Ba Nte balipulinta ututabo tutila Sambilileni Ukubelenga no Kulemba utwingi nga nshi mu ndimi ukucila pali 100.

Ukusambilisha Abantu Baibolo Kwalilenga Abengi Baishiba Ukubelenga

Akabungwe kalolekesha pa masambililo aka UNESCOa katile: “Umuntu onse alikwata insambu sha kwishiba ukubelenga no kulemba pantu ukwishiba ukubelenga no kulemba kulalenga umuntu aishibilako ifingi e lyo kuti alelanshanya bwino na bantu bambi.”

ABAFWAILISHA pa fintu basanga ukuti mwi sonde lyonse, abantu ukucila pali 700 milioni aba myaka 15 no kuya pa muulu tabaishiba ukubelenga no kulemba. Ici calenga abengi beishiba ifyaba muli Baibolo “ifyalembelwe ku kutufunda” pa mibele iisuma, pali Lesa e lyo na pa fintu fye fimbi. (Abena Roma 15:4) E ico mu fyalo ifingi, Inte sha kwa Yehova tabasambilisha fye abantu Baibolo, lelo balabasambilisha ne fya kubelenga no kulemba ukwabula ukubalipilisha. Bushe abo basambilisha baleshiba ukubelenga no kulemba?

Lekeni tulande pa fyo ba Nte babomba uyu mulimo mu Mexico, umo abantu balanda sana iciSpanish. Ukufuma mu 1946, Inte sha kwa Yehova balisambilisha abantu ukucila pali 152,000 ukwishiba ukubelenga no kulemba, kabili aba nabo balitendeka ukusambilishako bambi. Aba mu buteko balilemba amakalata ayengi aya kutasha ba Nte pa mulimo babomba. Kalata imo yatile: “Aba mu kabungwe ka General Board of Education balishiba ifyo mubombesha pa kwaafwa abantu ukwishiba ukubelenga no kulemba kabili balemutasha pa mulimo mubomba.”

Abaice na bakalamba balisambilila ukubelenga no kulemba. Ku ca kumwenako, ba Josefina baali ne myaka 101 ilyo batendeke ukusambilila ukubelenga no kulemba kabili bapwile ili isukulu ilyo papitile imyaka ibili.

Nangu ca kuti abena Mexico abengi balanda iciSpanish, abantu balasambilila ukubelenga na mu ndimi shimbi. Mu 2013, abantu abalanda indimi 8 isha mu Mexico, balisambilile ukubelenga no kulemba mu ndimi shabo.

Abantu abaishiba ukubelenga no kulemba baleshiba ifintu ifingi. Ne cawamisha ca kuti abantu nga baishiba ukubelenga, balatendeka ukubelenga Baibolo, icitabo icafuma kuli Lesa icilenga abantu ukuleka ukutiina imipashi, ukukanabepwa ku basambilisha ifya bufi pali Lesa, kabili ilabafwa no kukanaba ne mibele yabipa.—Yohane 8:32.

a United Nations Educational, Scientific, and Cultural Organization.

BALIPAPWISHE BALUPWA LWABO

Ba Daniel basambilile ululimi lwa bankomamatwi ulwa ku Mexico ukubomfya ama DVD

Ba Daniel ni bankomamatwi kabili balefilwa ukulanshanya bwino na bantu. Ici calelenga ilingi line balefulwa kabili tabaleumfwana na balupwa lwabo. Ilyo baali ne myaka 23, ba Josué, ba Nte abashilanda, batendeke ukubasambilisha Baibolo. Pa kubala, balebasontelela fye e lyo no kubalengela ifikope. Lyena batendeke ukusambilila ululimi lwa bankomamatwi ulwa ku Mexico ukubomfya ama DVD.b

Ilyo ba Daniel balesambilila Baibolo, baishilefwala ico Baibolo iita ukuti “ubuntu bupya,” ubulenga umuntu aaba ne mibele pamo nga “inkumbu, icikuuku, ubupete, ukufuuka, no kushishimisha.” (Abena Kolose 3:10, 12) Ba Daniel balitendeke no kumfwila abafyashi e lyo no kubacindika nga fintu Baibolo ilanda. (Abena Efese 6:1, 2) Balupwa lwabo balipapile icine cine! Abafyashi ba ba Daniel balitashishe ba Josué pa fyo bayafwile ba Daniel, ninshi balelukusha ne filamba. Mu 2007, ba Daniel balibatishiwe, baba Inte ya kwa Yehova.

b Mu Mexico, impapulo 46 isha Inte sha kwa Yehova mu lulimi lwa bankomamatwi shaliba pa ma DVD. Pa webusaiti yesu iya jw.org, paliba impapulo mu ndimi sha bankomamatwi mupepi na 80. Pa kuti abashimona nabo balesambilila, paliba ne mpapulo sha bashimona.