Isonde Likaba Paradaise

MONA ifimuti ifi ifitali na maluba e lyo ne mpili. Ici icikope cilemoneka bwino, te fyo? Mona umwaice aleliisha akanama. Mona ne nkalamo na bakabalwe abali mwi lungu. Bushe te kuti utemwe ukwikala mu ng’anda iyaba mu cifulo icimoneka ifi?

Lesa afwaya ukekale muli paradaise pa calo umuyayaya. Lesa tafwaya ukuti ulecula no kulwala nga fintu abantu bacula pali lelo. Baibolo yalilaya bonse abakekala muli paradaise ukuti: ‘Lesa akaba nabo. Takwakabe ukufwa nangu ukulila nangu ukukalipwa. Pantu ifya kale ninshi nafiya.’

Yesu akalenga ifintu fyonse ukuwama. Bushe walishiba ilyo ici cikacitika? Fikacitika nga afumyapo ifyabipa fyonse na bantu babipa pa calo. Ibukisha ukuti ilyo Yesu ali pa calo aleposha abalwele, kabili alebuusha na bafwa. Yesu acitile ifi fintu ku kulanga ifyo akacita nga aba Imfumu mu bufumu bwa kwa Lesa.

Ala cikawama ukwikala muli paradaise pa calo! Yesu akalatekela mu muulu pamo na bantu abo asala. Bakateka bwino abantu bonse pa calo kabili bakalenga bakabe ne nsansa. Leka tumone ifyo tulingile ukucita pa kuti Lesa akatupeele umweo wa muyayaya muli paradaise.