Yosefe Aesha Bamunyina

YOSEFE alefwaya ukwishiba nga ca kutila bamunyina 10 bacili abakosa imitima kabili abankalwe. E ico abele bonse ati: ‘Muli nengu, mwishile mu kumona ifyo icalo cesu caba pa kuti mukatusanse.’

Bayaswike ati: ‘Awe tatuli nengu. Tuli bantu ba cishinka. Ifwe bonse shifwe ni umo. Twali 12, lelo munyinefwe umo alifwa, e lyo umwaice pali ifwe, ashele ku ng’anda na batata.’

Yosefe acitile kwati tasumine ifyo balelandapo. Abikile Simeone mu cifungo no kweba bamunyina abashele ukusenda ifya kulya no kubwelelamo. Abebele no kuti: ‘Nga mwabwela, mukese no mwaice wenu.’

Ilyo babwelelemo ku Kanaani, bamunyina Yosefe baile-eba shibo, Yakobo fyonse ifyacitike. Yakobo alyumfwile ubulanda sana. Atile: ‘Yosefe alifwa, na Simeone na o ashala. Umwana wandi Benjamini ena tamwakamusende.’ Lelo ilyo ifya kulya fyaile filepwa, Yakobo alibasuminishe ukuya na Benjamini ku Egupti pa kuti bakayeshita ifya kulya.

Ilyo Yosefe amwene bamunyina baleisa, alitemenwe sana ukumona umwaice wakwe Benjamini. Lelo pali bamunyina, tapali uwaishibe ukuti ulya muntu wacindama ali ni Yosefe. Yosefe nomba acitile icintu cimbi pa kwesha bamunyina 10.

Aebele ababomfi bakwe ukwisusha imifuko yonse aya bamunyina ne fya kulya. Lelo abikile kapu yakwe iisuma iya silfere mu mufuko wa kwa Benjamini ukwabula ukuti bamunyina beshibe. Ilyo batendeke ukubwelelamo, Yosefe alekele baendako panono e lyo atuma ababomfi bakwe ukubakonka. Ilyo babasangile, ababomfi bakwe batile: ‘Cinshi mwaibila kapu ya silfere iya kwa shikulu?’

Bonse batile: ‘Tatwibilepo kapu yakwe. Uo mwalasanga na kapu pali ifwe, mumwipaye.’

E ico ababomfi bafwaile mu mifuko yabo no kusanga kapu mu mufuko wa kwa Benjamini, nga fintu ulemona pa cikope. Ababomfi batile: ‘Imwe bonse kabiyeni, lelo Benjamini ena twalaya nankwe.’ Bushe bamunyina Yosefe 10 bacitile shani?

Bonse balibwelele na Benjamini ku ng’anda ya kwa Yosefe. Yosefe aebele bamunyina ukuti: ‘Imwe kuti mwaya ku mwenu, lelo Benjamini alashala kuno no kuba umusha wandi.’

Yuda nomba e walandile na Yosefe ati: ‘Nga nabwelelamo, e lyo Benjamini ashale, batata bakafwa pantu balimutemwa sana.’ Kanshi lekeni umwaice wandi aye, e lyo ine nshale no kuba umusha.

Yosefe alimwene ukuti bamunyina balyaluka. Tabaali ne mitima iyakosa kabili bali aba cikuuku. Natumone nomba ifyo Yosefe acitile.