Yohane Abatisha Yesu

MONA iyi inkunda iileisa pa mutwe wa mwaume. Uyu umwaume ni Yesu. Apa ninshi ali ne myaka 30. E lyo umwaume uuli nankwe ni Yohane. Twalisambililepo fimo pali Yohane. Bushe uleibukisha ukuti ilyo Maria atandalile lupwa wakwe Elisabete, umwana uwali mwi fumo lya kwa Elisabete alicilawike ku nsansa? Ulya umwana ni Yohane. Nomba cinshi Yohane na Yesu balecita apa?

Apa ninshi Yohane e lyo acimwibisha fye Yesu mu Mumana wa Yordani. Ifi e fyo umuntu abatishiwa. Ica kubalilapo, balamwibisha mu menshi, e lyo bamufumyamo. Yohane alebatisha abantu, e co balemwitila ati Yohane Kabatisha. Bushe cinshi Yohane abatishishe Yesu?

Ni co Yesu aliile kuli Yohane no kumweba ukuti amubatishe. Yohane alebatisha abantu abalefwaya ukulanga ukuti nabalapila pa fibi ifyo balecita. Nomba bushe Yesu alicitilepo ifibi pa kuti alange ukuti nalapila? Awe, Yesu tacitilepo ifibi pantu Mwana wa kwa Lesa kabili afumine ku muulu. Kanshi kuli icalengele ukuti ebe Yohane ukuti amubatishe. Leka tusambilile icalengele.

Ilyo Yesu talaisa kuli Yohane ukuti amubatishe, ali ni kabasa. Kabasa muntu uupanga ifintu ifya fimuti pamo nga amatebulo ne ifipuna. Yosefe, umulume wa kwa Maria ali ni kabasa, e ico alisambilisheko na Yesu. Lelo Yehova tatumine Umwana wakwe pa calo ukwisaba kabasa. Amutumine ukwisabomba umulimo uwaibela, kabili inshita yalifikile iya kuti Yesu atendeke ukubomba uyu umulimo. E ico pa kulanga ukuti nomba alefwaya ukutendeka ukucita ifyo Wishi alefwaya, Yesu aebele Yohane ukumubatisha. Bushe Lesa alitemenwe ilyo abatishiwe?

Ee, alitemenwe pantu ilyo Yesu afumine fye mu menshi, ishiwi ukufuma mu muulu lyatile: ‘Uyu e Mwana wandi uo natemwisha.’ Nga fintu ulemona, cimoneka kwati umuulu waliswike ne nkunda yaishile pali Yesu. Nomba iyi tayali ni nkunda ya cine. Yalemoneka fye kwati ni nkunda, lelo wali mupashi wa mushilo uwa kwa Lesa.

Pali iyi inshita, Yesu alikwete ifingi ifyo aletontonkanya, e ico aile ku cifulo uko aileikala eka pa nshiku 40. Satana aile ukwali Yesu. Atunkile Yesu imiku itatu ukuti acite ifyo amafunde lya kwa Lesa yakeenye. Lelo Yesu alikeene.

Pa numa, Yesu alibwelelemo kabili asangile abantu abaishileba abasambi bakwe aba kubalilapo. Amashina ya bamo ni Andrea, Petro (uo baleita ati Simone), Filipi na Natanaele (uo baleita ati Bartolomeo). Yesu na aba basambi baile ku citungu ca Galili. Ilyo bali mu Galili, baile ku musumba wa Kana uko Natanaele aleikala. Ilyo bali kulya, Yesu aile ku bwinga uko acitile icipesha amano ca kubalilapo. Bushe nawishiba ifyo acitile? Alengele amenshi yaba umwangashi.