Yesu Abuuka ku Bafwa

BUSHE naumwishiba uyu umwanakashi na aba abaume babili? Uyu umwanakashi ni Maria umwina Magadala, umunankwe wa kwa Yesu. E lyo aba abaume babili abafwele ifyabuuta ni bamalaika. Umu Maria alelolesha, e mo babikile umubili wa kwa Yesu ilyo afwile. Ni mu manda. Nomba tamuli umubili wa kwa Yesu! Nani uwausendele? Natumone.

Ilyo Yesu afwile, bashimapepo baebele Pilato abati: ‘Ilyo Yesu ashilafwa ale-eba abantu ati akabuuka pa numa ya nshiku shitatu. E ico ebeni aba kulonda imanda. Nga kwaba aba kulonda, ninshi abasambi bakwe teti bamwibe no kulanda ati nabuuka ku bafwa!’ Pilato aebele bashimapepo ukutuma abashilika ba kulonda imanda.

Lelo ilyo Yesu afwile, pa bushiku bwalenga shitatu ulucelo celo, malaika wa kwa Yehova alishile. Alifumishe ilibwe pa manda. Abashilika balitiniine sana ica kuti balifililwe ukucita icili conse. Ilyo balengele mu manda, basangile tamuli umubili wa kwa Yesu! Abashilika bamo baile mu musumba ku kweba bashimapepo ifyacitike. Bushe walishiba ico bashimapepo babipa bacitile? Balipiile indalama abashilika pa kuti babepe ubufi. Baebele abashilika abati: ‘Mulande ati abasambi bacisaiba umubili wakwe ubushiku ninshi natulaala.’

Pali iyi inshita, bacibusa ba kwa Yesu abanakashi baile ku manda uko bashikile Yesu. Balipapile pa kusanga mu manda tamuli umubili! Apo pene, bamalaika babili abafwele ifyabuuta baishile kuli bena. Baipwishe abati: ‘Cinshi ico mulefwaila Yesu kuno? Yesu nabuuka. Kabiyeni bwangu bwangu mu kweba abasambi bakwe.’ Aba abanakashi baile ulubilo! Nomba ilyo baleya, umwaume alibeminike. Bushe naumwishiba uwabeminike? Ni Yesu! Atile: ‘Kebeni abasambi bandi.’

Ilyo abanakashi baebele abasambi ukuti Yesu nabuuka no kuti nabamumona, abasambi tabashininkishe. Petro na Yohane babutikile ku manda pa kuti bayeimwena abene, lelo basangile mu manda tamuli umubili! Ilyo Petro na Yohane bafuminepo, Maria umwina Magadala alishele. Aloleshe mu manda no kumona bamalaika babili.

Bushe walishiba ifyacitike ku mubili wa kwa Yesu? Lesa alengele umubili ukufumamo. Lesa tabuushishe Yesu no mubili wa munofu uo afwile na o. Abuushishe Yesu no mubili wa mupashi, nga ulya uwakwata bamalaika ku muulu. Lelo pa kuti abasambi bakwe beshibe ukuti nabuuka, Yesu aleba no mubili uo abantu bengamona nga fintu tukasambilila.