Bushe Ifya Kupangapanga Filenga Mwalaumfwana Shani Na Bana?
Abakalamba cilabafya ukwishiba ifya kubomfya bwino ifya kupangapanga, lelo abaice bena cilabangukila pantu balasambilila bwangu.
Nalyo line bamo basanga ukuti, abacaice ababomfya sana Intaneti . . .
tabafwaya ukuleka ukubomfya amafoni nelyo amakompyuta.
balapumya abanabo pa Intaneti.
balatamba ifye shiku mukukanaishiba e lyo bambi nabo batamba fye ku mufulo.
IFYO MUFWILE UKWISHIBA
UKWIKALILA FYE UKUBOMFYA IFYA KUPANGAPANGA
Pa Intaneti paliba ifyangalo ifyo bapanga mu nshila ya kuti nga watendeka ukufiteya takuli ukufwaya ukuleka. Icitabo ca Reclaiming Conversation catile, “Ama programu yamo ayaba pa mafoni bayabikilapo ukuti tulepoosa inshita iikalamba pa foni.” Nga tulepoosa inshita iikalamba pali aya maprogramu ya pa foni cilenga abapangile aya maprogramu ukukwata indalama ishingi.
TONTONKANYENI PALI ICI: Bushe abana benu balapoosa inshita iikalamba pa mafoni nelyo pa makompyuta? Kuti mwa-afwa shani abana benu pa kuti belapoosa inshita iikalamba sana pa mafoni nelyo pa makompyuta?—ABENA EFESE 5:15, 16.
UKUPUMYA ABANTU PA INTANETI
Abantu bamo ababa pa Intaneti balalanda amashiwi ayabipa, kabili balasaalula no kupumya abanabo.
Icilenga abantu bamo ukulacita ifi, nico bafwaya ukwishibikwa sana pa Intaneti. Inshita shimo umuntu nga asanga ukutila abantu bamo abo angala nabo pa Intaneti tabamwitileko ku parte, kuti alamona kwati balemupumya.
TONTONKANYENI PALI ICI: Bushe abana benu balalanga imibele iisuma nga bali pa Intaneti? (Abena Efese 4:31) Bushe balomfwa sana ububi nga ca kutila tabalecitako ifyo abanabo balecita?
UKUTAMBA IFYE SHIKU
Abantu balabika sana ifye shiku pa Intaneti ica kuti tacafya no kufisanga. Abafyashi balabikila abana babo pa mafoni ifya kubacingilila pa kuti tabatambile ifye shiku pa Intaneti. Lelo abafyashi balingile ukwishiba ukuti ukucita ifi te lyonse kwingabafwa.
Mu fyalo fimo mulandu ku buteko ukutumishanya ifyebo nelyo ifikope fye shiku. Inshita shimo abacaice nga baletumishanya amashiwi ne fikope fye shiku balabapingula ukulingana no mushinku e lyo na mafunde ya calo.
TONTONKANYENI PALI ICI: Kuti mwacita shani pa kwafwa abana benu pa kuti belatunkwa ukutumishanya ifikope fye shiku pa Intaneti?—ABENA EFESE 5:3, 4.
IFYO MWINGACITA
MULESAMBILISHA ABANA BENU
Nangu ca kuti abana cilabangukila ukwishiba bwangu ifya kubomfya Intaneti ne fya kupangapanga, balakabila ukulabatungulula. Icitabo cimo calandile ukutila, “te kuti ciwame ukupeela umwana foni iiya pa Intaneti ukwabula ukumusambilisha ifya kuibomfya pantu ukucita ifi cimo no kuponesha umwana mu mumana uushaishiba ukowa.”
IFYO BAIBOLO ILANDA: “Sambilisha umwaice umo afwile ukubela; ne lyo akakota takafumemo.”—AMAPINDA 22:6.
Moneni fimo ifyo mwingatemwa ukucita, nelyo lembeni fimo ifyo mulemona ukutila kuti fyamwafwa.
Mfwile ukulanshanya no mwana wandi ifyo engalalanga ukuti aliba ne mibele iisuma ilyo ali pa Intaneti
Mfwile ukwafwa umwana wandi ukukanalaumfwa ububi nga talecitako ifyo abanankwe balecita
Mfwile ukucingilila umwana wandi pa kuti tatambile ifintu ifyabipa ifisangwa pa Intaneti
Libili libili mfwile ukulamona ifyo umwana wandi abomfya Intaneti
Mfwile ukumubikila inshita iyo alingile ukuleka ukulabomfya foni cila bushiku
Mfwile ukweba umwana wandi ukuti tafwile ukulabomfya foni nga aya mu kulaala
Mfwile ukweba umwana ukuti tapali uulingile ukulabomfya foni nga tulelya