina ukuti kwaliba uwafibumbile. Ku ca kumwenako, kwaliba ifintu ifingi ifilenga ifya mweo ukutwalilila ukubako, nomba cilafya ukulondolola umulandu ifi ifintu fishafulila nelyo ukucepa ukucila mu cipimo kabili abasambilila sayansi basanga ukuti ifintu ifipema te kuti fifume ku fishipema.—Moneni akabokoshi kaleti, “Moneni Ubushininkisho.”

Tontonkanyeni pa fyo twalandapo pa muulu. Ifi fishinka kuti fyatwafwa ukwishiba icintu icacindama. Na kuba, nga mwasanga ubushininkisho bwa kuti Lesa e ko aba e lyo no kwishiba bwino bwino ifyo aba, mukanonkelamo nga nshi. Moneni ifya kumwenako fine.

1. ICO TWABELA PA CALO

Nga ca kuti kwaliba umulandu kwabela ubumi, tufwile ukwishiba uyo mulandu kabili no kwishiba ifyo watukuma. Pantu na kuba, nga ca kuti Lesa e ko aba lelo tatwaishiba ukuti e ko aba, ninshi tatwaishiba icishinka icacindamisha mu bubumbo.

Baibolo itila Lesa e ntulo ya fya mweo. (Ukusokolola 4:11) Bushe ukwishiba ukuti Lesa e ntulo ya bumi, kuti kwatwafwa shani ukwishiba ifyo twabela pano calo? Moneni ifyo Baibolo isambilisha pali ici.

Pa fintu fyonse ifyaba pa calo, abantu bali-ibela sana. Baibolo itila, twabumbwa mu cipasho ca kwa Lesa, e kutila twakwata imibele iyo nao akwata. (Ukutendeka 1:27) Na kabili, Baibolo itusambilisha ukuti abantu kuti baba ifibusa fya kwa Lesa. (Yakobo 2:23) Takuli icingalenga twaba ne nsansa ukucila pa kuba na bucibusa na Kabumba wesu.

Calola mwi ukuba cibusa wa kwa Lesa? Ba cibusa ba kwa Lesa balalanda nankwe mu kulungatika. Kabili abalaya ukuti akalakutika kuli bene no kubafwa. (Amalumbo 91:15) Nga twaba ifibusa fya kwa Lesa, tukeshiba ifyo atontonkanya pa fintu ifyalekanalekana. Ici kuti calenga twaishiba ifingi pa fintu ifyacindama ifyo tufwaisha ukwishiba pa bumi bwesu.

2. TABACULA NO MUTIMA

Natulangilile, abantu bamo tabasumina muli Lesa pa mulandu wa kumona ifyo abantu balecula isonde lyonse. Balepusha abati, ‘Mulandu nshi Kabumba uwa maka yonse alekela amacushi ne fyabipa ukulacitika?’

Icasuko Baibolo yaasuka cilatusansamusha sana, itweba ukuti Lesa tabumbile abantu ukuti bakalecula. Ilyo Lesa abumbile abantu, tabalecula. E lyo kabili talefwaya ukuti balefwa. (Ukutendeka 2:7-9, 15-17) Bushe ubu bufi? Nelyo fya kwelenganya fye? Awe nakalya. Nga ca kuti Kabumba wa maka yonse e ko aba kabili nga ukutemwa e mibele yakwe iyapulamo, ninshi ifi fine e fyo alefwaya abantu ukulaikala.

Finshi fyalenga ukuti abantu balecula? Baibolo ilondolola ukuti Lesa abumbile abantu na mano ya kuicitila ifyo balefwaya. Lesa tatupatikisha ukucita fyonse ifyo alefwaya, ifwe tatuli maroboti iyo. Abafyashi bakubalilapo uko abantu bonse bafuma, baisalilepo fye abene ukukaana ubutungulushi bwa kwa Lesa. Mu nshita ya kumfwila Lesa, bakonkelele ifyo imitima yabo yalefwaya. (Ukutendeka 3:1-6, 22-24) E calenga ukuti tuleba na mafya.

Ukwishiba ukuti takwali kufwaya kwa kwa Lesa ukuti abantu balecula kulalenga imitima yesu ilacula sana. Na lyo line, tulafwaya ubwafwilisho ku macushi tukwata. Tulafwaya ukuba ne subilo.

3. ISUBILO

Ilyo abantunse babembwike fye, Lesa alaile ukuti mu kupita kwa nshita akalenga isonde likabe filya fine lyali pa kubala. Apo wa maka yonse, takuli nangu cimo icikalenga akafilwe ukufikilisha ubufwayo bwakwe. (Esaya 55:11) Nomba line, Lesa ali no kufumyapo fyonse ifyabipa ificitika pa mulandu wa bucipondoka, kabili icalo na bantu bakaba filya fine alefwaya pa kabala ntanshi.

Bushe mukanonkelamo shani? Moneni ifintu fibili ifyalembwa muli Baibolo ifyo Lesa atulaya.

• AKAFUMYAPO ABABIFI NO KULETA UMUTENDE PA CALO. ‘Kwashala fye panono no mubifi takabepo; Awe ukalolekesha apo aali, no kusanga talipo. Lelo abafuuka e bakekala mu calo, Kabili bakasekelela nga nshi pantu umutende ukafula.’—Amalumbo 37:10, 11.

• AKAFUMYAPO AMALWELE NE MFWA. “Takuli umwikashi uukatila: ‘Nindwala.’” (Esaya 33:24) “Akamina imfwa umuyayaya, kabili Shikulu Mulopwe Yehova akafuuta ifilamba ku menso yonse.”—Esaya 25:8.

Mulandu nshi twingacetekelela amalayo ya kwa Lesa ayaba mu Baibolo? Pantu kwaliba ubushininkisho ubulanga ukuti amasesemo ayengi ayabamo yalifikilishiwe. Na lyo line, ukwishiba ukuti ku ntanshi Lesa akafumyapo ukucula takufumyapo amacushi twakwata. Bushe Lesa atwafwa shani pali ino nshita?

4. UKO TWINGASANGA UBWAFWILISHO

Lesa alitupeela ifingatwafwa ukushipikisha amafya e lyo ne fingatwafwa ukwishiba ifya kupingula bwino pa fintu. Ifingi ifyo tusala ukucita tafiba fikalamba sana, lelo fimo fyena kuti fyakuma ne mikalile yesu ku ntanshi. Takwaba umuntu uwingatupanda amano ayengatwafwa sana ukucila pali Kabumba wesu. Ena alishiba ifyacitike kale ne fikacitika ku ntanshi kabili e wapangile na bantu bene. Kanshi alishiba ifingatuwamina.

Muli Baibolo e mo twingasanga ukupanda amano ukwafuma kuli Yehova Lesa, pantu e waebele abalelemba Baibolo ifya kulemba. Baibolo itila: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo.”—Esaya 48:17, 18.

Lesa alikwata amaka, kabili aliitemenwa ukubomfya amaka yakwe ku kutwafwa. Baibolo ilondolola ukuti Lesa ni Shifwe wa kutemwa uufwaisha ukutwafwa. Itila: “Shinwe wa mu muulu ena akacishapo ukupeela umupashi wa mushilo ku bamulomba!” (Luka 11:13) Aya maka kuti yatutungulula no kutukosha.

Nomba kuti mwacita shani pa kuti Lesa alemwafwa? Baibolo itila, “Uupalamina kuli Lesa afwile ukusumina ukuti e ko aba no kuti alalambula abamufwaisha.” (AbaHebere 11:6) Pa kuti mushininkishe ukuti Lesa e ko aba, mwe bene mulingile ukuimwena ubushininkisho.

BUSHE MUKAFWAILISHA ICINE PALI LESA?

Kwena palapita inshita pa kuti umuntu eshibe Lesa bwino bwino, lelo nga mwamwishiba kuti mwanonkelamo. Umfweni ifyalandile ba Xiujin Xiao, abafyalilwe ku China, abekala mu United States. Batile: “Nangu ca kuti nasumine ukuti ifintu fyasangwike fye, nalefwaya ukwishiba ifyaba muli Baibolo. E ico natendeke ukusambilila Baibolo ne Nte sha kwa Yehova. Mu mwaka nalepwishishamo amasambililo yandi pa koleji, nabikile sana amano ku masomo yandi ica kuti nshabikileko amano ku fyo nalesambilila muli Baibolo. Ne ci canengele ukukanaba ne nsansa. Nomba ilyo naishilebikako amano ku kusambilila Baibolo, nali ne nsansa sha cine cine.”

Bushe kuti mwatemwa ukusambilila na fimbi pali Kabumba wesu, Yehova Lesa? Kuti mwafwayako inshita ya kusambilila pali uyu mulandu.