Abantu Ba Kwa Lesa Bafumamo Mu Babiloni

IFI ulemona pa cikope fyacitike ninshi palipita imyaka mupepi na ibili ukutula apo umusumba wa Babiloni baupokele ku bena Madai na bena Persia. Abena Israele nomba balefuma mu Babiloni. Cali shani pa kuti balubulwe? Nani abasuminishe ukufumamo?

Sailasi, imfumu ya bena Persia e wabasuminishe. Kale sana ilyo Sailasi talafyalwa no kufyalwa, Yehova aebele kasesema wakwe Esaya ukulemba pali Sailasi ati: ‘Ukacita ico mfwaya iwe ukucita. Bakasha iminshi ya musumba iyaisuka pa kuti ukapoke umusumba.’ Na cine Sailasi e watungulwile abailepoka umusumba wa Babiloni. Abena Madai na bena Persia baile mu musumba ubushiku. Baingilile pa minshi ya musumba iyo abena Babiloni bashaisele.

Lelo Esaya kasesema wa kwa Yehova alandile no kuti, Sailasi akeba abena Israele ukuyakuula cipya cipya Yerusalemu ne tempele lyalimo. Bushe Sailasi alicitile ifyo? Ee. Sailasi aebele abena Israele ati: ‘Kabiyeni ku Yerusalemu ili line no kuyakuula itempele lya kwa Yehova Lesa wenu.’ Kabili ifi fine e fyo abena Israele abo ulemona pa cikope baleya mu kucita.

Lelo abena Israele bamo abali mu Babiloni balifililwe ukubwelelamo ku Yerusalemu. Ulwendo lwali ulutali sana. Pali amakilomita 800 kabili abengi abalingile ukubwelelamo bali abakote sana e lyo bambi bali abalwele. Ifi e lyo ne fintu fimbi e fyalengele bamo bafilwe ukubwelelamo ku Yerusalemu. Lelo Sailasi aebele abafililwe ukuya ati: ‘Peleeni silfere na golde ne fya bupe fimbi ku balebwelelamo ku kukuula Yerusalemu ne tempele.’

E ico abena Israele ababwelele ku Yerusalemu balibapeele ubupe ubwingi. Sailasi na o alibapeele imbale na makapu ifyo Imfumu Nebukadnesari yasendele mwi tempele lya kwa Yehova ilyo yaonawile Yerusalemu. Abantu balikwete ifintu ifingi ifya kusenda ku Yerusalemu.

Pa numa ya kwenda imyeshi 4, abena Israele basukile bafika mu Yerusalemu pa nshita ilya ine bali no kufikilapo. Apa ninshi papita imyaka 70 ukutula apo umusumba waonawililwe, kabili pali iyi myaka mu musumba tamwali umuntu nangu umo. Lelo nangu ca kutila abena Israele bali mu calo cabo, balikwete amafya, nga fintu twalamona.