Isambililo 38

Leka Ukulunduluka Kobe Kumoneke

1, 2. Mulandu nshi uo ifwe bonse tulingile ukulatontonkanishisha pa fya kulunduluka?

¹ Pa kuba nausambilila mu kusakamanisha no kubomfya amasambililo yonse muli cino citabo, bushe nomba uli uwaiteyanya ukupwisho kusambilile Sukulu lya Butumikishi bwa Teokrasi? Iyo, pantu uyu ni programu watwalilila uwa kukansha uwa butumikishi. Ukukuma ku kututila ukwishiba kwa bukapepa no kubomfya fintu usambilila, takwabako kupwisho kusambilila. Ukucila, pamo ngo musambi wa mukoosha kuti watwalilila ukulunduluka mu musango umoneka ku babeleshanya na iwe.

² Umutumwa Paulo akoseleshe kapepa munankwe wacaice Timote ‘ukubika umutima pa kubelenga, ukucincisha, no kusambilisha, ukuba no mute ku fintu aali nasambilila, ukwikala muli fyene, ukuti ukulunduluka kwakwe kwingamoneka kuli bonse.’ (1 Tim. 4:13, 15) Na iwe, wine, pamo nga kapepa wa kwa Lesa umo wine kuti walengo kulunduluka kobe ukumoneka kuli bambi. Kuti watwalililo kulunduluka ukwabulo kufika pa cipimo apo wingatila ishuko lya kulunduluka epo lyapelela. Yehova e ntulo ya kwishiba kwa cine konse, kabili iyo ntulo yaba nge cishima cishingakama ica menshi yapembesula. Nelyo tushingafika pa nshi ya ciko mu kukumanina, kuti twatwalililo kulatapamo ubumi no kupembesulwa ku ciyayaya. (Rom. 11:33, 34; Esa. 55:8, 9) Ni shani, lyene, fintu ukulunduluka kobe kwingamoneka ku bamonako?

3, 4. Ni shani fintu ukulunduluka kulangishiwa mwi sukulu lya butumikishi na pa kulongana kwa cilonganino kumbi?

³ Inshila umo ukulunduluka kumonekela. Inshila imo iyo ukulunduluka kobe kumonekelamo ni mu malyashi yobe aya mwi sukulu lya butumikishi. Limbi kuti wayumfwe fyo taulundulwile apakalamba, lelo bambi limbi kuti bamono kulunduluka kobe ukucila ifyo uimona. Muli uku kuloshako bonse twapalo mwaice uuimona ukukokola mu kukula, lelo lintu balupwa bakwe batandala, bapapa abati: “Iye, ifyo ukulile!” Ibukisha ilyashi lya kubalilapo fye wapeele mu sukulu. Bushe ulalibukisha? Lilinganye na malyashi yantu wapeela pali nomba line. Walisambilile fyafula no kunonka ukubelesha kwaumo mutengo ukutule lyo, bushe te fyo? Lyene twalililo kulaselela ku ntanshi.

⁴ Te mu malyashi ya mwi sukulu lya butumikishi mweka umo ukulunduluka kumonekela. Kulamoneka na pa kulongana kwa cilonganino. Bushe ulasangwa ku kulongana lyonse? Nga ulasangwako, cilangisho ca kuti uleselela ku ntanshi, ukuti ulatesekesha ukupayanya kwa kwa Yehova ukwa ku busuma bwesu bwa ku mupashi. Mu kulundapo, imibele ya fyasuko fyobe pa kulongana kuti yapeelo bushininkisho bwa kulunduluka. Abo abasukapo mu mashiwi yabo abene, mu cifulo ca kuyabelenga fye, balango kulunduluka. Mu kupalako, abalanda pa bupilibulo no mutengo wa fyebo filesambililwa mu bumi bwesu balanga ukuti balelundululo kwiluka. Muli ifyo, ukusangwa lyonse pa kulongana ne mibele ya kwakanamo kwa umo pa lwakwe fyaliwaminwo kumonwa pa kulanguluka apo ukulunduluka kupelele.

5. Cinshi cipeela ubushininkisho bwa kulunduluka kwa umo mu butumikishi bwa mwi bala?

⁵ Kabili ni shani pa lwa kulunduluka kobe mu butumikishi bwa mwi bala? Ibukisha fintu wayumfwile lintu waile pa mwinshi wa kubalilapo ilyo watendeke fye ukufumina mu mulimo? Linganya ico na maka wakwata pa minshi nomba. Kwalibako kuwamyako, bushe te fyo? Kabili nalyo line, ukwabulo kutwishika walishibo kuti kuliko ukukabila kwa kuwamyako kwakulilako mu fyo wingaba uufumamo cimo lintu uleshimikila no kusambilisha. Na kabili, bushe kuti wakushako ukwakanamo mu mbali shonse sha mulimo isho wingabombako? Umutumwa Paulo akonkomeshe ati: “Nge fyo mwapokelele kuli ifwe umo mufwile ukwendela no kutemwina Lesa, ifyo kabili mwenda, . . . mucilishemo.” (1 Tes. 4:1) Lintu uletwalililo kulunduluka, ukwakanamo mu kucishamo mu mulimo wa kwa Yehova, te kushimikila kobe fye no kusambilisha ifikaba ifyacilapo kufumamo cimo, lelo no kutesekesha kobe ukwe shuko lya kubombela Yehova kukashikilako. Nangu lintu ukwankulako kwa bene ŋanda kushiweme, nalyo line ukalacimona ukube shuko ukubomfiwa na Yehova ku kutwala ubukombe bwakwe ku bantu.

6. Ni shani fintu imilandile ya umo ingabelebesho kukula kwa ku mupashi?

⁶ Ukulunduluka kwa umo na kabili kumonekela mu kulanshanya. Yesu atile ‘ukufuma ku kupaka kwa mutima e ko akanwa kalandila.’ (Luka 6:45) Lintu ukulanshanya kwa umo na bambi kutonta sana sana pali Yehova ne mifwaile yakwe, ciba icamonekesha ukuti kuliko ukulunduluka. Cilangisho kuti uyo muntu alekula mu kutesekesha Yehova, ukuti alepalamisha kuli Lesa. Kabili ilyo twapalamisha kuli wene, e lyo cicililako kubomba nge ca kutucingilila.

7. Ni kwi kuntu ukulunduluka mu kubomfye fishinte fya Baibolo kwingamonekesha?

⁷ Ukulunduluka kumonekela na kabili mu kubomfye fishinte fya Baibolo mu bumi bwa cila kasuba. Bushe tacabe ca cine ukuti uisanga ukulacite fintu mu kupusanako nomba ukucila ifyo walecita kale intanshi taulabeleshanya ne Cebo ca kwa Yehova? Mu kupalako uku kulunduluka mu kulacite fintu mu nshila ya kwa Yehova kubelebeshiwa mu mibombele yobe ukuli konse. Kulamoneka mu ŋanda mu mobe, mu kubomba kobe ne filundwa fimbi ifya ba mu ŋanda yobe. Kulamoneka ku fintu ubomba pa fishingamo fyobe. Pa ncito yobe ya ku mubili ulaba uwacilamo kusakamana ukubomfye fishinte fya Baibolo. Conse ici bushininkisho bwa kuti naulunduluka ukufika ku cipimo cimo. Lelo pano na po ifwe bonse kuti twabombela pa kuwamyako, ukufwayo kulabomfye fishinte fya Baibolo mu kucishapo.

8, 9. Nga twaitemenwa ukubomfiwa ku kwafwilishako bakasabankanya bambi, cinshi cintu ici cilangilila, kabili mashuko nshi yabako kuli ici?

⁸ Itemenwe ukubomfiwa. Inshila imbi umo ukulunduluka kumonekela yaba kuitemenwa ukubomfiwa mu mulimo wa kwa Yehova ku cipimo cakulilako. Ilumbo 110:3 lilondololo kuti: “Abantu bobe bakaipeela kuli iwe no kwanga mu kasuba ka bulamba bobe.” Bushe ico e fyo caba kuli iwe? Bushe kuti cabe fyo kuli iwe ukufika fye na ku cipimo cakulilako ku nshita ya ku ntanshi?

⁹ Kuti walango kuitemenwa pa kufwaya ukwaafwa bambi, ukubalango kwangwako kwa cine cine kuli bene. Baeluda mu cilonganino limbi kuti bakulomba ukwafwilisha bamunyina nelyo bankashi mu nshila imo. Aba limbi kuti balekabila ukwafwiwo kusangwa ku kulongana. Bushe kuti waitemenwa ukwafwilisha? Tauli na kupembelela ukufikila umo alomba ukwafwilisha kobe. Mulandu nshi ushingaitemenwa, ukutambiko kwaafwa kuli abo balemoneko kukabila kwene? Bushe umo alelwala nelyo nateekwa mu cipatala? Tacili icafwaikwo kupembelela ukufikila baeluda batwebe ulwa ici, lelo kuti waitendekelako no kubatandalila nelyo ukwafwilisha mu nshila imbi nga nawishiba ukukabila. Bushe walikwata isambililo lya Baibolo lya lupwa ilya lyonse mu mobe mu ŋanda? Bushe kuti pambi cayafwilisho lupwa lutendeke ukulongana ulushakwate sambililo lya musango yo nga wingabalaalika ukuilunda ku ba mu ŋanda yobe pali ili sambililo mu nshita mu nshita? Nelyo nga ufumina mu butumikishi bwa mwi bala weka, bushe kwalibako bambi abo wingaya na bo nga waipeele ukubasendako? Mulandu nshi te kupekanishisha libela ukulaalikako kasabankanya umbi ukuya na iwe? Ee, ababomfi ba kwa Yehova balipamfiwa shino nshiku, lelo ukuitemenwa kwesu ukwa kwafwilishako bamunyina bambi na bankashi kwaba cipimo ca kulunduluka kwesu. “E ico cena, lyonse ilyo twaba ne nshita, tubombe icisuma kuli bonse, no kucishamo ku ba bwananyina bwa mu citetekelo.”—Gal. 6:10.

10, 11. Mu kumfwana na 1 Timote 3:1, ni shani fintu bamunyina bengaitemenwa ukubomfiwa?

¹⁰ Nga uli munyina, kuti waitemenwa ukubomfiwa pa kubomba ukufika pa milingo yaimikwa mu Cebo ca kwa Lesa iya abo batungulula mu cilonganino. Timote wa Ntanshi 3:1 atasha abo batinamina bukangalila. Ici tacipilibulo kuti kuisunkilisha ku ntanshi pa kuti amonwe, nelyo ukutangana na bambi. Cipilibula ukubombesha ku kuishininkisha pamo ngo Mwina Kristu wakosoka, “umukalamba,” uwafikapo kabili uwaitemenwo kubomba mu cifulo icili conse icingakabilwa. Kabili kuliko kukabila kwa “bakalamba” na ‘babomfi batumikila’ abengi mu cilonganino cimo na cimo aba kutungulula mu kusambilisha, ukushimikila no kusakamana ifishingamo fya cilonganino.

¹¹ Abaitemenwa kuti baipakisha amashuko ayengi mu cilonganino. Kuti baipushiwa ukuba mu filangililo mu Ukulongana kwa Mulimo nelyo ukwaafwa baeluda nelyo ababomfi batumikila pa mulandu wa kuti balilangisha ukuitemenwa kabili baliilangisha abene ukuba abasakamana mu mulimo uuli onse uwapeelwa kuli bene. Lintu ukukabila kwaimako, ukuitemenwa kwabo no kulunduluka kuti pambi kwabeshibisha pamo nga bamunyina abo limbi bengatashiwa pamo nga babomfi. Mulandu nshi uo basontelwa? Ni pa mulandu wa kuti balilangisho kuitemenwa kabili balilunduluka, nomba balefika pa milingo intu Yehova aimika mu Cebo cakwe. Abo basontwa pamo nga babomfi balalaalikwa mu tushita mu tushita kwi Sukulu lya Butumikshi bwa Bufumu ku kukanshiwa kwalundwapo mu kusakamane milandu ya cilonganino.

12, 13. Mashuko nshi yambi yabako ku bengi abengaitemenwa kabili abaitemenwa ukubomfiwa?

¹² Kwalibako amashuko yalundwako ayo bonse limbi bengaipakisha nga bali abaitemenwa kabili nge mibele yabo yasuminisha. Bushe kuti waitemenwa mu tushita mu tushita ukubombako pamo nga painiya wa kwafwilisha nga fintu amakumi ya makana bambi baacita? Pambi kuti waba painiya wa nshita yonse no kuilunda ku mpendwa shabo ishilekulilako. Bushe imibele ya pa lobe ne mimwene yobe ukulosha ku mulimo wa kwa Yehova yaba ica kuti kuti waitemenwa ukuselela ku cifulo cimbi ku kubomba, nge co e cilekabilwa? Abengi balicite ci pamo nga bapainiya baibela, nelyo pa kuya kwi sukulu lya Gileadi na mu mulimo wa bumishonari, nelyo pamo nga bakasabankanya abaselela ku kubomba uko kukabila kuli ukwakulilako. Bamo baliya ku kubomba mu mayanda ya Bethel yalekanalekana ukupulinkane calo. Balipaalwa apakalamba pantu baliitambika abene beka mu kuitemenwa kuli Yehova.

¹³ Shino ni nshita sha kucincimusha isha kubamo aba mweo. Yehova aleshininkisho kuti umulimo wa kusungusha uwa kushimikila no kusambilisha ulecitwa mwi sonde muli shino “nshiku sha kulekelesha.” Lintu, ukupitila mu kuteyanya kwakwe, Yehova atambululo bwite bwa kubombako mu lubali lumo lwa mulimo, ipushe we mwine auti: “Bushe ico cintu ico Yehova aleeba ine?” Beebeete mibele yobe, umutima obe. Mu kupalishako walilundulukako kale kale kabili ulalangisho kuitemenwa kumo, kabili ico cisuma. Lelo bushe kwalibako inshila shimbi umo ukulunduluka kobe kwingamonekela, ukupitila mu kuitemenwa ukubomfiwa ku cipimo cakulilako? Lintu ulekula mu kwankulako ku kutungulula kwa kwa Yehova no kuinashisha ku kutungulula kwakwe, ukapaalwa mu kufumba. Ababomfi baitemenwa aba kwa Yehova ukushinguluke calo conse kuti bacitilo bunte ukuti e fyo caba. Mu cituntulu, pa kulunduluka kwesu e pashintilila ukupaalwa kwacilisha pali konse, ubumi bwa ciyayaya mu calo cipya ica kwa Lesa. Uyo e mulandu wine Icebo ca kwa Lesa citukonkomesesho kuti: “Ube no mute ku fintu ifi, ikala muli ifyo, ukuti ukulunduluka kobe kumoneke kuli bonse. Uimone we mwine, ne sambilisho lyobe; ikalilila muli ifi fintu; pantu pa kucite fyo, ukaipususha we mwine na balekumfwa.”—1 Tim. 4:15, 16.