Abigaili Na Davidi

BUSHE naumwishiba uyu umwanakashi umusuma uuleisa kuli Davidi? Ni Abigaili. Ali muntu umusuma kabili talefwaya Davidi ukucita icabipa. Lelo ilyo tatulalanda pali Abigaili, natulande pa fyacitikile Davidi.

Ilyo Davidi abutwike ukufuma kuli Shauli, afiseme mu lucengo. Bamunyina na balupwa lwakwe balibutwike nankwe. Abaume nalimo 400 balimukonkele kabili e wali intungulushi yabo. Lyena Davidi aile ku mfumu ya bena Moabu no kuyeba ati: ‘Lekeni batata na bamayo bekale na imwe mpaka nkamone ifikacitika kuli ine.’ Pa numa, Davidi na baume bakwe batendeke ukulafisama mu mpili.

Pa numa ya ifi e lyo Davidi aishibe Abigaili. Umulume wakwe Nabali ali umukankala kabili alikwete ne mpaanga. Akwete impaanga 3,000 ne mbushi 1,000. Nabali ali uwa kaso. Lelo umukashi wakwe Abigaili ali umusuma sana kabili alecita icalungama. Inshita imo alipuswishe ulupwa lwakwe. Natumone ifyo cali.

Davidi na baume bakwe balecitila Nabali ifintu ifisuma. Balecingilila impaanga shakwe. E ico bushiku bumo Davidi atumine abaume bamo ku kulomba Nabali ukuti abaafwe. Ilyo baile, basangile Nabali na babomfi bakwe balesesa wulu ku mpaanga. Ubu bwali bushiku bwa mutebeto, kabili Nabali alikwete ifya kulya ifingi kabili ifisuma. E ico abaume ba kwa Davidi batile: ‘Tulamucitila ifisuma. Tatwaibapo impaanga shenu lelo tulamwafwa ukushisunga. Twapapata, tupeeleniko ifya kulya.’

Nabali atile: ‘Te kuti mpeele imwe ifya kulya.’ Nabali alibatanine ifya kulya kabili alandile ifintu ifyabipa pali Davidi. Ilyo abaume babwelele kuli Davidi no kumweba ifyo Nabali alandile, Davidi alifulilwe sana. Aebele abaume bakwe ati: ‘Cila muntu asende ulupanga lwakwe!’ E fyo baile mu kwipaya Nabali na baume bakwe.

Umo pa baume ba kwa Nabali, uwaumfwile ifibi ifyo Nabali alandile pa fya kulya, alyebeleko Abigaili. Apo pene fye Abigaili alipekenye ifya kulya. Afibikile pa mpunda no kuya. Ilyo akumenye Davidi, aikile pa mpunda no kufukama e lyo alanda ati: ‘Napapata, mwibikako amano ku fyo umulume bandi ba Nabali bacitile. Takwata mano, kabili ifyo acita fibi fyeka fyeka. Ubupe ubu, sendeni kabili tweleleni pa fyacicitika.’

Davidi ayaswike ati: ‘Uli mwanakashi wa mano. Walenga ukuti ni-ipaya Nabali pa fyo acicita. E ico kabiye ku ng’anda mu mutende.’ Ilyo Nabali afwile, Abigaili aishileba umukashi wa kwa Davidi.