Ico Davidi Alingile Ukubutuka

ILYO Davidi aipeye Galyati, Abnere, umukalamba wa bashilika ba bena Israele atwele Davidi kuli Shauli. Shauli alitemenwe sana pa fyo Davidi acitile. Alengele aba umukalamba wa bashilika kabili amutwele ku ng’anda ya mfumu pa kuti aleikala nankwe.

Pa numa, ilyo abashilika babwelele mu kulwa na baPelishiti, abanakashi batendeke ukwimba ati: ‘Shauli alipeye abalwani abengi, lelo Davidi naipaya abengi sana.’ Shauli alyumfwile ububi pali filya abantu bacindike sana Davidi ukucila ena. Lelo Yonatani umwana wa kwa Shauli taumfwile ububi. Yonatani alitemenwe sana Davidi kabili Davidi na o alitemenwe sana Yonatani. E ico, aba babili balipangene ukuti bakatwalilile ukuba ifibusa.

Davidi alishibe sana ukulisha isango, na Shauli alitemenwe inyimbo Davidi alelisha. Lelo bushiku bumo, Shauli alicitile icintu icabipa sana pa mulandu wa kupata Davidi. Ilyo Davidi alelisha insango, Shauli abuulile ifumo no kulipoosa kabili alandile ati: ‘Nalalashila Davidi ku cibumba ne fumo!’ Lelo Davidi alibelele, kabili ifumo talyamulashile. Pa nshita imbi, Shauli na kabili alipushile Davidi ifumo. E ico Davidi alishibe ukuti alingile ukucenjela.

Bushe uleibukisha ifyo Shauli alaile? Alaile ukuti uukepaya Galyati akamupeela umwana wakwe kuti akabe umukashi wakwe. Mu kulekelesha, Shauli aebele Davidi ukutila nga aipaya abaPelishiti 100, e lyo akamupeela Mikali, umwana wakwe umukashana. Tontonkanya ifyo Davidi aumfwile! Shauli alemona kwati Davidi bakamwipaya ku baPelishiti. Lelo tabamwipeye, e ico Shauli alipeele umwana wakwe kuli Davidi pa kuti abe umukashi wakwe.

Bushiku bumo, Shauli aebele Yonatani na babomfi bonse ukuti alefwaya ukwipaya Davidi. Lelo Yonatani aebele bawishi ati: ‘Mwi-ipaya Davidi. Tacitapo icili conse icabipa kuli imwe. Lelo fyonse ifyo acita fisuma kabili filamwafwa. Davidi tatiinine ukufwa ilyo aile mu kwipaya Galyati kabili ilyo mwamwene ifyo acitile, mwalitemenwe.’

Shauli alyumfwile ifyo Yonatani amwebele kabili alaile ukuti takepaye Davidi. Shauli alibweseshe Davidi pa ng’anda, kabili Davidi atendeke ukubombela Shauli nga fintu alemubombela kale. Lelo bushiku bumo ilyo Davidi alelisha inyimbo, Shauli na kabili apoosele ifumo kuli Davidi. Davidi alibelele, ne fumo lyailelasa mu cibumba. Uyu wali muku walenga butatu. Pali iyi inshita, Davidi alishibe ukuti alingile ukubutuka!

Mu nshita ya bushiku, Davidi aile ku ng’anda yakwe. Lelo Shauli atumine abaume ukuti bamwipaye. Mikali alishibe ifyo bawishi balepanga ukucita. E ico aebele Davidi ati: ‘Nga tamwafume muno buno ubushiku, mailo bakamwipaya.’ Mikali ayafwile Davidi ukufumina pa windo no kubutuka. Mupepi ne myaka 7, Davidi alefisama mu fifulo ifyalekanalekana pantu talefwaya Shauli ukumusanga.