Yesebele, Namfumu Uwabipa

ILYO Imfumu Yeroboamu yafwile, imfumu shonse ishakonkelepo ukuteka mu bufumu bwa ku kapinda ka kuso ubwa mikowa 10 iya bena Israele, shali ishibi. Imfumu Ahabu e mfumu iyali iibi sana pa mfumu shonse. Bushe nawishiba icalengele? Uwalengele sana mukashi wakwe Yesebele, uwali namfumu umubi.

Yesebele taali umwina Israele. Ali mwana wa mfumu ya ku Sidone. Alepepa Baali, lesa wa bufi, kabili alengele Ahabu na bena Israele abengi ukutendeka ukupepa Baali. Yesebele alipatile Yehova kabili alipeye bakasesema abengi. Abengi balefisama mu fimabwe pa kuti bebepaya. Yesebele nga alefwaya cimo, aleipailapo no muntu pa kuti fye akwete ico cintu.

Bushiku bumo Imfumu Ahabu yalifulilwe sana. E ico, Yesebele aipwishe imfumu ati: ‘Cinshi ufulilwe sana lelo?’

Ahabu ayaswike ati: ‘Nimfulwa pa mulandu wa fyo Nabali acinjeba. Nacilafwaya ukushita ibala lyakwe ilya myangashi lelo acikaana.’

Yesebele atile: ‘Wisakamana, nkakupokela.’

E ico Yesebele alembele amakalata no kuyatuma ku bakalamba abali mu musumba umwaleikala Nabote. Abebele ati: ‘Ebeni abaume abashakwata amano baye-eba Nabote pa bantu ukuti napontela Lesa ne mfumu. Kabili mumufumye mu musumba no kumutoba amabwe mpaka afwe.’

Ilyo fye Yesebele aumfwile ukuti Nabote nafwa, aebele Ahabu ati: ‘Nomba senda ibala lya kwa Nabote ilya myangashi.’ Bushe taulesumina ukuti Yesebele alingile ukukandwa pa fyabipa ifyo acitile?

Mu kuya kwa nshita, Yehova atumine Yehu mu kukanda Yesebele. Ilyo Yesebele aumfwile ukuti Yehu aleisa, apenteele inkopyo ne fyafiita no kuiwamya pa kuti amoneke bwino. Lelo ilyo Yehu aishile no kumona Yesebele pa windo, aebele abalebombela pa ng’anda ya mfumu ati: ‘Muponesheni pa nshi!’ Abaume balicitile ifyo babebele nga fintu ulemona pa cikope. Balimuponeshe pa nshi no kufwa afwa. Ifi e fyo namfumu wabipa Yesebele afwile.