Mulepanga Ifibusa Na Bantu Abalekanalekana

Ubwafya Ububako

Nga twaitalusha ku bantu abo tushatemwa, ninshi akapaatulula twakwata kakakulilako. Na kabili nga ca kuti tulepanga fye ifibusa na bantu abo twapalana nabo mu fyo tucita ifintu, tukalamona kwati ifyo tutontonkanya, ifyo tumfwa pa fintu ne fyo tucita e fyaba fye bwino epela.

Ifyo Baibolo Ilanda

“Kusheni ukutemwa kwenu.”—2 ABENA KORINTI 6:13.

Bushe ili ilembo lyalola mwi? Nga twatemwa fye abantu abo twapalana nabo mu fintu fimo, ninshi tatulekusha ukutemwa. Pa kuti tukushe ukutemwa, tulingile ukulapanga ifibusa na bantu abo twapusana nabo mu fintu.

Ifyo Ukupanga Ifibusa na Bantu Abalekanalekana Kutwafwa Ukuleka Ukuba na Kapaatulula

Nga twaishiba bwino abantu, tuleshiba ico twapusanina nabo mu fyo tucita ifintu. Kabili ilyo bucibusa bwesu bulekoselako, tulatendeka ukubamona ukuti baba fye nga ifwe. Tulaya tulebatemenwako, ne ci cilalenga tulesekelela ilyo balesekelela no kuba no bulanda nga bali no bulanda.

Natulande pali ba Nazaré. Pa nshita imo balipatile abafuma ku fyalo fimbi. Ilyo balekele ukuba na kapaatulula, batile: “Ilyo natendeke ukuba nabo pa nshita iitali no kubomba nabo, nalimwene ukuti ifyo abengi balelanda pali aba bantu fya bufi. Nga ca kuti wapanga ifibusa na bantu abo wapusana nabo intambi kuti waleka ukuba na kapaatulula kabili kuti watendeka ukubatemwa.”

Ifyo Mwingacita

Mule-esha na maka ukulanda na bantu abafuma ku fyalo fimbi, abo mwapusana nabo umushobo nelyo abo mwapusana nabo ululimi mulanda. Kuti mwaeshako ukucita ifi

Mulebepusha pa kuti balemwebako ifyabacitikilapo.
Mulebetako ku fya kulya.
Mulekutikisha ilyo balemushimikila amalyashi, kabili mulemona ifyo babikako sana amano.

Nga mwaishiba bwino ifyabacitikilapo, mukeshiba icalenga balecita ifintu fimo, ne ci cikalenga mukabatemwe.

Ifyacitike ku Bantu bamo: Ba Kandasamy na ba Sookammah (Aba ku Canada)

“Twakulile mu South Africa pa nshita ilyo kwali ifunde ilyalepaatulula abafiita ku babuuta. Abafiita tabalebasuminisha ukwikala mu mushi umo wine na babuuta, ne ci calilengele bapatane sana. Apo tatwali pa bantu babuuta, twalibapatile sana kabili twalemona kwati ifyo twalecita fyali fye bwino pantu balitusuulile. Pali ilya nshita tatwaishibe ukuti twali na kapaatulula, lelo twalemona kwati ababuuta e bali na kapaatulula.

“Pa kuti tuleke ukuba no lupato, twalitendeke ukupanga ifibusa na bantu aba mishobo ne nkulilo ishalekanalekana. Ilyo twatendeke ukupanga ifibusa na bantu babuuta, twalimwene ukuti tatwapusana sana nabo. Ifitucitikila fimo fine kabili na mafya tukwata yamo yene.

“Pa nshita imo twalisungilepo abantu babili abaupana ababuuta pa nshita iitali. Ici calilengele twabeshiba bwino. Kabili twalemona fye ukuti twalilingana. E ico pali ino nshita twalileka ukupata ababuuta.”