Lesa Atuma Malaika Kuli Maria

UYU umwanakashi umusuma ni Maria. Ali mwina Israele uwaleikala mu musumba wa Nasarete. Lesa alishibe ukuti Maria ali no mutima uusuma. E co atumiine malaika Gabriele ukuyalanda nankwe. Bushe walishiba ifyo Gabriele aebele Maria? Leka tumone.

Gabriele aebele Maria ati: ‘Mwapoleni, we wapaalwa nga nshi, Yehova ali na iwe.’ Maria tabalile amonapo uyu muntu. Alisakamene pantu taishibe umwalolele ifyo alandile. Lelo apo pene, Gabriele alimwebele ico alelandapo.

Atile: ‘Witiina Maria, Yehova nakusenamina. E ico, Lesa alakucitila icintu icisuma. Uli no kukwata umwana. Kabili ukamwinike ati Yesu.’

Gabriele alondololwele no kuti: ‘Uyu umwana akaba umukalamba, kabili aketwa Umwana wa kwa Lesa Wapulamo. Yehova akamulenga ukuba imfumu nga fintu Davidi wishi ali. Nomba Yesu ena akaba imfumu umuyayaya, kabili ubufumu bwakwe tabwakapwe!’

Maria amwipwishe ati: ‘Cikaba shani apo nshaupwa? Nshaikalapo no mwaume, nomba nkakwata shani umwana?’

Gabriele ayaswike ati: ‘Umupashi wa kwa Lesa ukesa pali iwe. E ico umwana ukakwata aketwa Umwana wa kwa Lesa.’ Lyena Gabriele aebele Maria ati: ‘Ibukisha lupwa obe Elisabete. Abantu balelanda ati te kuti akwate abana pantu mukalamba sana. Lelo ali no kukwata umwana umwaume. Kanshi takuli ico Lesa engafilwa ukucita.’

Apo pene Maria alandile ati: ‘Ndi musha mwanakashi uwa kwa Yehova! Nacibe ifyo fine walanda.’ Awe malaika alifuminepo.

Maria alimine mu kwangufyanya ukuya mu kumona Elisabete. Ilyo Elisabete aumfwile ishiwa lya kwa Maria, umwana uwali mwi fumo lyakwe alicilawike ku nsansa. Umupashi wa kwa Lesa waishile pali Elisabete kabili aebele Maria ati: ‘Walipaalwa sana pa banakashi bonse.’ Maria aikele na Elisabete nalimo imyeshi itatu, e lyo abwelelamo ku Nasarete.

Maria ali mupepi no kupwa kuli Yosefe. Lelo ilyo Yosefe aumfwile ukuti Maria ali no kukwata umwana, alefwaya ukukaana ukumuupa. Lelo malaika wa kwa Lesa amwebele ati: ‘Witiina ukusenda Maria ukuti abe umukashi obe pantu umwana akakwata afumine kuli Lesa.’ E ico Maria na Yosefe balyupene, batendeka no kulolela ukuti Yesu akafyalwe.