Yesu No Mwanakashi Pa Cishima

YESU aile pa cishima mu Samaria pa kuti atuusheko. Abasambi bakwe baile mu musumba ku kushita ifya kulya. Umwanakashi uo alelanda nankwe, aile mu kutapa amenshi pali ici cine icishima. Yesu amwebele ati: ‘Mpeelako amenshi ya kunwa.’

Uyu umwanakashi alipapile sana. Bushe nawishiba ico apapiile? Ni co Yesu ali muYuda e lyo ena ali mwina Samaria. AbaYuda abengi balipatile abena Samaria ica kuti tabalelanda nabo! Nomba Yesu ena alitemenwe abantu bonse. E ico alandile ati: ‘Awishiba uulekulomba amenshi, na iwe nga naumulomba, na o nga nakupeela amenshi ya mweo.’

Umwanakashi atile: ‘Mukwai, icishima citali, e lyo tamukwete ne mbeketi ya kutapilako amenshi. Ni kwi mwalafumya amenshi ya mweo?’

Yesu amwebele ati: ‘Nga wanwa amenshi muli ici icishima ukaba ne cilaka na kabili. Lelo amenshi ayo nkwete kuti yalenga umuntu ukwikala umuyayaya.’

Umwanakashi atile: ‘Mukwai, mpeeniko ayo amenshi pa kuti nilaumfwa icilaka, nilaisako na kuno ku kutapa amenshi.’

Umwanakashi alemona kwati Yesu alelanda pa menshi aya yene tunwa. Lelo alelanda pa cine ca kwa Lesa na pa bufumu bwakwe. Ici icine, caba kwati menshi ayapeela umweo. Kuti calenga umuntu akwata umweo wa muyayaya.

Lyena Yesu aebele umwanakashi ati: ‘Kabiye kete umulume obe e lyo wise kuno.’

Umwanakashi ayaswike ati: ‘Nshakwata umulume.’

Yesu amwebele ati, ‘Walanda bwino. Walyupilwe ku baume 5, kabili umwaume uo uleikala nankwe nomba te mulume obe.’

Umwanakashi alipapile pantu fyonse ifyo Yesu alandile fyali fya cine. Bushe Yesu aishibe shani ifi fintu? Ni co ali ni Mesia, uo Lesa atumine pano calo. Kanshi Lesa e walengele ukuti eshibe ifi fyonse. Pali iyi nshita, abasambi ba kwa Yesu balibwelele uko baile mu kushita ifya kulya kabili balipapile pa kusanga Yesu alelanda no mwina Samaria.

Finshi tulesambilila kuli ifi fyonse? Tulesambilila ukuti Yesu ali ne cikuuku ku bantu bonse. Na ifwe tulingile ukuba ne cikuuku kuli bonse. Tatufwile ukulamona kwati abantu bambi babi pantu fye bafuma ku calo cimbi. Yesu alefwaya abantu bonse ukwishiba icine icikalenga abantu ukuba no mweo wa muyayaya. Kanshi na ifwe tulingile ukwafwa abantu ukusambilila icine.