Mu Muputule Uwali Uwakomwa

ILYO Petro na Yohane bafumine pa manda ya kwa Yesu, Maria ashele eka kabili atendeke ukulila. Lyena alikonteme no kulengela mu kati ka manda, nga fintu twamwene pa cikope mu lyashi 102. Amwene bamalaika babili abamwipwishe abati: ‘Cinshi ulelila?’

Maria ayaswike ati: ‘Nabasenda Shikulu wandi, kabili nshishibe uko bamubikile.’ Ilyo Maria apilibwike, amwene umwaume umo naiminina. Umwaume aipwishe Maria ati: ‘Nani ulefwaya?’

Maria amwene kwati uwamwipwishe, mwaume uwalebomba mwi bala. Kabili amwene kwati e wasendele umubili wa kwa Yesu. E ico atile: ‘Nga ni mwe mumusendele, njebeni uko mumubikile.’ Uo Maria alelanda nankwe, ni Yesu. Ali no mubili umbi, e co tamwishibiile. Lelo ilyo aitile Maria mwi shina, e lyo Maria aishibe ukuti ni Yesu. Aile ulubilo mu kweba abasambi ati: ‘Nimona Shikulu!’

Inshita imbi pali bulya bwine bushiku, ilyo abasambi babili bale-enda ukuya ku mushi wa Emao, bamwene fye umwaume umo aisa no kutendeka ukubakonka. Abasambi ninshi bali no bulanda sana pa mfwa ya kwa Yesu. Lelo ilyo bale-enda no yu umwaume, atampile ukubeba ifintu ifingi ifyo Baibolo yalanda, ne fi fyebo fyalengele bomfweko bwino. Ilyo abasambi baiminine pa kuti balyeko ifya kulya, e lyo baishibe ukuti umwaume walebakonka ni Yesu. Yesu alibashiile kabili balya abasambi babili babwelele ku Yerusalemu bwangu bwangu ku kweba abatumwa pali ena.

Ilyo ici calecitika, Yesu aile na kuli Petro. Abasambi bambi balitemenwe ilyo baumfwile ili ilyashi. Na pa numa balya abasambi babili baile ku Yerusalemu uko basangile abatumwa bambi no kubeba ukuti Yesu aliile kuli bena ilyo bale-enda mu musebo. Bushe walishiba icacitike ilyo baleshimikila abanabo ili ilyashi?

Lolesha pa cikope. Yesu aile mu muputule baalimo nangu ca kuti iciibi cali icakomwa. Abasambi balitemenwe sana! Icacitike bulya ubushiku, caliweme nga nshi! Bushe nomba kuti wapenda imiku Yesu amonene na basambi bakwe? Bushe wapenda imiku 5?

Umutumwa Toma taali na basambi banankwe ilyo bamonene na Yesu. E ico abasambi bamwebele abati: ‘Natumona Shikulu!’ Lelo Toma alikeene ati, te kuti nsumine kano nga namumona ne mwine. Pa numa ya nshiku 8, abasambi na kabili balilongene mu muputule ninshi iciibi nacikomwa, na Toma ninshi e mo ali. Awe abasambi bamwene fye Yesu aisa mu muputule. Iyi nshita yena, Toma alisumine.