Petro Atandalila Korneli

UYU uwiminine apa ni Petro, kabili abali ku numa yakwe banankwe. Nomba cinshi uyu umwaume afukaminine Petro? Bushe alingile ukufukama? Bushe naumwishiba uyu umwaume?

Ni Korneli. Ali mukalamba wa bashilika ba bena Roma. Nangu ca kuti Korneli tamwishibe Petro, malaika amwebele ukwita Petro ku ng’anda yakwe. Natumone icalengele.

Abasambi ba kubalilapo aba kwa Yesu bali baYuda, lelo Korneli ena taali umuYuda. Na lyo line, Korneli alitemenwe Lesa kabili alepepa kuli ena, e lyo alecitila na bantu ifintu ifingi ifisuma. Bushiku bumo, malaika aile kuli ena no kumweba ati: ‘Lesa alitemwa ifyo ucita, kabili alayasuka amapepo yobe. Tuma abaume aba kuyaita umwaume uwitwa Petro. Ekala mu Yopa, pa ng’anda ya kwa Simone, uwikala mupepi na bemba.’

Apo pene, Korneli atumine abaume ba kuyaita Petro. Ubushiku bwakonkelepo ilyo abaume balepalamina ku Yopa, Petro ali pa mutenge wa ng’anda ya kwa Simone. Ilyo Petro ali pa mutenge, Lesa alengele amona insalu iikalamba ilefuma mu muulu. Mu nsalu mwali imisango yonse iya finama. Ifunde lya kwa Lesa lyalikeenye ukulya inama ishakowela. Lelo ishiwi lyatile: ‘Petro, ima. Ipaya no kulya.’

Petro ayaswike ati: ‘Awe! Nshatalalyapo icakowela.’ Lelo ishiwi lyaebele Petro aliti: “Ifyo Lesa asangulwile, witila fyalikowela.” Ishiwi lyalandile ifi imiku itatu. Ilyo Petro aletontonkanya umwalolele ifyo amwene, abaume abo Korneli atumine ukuyamwita balifikile pa ng’anda.

Petro afumine pa mutenge no kubeba ati: “Ninjishiba nine mulefwaya. Cinshi mwaisa mu kucita?” Ilyo abaume bamulondolwelele ukuti malaika e waebele Korneli ukumwita ku ng’anda yakwe, Petro alisumine ukuya nabo. Ubushiku bwakonkelepo, Petro na banankwe balimine no kuya kuli Korneli ku Kaisarea.

Korneli aitile balupwa na banankwe. Ilyo Petro afikile, Korneli alimupokolele bwino kabili awile pa makasa yakwe, nga fintu ulemona pa cikope. Lelo Petro amwebele ati: “Ima, na ine wine ndi muntu fye.” Ca cine, Baibolo yalikaanya ukukontamina umuntu no kumupepa. Tulingile ukupepa Yehova eka fye.

Petro atendeke ukushimikila abalongene. Atile: ‘Naishiba ukuti Lesa alapokelela abantu bonse abafwaya ukumubombela.’ Ilyo Petro alelanda, Lesa atumine umupashi wakwe, kabili abantu batendeke ukulandila mu ndimi ishalekanalekana. Ici calipapwishe abasambi abaYuda abaile na Petro pantu balemona kwati Lesa atemwa fye abaYuda. E ico balisambilileko ukuti Lesa amona abantu bonse ukuti baba fye cimo cine te mulandu no mutundu wabo. Kuti cawama sana nga ca kuti bonse tuleibukisha ici cishinka.